Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Waut lieet de Schreft werkjlich?

 DAUT 17. KAPITEL

Derch daut Jebäd Gott noda komen

Derch daut Jebäd Gott noda komen
  • Wuarom sell wie to Gott bäden?

  • Woo mott wie bäden, daut Gott no ons horcht?

  • Woo beauntwuat Gott onse Jebäda?

Jehova, “dee Himmel un Ieed jemoakt haft”, horcht no onse Jebäda

1-2. Wuarom es daut waut gaunz besondret, daut wie to Gott bäden kjennen? Un wuarom mott wie weeten, waut de Schreft äwa daut bäden sajcht?

WAN wie seenen, woo groot daut Weltaul es met aul de Stierns, de Sonn un de Mon, woa wie en, daut de Ieed mau sea kjlien es. Fa Jehova, “dee Himmel un Ieed jemoakt haft,” sent aule Velkja toop mau soo aus eene Lakj Wota aum Ama (Psalm 115:15; Jesaja 40:15). Un doch sajcht daut en de Schreft: “De HAR es aul dee noaun, dee am aunroopen, aul dee, dee am en Woarheit aunroopen. Hee stalt dee tofräd, dee am ferchten. Hee hieet wan see schrieen un halpt an” (Psalm 145:18-19). Denkj mol han: Uk wan Jehova de aulmajchtja Schepfa es, horcht dee no onse Jebäda un es nich wiet auf von ons, wan wie “am en Woarheit aunroopen”. Es daut nich waut gaunz besondret, daut wie to Gott bäden kjennen?

2 Oba daut Jehova no onse Jebäda horcht, mott wie soo to am bäden, aus hee daut haben well. Woo kjenn wie daut, wan wie nich weeten, waut de Schreft doatoo sajcht? Wie motten daut rutfinjen, wiels derch daut Jebäd kjenn wie Gott noda komen.

 WUAROM SELL WIE TO JEHOVA BÄDEN?

3. Wuarom sell wie to Jehova bäden?

3 Eemol sell wie to Jehova bäden, wiels hee daut haben well. En de Schreft heet daut: “Sorcht junt om nuscht. Lot Gott met bäden un prachren un dankscheen sajen aules weeten waut junt fält! Un Gott sien Fräd, dee wiet äwa aules jeit waut Menschen vestonen kjennen, woat june Hoaten un Jedanken en Christus Jesus bewoaren!” (Filippa 4:6-7). Wan Gott, de hechsta Harscha, ons daut soo leeftolich mäajlich jemoakt haft, daut wie to am bäden kjennen, well wie daut uk wellich doonen.

4. Wuarom kjenn wie bloos dan Jehova noda komen, wan wie pinkjlich to dän bäden?

4 Wie sellen uk pinkjlich bäden, wiels doaderch kom wie Jehova noda. Goode Frind unjahoolen sikj nich bloos dan, wan an waut fält. Dee sent unjarenaunda om sikj bekjemmat, see räden doaräwa, waut see denkjen, woo an daut jeit un waut an Sorjen moakt. Je mea see daut doonen, je jratre Frind woaren see. Een bät soo es daut uk tweschen ons un Jehova Gott. En dit Buak hab wie aul väl doaräwa jelieet,  waut de Schreft äwa Jehova sajcht, woo dee soo es un waut hee noch doonen woat. Wie haben Jehova kjanen jelieet aus eenen Gott, dee denkjt un feelt. Wan wie to am bäden, kjenn wie met am äwa aules räden, waut ons oppem Hoaten licht, un wan wie daut doonen, kom wie onsen Voda em Himmel emma noda (Jakobus 4:8).

WOO MOTT WIE BÄDEN, DAUT GOTT NO ONS HORCHT?

5. Waut wiest, daut Jehova nich no aule Jebäda horcht?

5 Horcht Gott no aule Jebäda? Nä. To de ojjehuarsome Israeliten säd Jehova: “Uk wan jie väl bäden, woa ekj nich horchen, wäajen de Schult, waut jie oppe Henj haben” (Jesaja 1:15). Een schlajchtet Vehoolen kaun daut bat doa brinjen, daut Gott nich no onse Jebäda horcht. Wan wie aulsoo wellen, daut Gott onse Jebäda aunnemt, mott wie jewesse Bedinjungen erfellen.

6. Waut mott wie doonen, daut Gott no onse Jebäda horcht?

6 Eene Bedinjunk es, daut wie Gloowen bewiesen (läs Markus 11:24). Paulus schreef: “Onen Gloowen es daut ommäajlich, Gott to jefaulen. Wäa no Gott komen well, mott jleewen, daut hee es, un daut hee dee beloont, dee am iernstlich sieekjen” (Hebräa 11:6). Opp iernst Gloowen haben es mea, aus bloos to weeten, daut daut eenen Gott jeft un daut dee no Jebäda horcht. Gloowen wiest sikj derch Woakjen. Wie motten derch onsen Waundel jieda Dach bewiesen, daut wie Gloowen haben (Jakobus 2:26).

7. (a) Wuarom sell wie en onse Jebäda wiesen, daut wie Jehova sea achten? (b) Woo kjenn wie en onse Jebäda wiesen, daut wie deemootich un opprechtich sent?

7 Jehova well uk, daut wie deemootich sent un met een opprechtjet Hoat bäden. Hab wie nich uk werkjlich Uasoak, deemootich to sennen, wan wie met Jehova räden? Saj wie mol, du wurscht met eenen Kjennich ooda Präsident räden. Du wurscht secha soo met dän räden, daut dee moakjt, daut  du dän waut achst, wiels dee een besondret Aumt haft. Woo väl mea wudd wie daut dan sellen bie Jehova doonen (Psalm 138:6). Schlieslich es je hee de “Gott, dee aule Macht haft” (1. Mose 17:1). Wan wie bäden, sell wie daut deemootich doonen un wiesen, daut wie Jehova aus dän Aulahechsten achten. Daut woat ons halpen, opprechtich to bäden un am aules to sajen, waut wie em Hoaten haben, enne Städ utwendich jelieede Jebäda brucken (Matäus 6:7-8).

8. Woo kjenn wie Jehova wiesen, daut ons daut iernst es, om waut wie bäden?

8 Gott horcht uk mau dan no onse Jebäda, wan hee sitt, daut ons daut iernst es, om waut wie bäden. Jehova well, daut wie selfst aules doatoo doonen, waut en onse Macht steit. Biejlikj, wan wie bäden: “Jeff ons daut Broot daut wie vondoag brucken”, mott wie uk reed sennen, flietich to schaufen un aule Oabeit to doonen (Matäus 6:11; 2. Tessalonicha 3:10). Ooda wan wie met eene Schwakheit kjamfen un Jehova no Help froagen, mott wie uk doano seenen, daut wie ons nich wua nenjäwen, wua wie kjennen vesocht woaren (Kolossa 3:5). Oba daut jeft noch mea, waut wie äwa daut Jebäd weeten motten. Well wie mol seenen, waut daut es.

FROAGEN ÄWA DAUT JEBÄD

9. To wäm sell wie bäden? Un woo sell wie daut doonen?

9 To wäm sell wie bäden? Jesus lieed siene Jinja, daut see sullen to dän “Voda em Himmel” bäden (Matäus 6:9). Daut wiest, daut wie bloos sellen to Jehova Gott bäden. Oba Jehova well, daut wie daut en Jesus sienen Nomen doonen, wiels soo aus wie en daut fefte Kapitel jeseenen haben, wort Jesus oppe Ieed jeschekjt, om ons von de Sind un dän Doot loostokjeepen (Johanes 3:16; Reema 5:12). Hee es aus Rechta un Huaga Priesta enjesat (Johanes 5:22; Hebräa 6:20). Doawäajen sajcht daut en de Schreft, daut wie derch Jesus to Gott bäden sellen. Jesus säd: “Ekj sie  de Wajch, de Woarheit un daut Läwen, kjeena kjemt nom Voda buta derch mie” (Johanes 14:6). Daut Jehova no onse Jebäda horcht, mott wie bloos to am bäden, oba en Jesus sienen Nomen.

10. Wuarom es daut nich emma needich, daut wie kjneeen, wan wie bäden?

10 Mott wie emma kjneeen ooda Henj foljen, wan wie bäden? Nä, Jehova velangt daut nich. En de Schreft läs wie, eenje deeden biem setten bäden, aundre deeden sikj doatoo bekjen, noch aundre deeden kjneeen ooda stonen (2. Samuel 7:18; Nehemia 8:6; Daniel 6:11; Markus 11:25). Daut kjemt nich doaropp aun, woo wie ons hanstalen ooda aus aundre daut seenen. Waut doa werkjlich talt, es, daut wie ierlich un vom Hoaten bäden. Wie kjennen uk opp stelles bäden, endoont, wua wie sent, aus oppe Oabeit ooda wan wie en eene schwoare Loag sent. Jehova hieet ons, uk wan de Menschen rom ons nich moakjen, daut wie bäden (Nehemia 2:1-6).

11. Om waut kjenn wie aules bäden?

11 Om waut kjenn wie bäden? En de Schreft sajcht daut von Jehova, “daut hee ons hieren deit, wan wie am no waut froagen, daut no sienem Wellen es” (1. Johanes 5:14). Gott horcht no onse Jebäda, wan daut, om waut wie bäden, met sienen Wellen äwareen es. Kjenn wie uk wäajen onse ieejne Trubbels bäden? Secha. Daut es biejlikj soo, aus wan wie met eenen gooden Frint räden. Wie kjennen met Jehova äwa aules räden. En de Schreft woat ons toojerot: “Schett jun Hoat ver am ut” (Psalm 62:9). Wie sellen doarom bäden, daut Gott ons met sienen heiljen Jeist halpt, daut rajchte to doonen (Lukas 11:13). Wan wie en schwoare Tieden sent ooda ons motten to waut eenich woaren, kjenn wie Gott no Weisheit un Krauft froagen (Jakobus 1:5). Wan wie jesindicht haben, mott wie Gott doarom bäden, daut hee ons saul vejäwen, wiels je Jesus fa onse Sinden jestorwen  es (Efeesa 1:7-8). Oba wan wie bäden, sell wie nich bloos aun ons denkjen. Wie sellen uk fa aundre bäden, soo aus fa onse Famielje ooda fa onse Gloowesbreeda (Aposteljeschicht 12:5; Kolossa 4:12).

12. Von waut sellen sikj onse Jebäda daut ieeschte haundlen?

12 Onse Jebäda sellen sikj daut ieeschte von Jehova haundlen un von daut, waut met sien Väanämen to doonen haft. Wie haben uk emma Uasoak, Jehova to lowen un am to danken, wiels hee soo leeftolich to ons es (1. Chronik 29:10-13). En Matäus 6:9-13 lieed Jesus siene Nofolja bäden, daut Gott sien Nomen sull heilich jehoolen woaren (läs). Dan säd hee, daut Gott sien Rikj komen mucht un sien Wellen oppe Ieed jrod soo jedonen sull aus em Himmel. Daut ieeschte, waut Jesus en sien Jebäd säd, haud aulsoo met Gott un dän sien Väanämen to doonen, un doahinja räd hee dan von daut, waut eenem selfst fält. Wan daut en onse Jebäda daut ieeschte om Gott jeit, dan wies wie uk, daut wie nich bloos aun daut denkjen, waut wie wellen.

13. Waut sajcht de Schreft, woo lank sellen onse Jebäda sennen?

13 Woo lank saul een Jebäd sennen? En de Schreft sajcht daut nuscht doaräwa. Daut es doano, aus wie auleen ooda met aundre toop bäden. Wan wie verem äten bäden, es daut veleicht nich soo lank, aus wan wie ons ver Jehova utschedden (1. Samuel 1:12, 15). Jesus veuadeeld soone Menschen, waut derch äare lange Jebäda wiesen wullen, woo rajcht see wieren (Lukas 20:46-47). Von soone Jebäda helt Jehova nuscht. Onse Jebäda sellen opprechtich sennen. Dan woat Jehova Gott dee uk aunnämen, endoont aus dee lank sent ooda kort.

Jehova kaun ons emma hieren, wan wie bäden

14. Waut meent daut, wan daut en de Schreft sajcht, wie sellen “aunhoolent” bäden? Fa waut sent wie dankboa?

14 Woo foaken sell wie bäden? De Schreft sajcht: “Jäft nich no met bäden.” Daut sajcht uk, wie sellen “aunhoolent”  un “emma” bäden (Efeesa 6:18; Reema 12:12; Lukas 18:1). Daut bediet nich, daut wie dän tietäwa bäden sellen, oba no de Schreft no sell wie daut pinkjlich doonen un Jehova emma wada danken, daut hee soo leeftolich to ons es. Wie sellen uk bäden, wan ons Troost fält ooda wan wie Help un Rot brucken. Frei wie ons nich, daut wie emma kjennen to Jehova bäden, soo foaken un soo lang aus wie wellen? Wan wie werkjlich dankboa doafäa sent, woa wie ons uk emma Tiet nämen doatoo.

15. Wuarom sell wie “Amen” sajen, wan wie fa ons auleen ooda met aundre toop bäden?

15 Wuarom sell wie opp Enj von een Jebäd “Amen” sajen? “Amen” meent “secha” ooda “soo saul daut sennen”. En de Schreft woat ons jewäsen, daut daut fein es, opp Enj von een Jebäd “Amen” to sajen, krakjt endoont aus eena fa sikj auleen bät ooda met aundre toop äwa ludes (1. Chronik 16:36; Psalm 41:14). Wan wie fa ons auleen bäden un dan “Amen” sajen, wies wie, daut wie daut iernst meenen. Wan wie met aundre toop bäden un dan opp stelles ooda opp ludes “Amen” sajen, wies wie, daut wie met daut Jebäd envestonen sent (1. Korinta 14:16).

WOO BEAUNTWUAT GOTT ONSE JEBÄDA?

16. Wuarom kjenn wie ons doaropp veloten, daut Jehova Jebäda hieet?

16 Horcht Jehova werkjlich no Jebäda? Jo, dee deit. Wie kjennen ons gaunz secha sennen, daut Gott de Jebäda von opprechtje Menschen beauntwuat, wiels en de Schreft sajcht daut von am: “Du hieescht onse Jebäda” (Psalm 65:3). Oba woo hee dee beauntwuat, kaun gaunz veschieden sennen.

17. Woo brukt Jehova de Enjel un siene Deena, wan doa wäa om Help bät?

17 Jehova hieet onse Jebäda un halpt ons derch siene Enjel  ooda derch de Menschen, waut am deenen (Hebräa 1:13-14). Aul foaken haft doa wäa to Gott jebät, daut dee de Schreft bäta vestonen wull, un daut dieed nich lang, dan wort dee von Jehova siene Deena jeholpen. Soont wiest, daut de Enjel Gott siene Deena aunleiden, wan dee daut Kjennichrikj prädjen (Openboarunk 14:6). Wan wie en eene schwoare Loag sent un bäden, kaun Jehova ons uk doaderch halpen, daut onse Gloowesbreeda ons biestonen (Spricha 12:25; Jakobus 2:16).

Wan wie to Jehova bäden, kaun dee ons doaderch halpen, daut Gloowesbreeda ons biestonen

18. Woo beauntwuat Jehova Jebäda derch sien Wuat un derch dän heiljen Jeist?

 18 Jehova Gott beauntwuat de Jebäda von siene Deena uk derch sienen heiljen Jeist un derch de Schreft. Biejlikj wan ons waut daut Läwen schwoa moakt un wie to Jehova bäden, kaun dee ons met sienen heiljen Jeist stoakjen un ons Weisheit jäwen (2. Korinta 4:7). Wan wie Gott no Weisheit froagen, wiels wie daut rajchte doonen wellen, beauntwuat dee daut foaken derch Varzh ut sien Wuat. Soone Varzh kjenn wie finjen, wan wie de Schreft studieren ooda Bieekja läsen, waut dee utlajen, biejlikj soon Buak aus dit. Daut kaun uk sennen, daut wie en de Vesaumlunk waut hieren ooda daut een leeftolja Eltesta ons aun waut ut de Schreft denkjen halpt, wuaderch Gott ons Jebäd beauntwuat (Galata 6:1).

19. Waut sell wie bedenkjen, wan sikj ons daut soo späat, aus wan Gott nich no onse Jebäda horcht?

19 Uk wan sikj daut eenjemol soo späat, daut Jehova nich fuaz no onse Jebäda horcht, bediet daut nich, daut dee daut nich kaun. Wie motten emma doaraun denkjen, daut Jehova Jebäda soo beauntwuaten deit, aus hee daut well un dan, wan hee sitt, daut daut de rajchte Tiet es. Hee weet väl bäta aus wie selfst, waut ons fält un woo hee ons daut jäwen kaun. Oba foaken lat hee ons emma wada froagen, sieekjen un aunkloppen, bat hee onse Jebäda beauntwuat  (Lukas 11:5-10). Wan wie en onse Jebäda aunhoolent bliewen, kaun hee seenen, daut wie daut iernst meenen un daut wie eenen stoakjen Gloowen haben. Veleicht woa wie uk goanich emma fuaz en, wan Jehova onse Jebäda beauntwuat. Wan wie wäajen jewesse Trubbels bäden, woat hee ons dee veleicht nich wajchnämen, oba hee halpt ons, met dee foadich to woaren (läs Jesaja 12:2).

20. Wuarom sell wie pinkjlich bäden?

20 Jehova es de aulmajchtja Schepfa un doch horcht hee leeftolich no aul dee, waut oppe rajchte Oat to am bäden (läs Psalm 145:18). Es daut nich scheen to weeten? Wan wie werkjlich dankboa sent, daut wie to am bäden kjennen, woa wie ons uk pinkjlich Tiet nämen doatoo. Un soo kjenn wie Jehova, dee onse Jebäda hieet, emma noda komen.