Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Waut lieet de Schreft werkjlich?

 DAUT 16. KAPITEL

Fa dän rajchten Gloowen enstonen

Fa dän rajchten Gloowen enstonen
  • Saul eena Bilda brucken toom Gott aunbäden?

  • Woo denkjen Christen äwa de Heljedoag?

  • Woo kaust du aundre leeftolich dietlich moaken, waut du jleefst?

1-2. Wuarom rieekjt daut nich too, bloos ut dän faulschen Gloowen ruttogonen? Un wuarom es daut soo iernst?

STAL die mol väa, doa haft wäa plietsch Jeft en dienen Borm jegoten. Wan du von daut Wota drinkjst, kust du stoawen. Waut wurscht du doonen? Secha wurscht du daut ieeschte seenen, wua du reinet Wota towäaj kjrieechst. Oba doawäajen wurscht du noch emma beduaren, aus du nich aul vejeft wieescht.

2 Biejlikj soo es daut met dän faulschen Gloowen. No de Schreft no es dee orrein wäajen daut faulsche, waut doa jelieet un jedonen woat (2. Korinta 6:17). Doawäajen es daut soo eene iernste Sach, ut daut “groote Babel”, daut meent utem faulschen Gloowen, ruttogonen (Openboarunk 18:2, 4). Wan du daut aul jedonen hast, es daut sea fein. Daut rieekjt oba nich too, bloos doa ruttogonen, wiels eena wudd doawäajen noch kjennen waut met dän faulschen Gloowen to doonen haben. Woo dan?

BILDA UN VÄAFOAREN VEIEREN

3. (a) Waut sajcht daut en de Schreft von Bilda, waut to de Aunbädunk jebrukt woaren? Wuarom es daut fa eenje schwoa, daut entoseenen? (b) Waut saul eena doonen, wan eena noch Sachen haft, waut met dän faulschen Gloowen to doonen haben?

3 Eenje Menschen haben aul joarenlank Aultoaren ooda  Bilda en äa Hus, waut to de Aunbädunk jebrukt woaren. Wan du daut nich aundasch kjanst, späat sikj die daut veleicht framd ooda nich rajcht, doaronen to Gott to bäden. Woomäajlich sent die dee väl wieet. Oba es nich Gott deejanja, waut daut Rajcht haft to sajen, woo wie am aunbäden sellen? No de Schreft no well hee nich, daut wie doatoo Bilda ooda Aufjetta brucken (läs 2. Mose 20:4-5; Psalm 115:4-8; Jesaja 42:8; 1. Johanes 5:21). Wan du noch soone Sachen hast, waut met dän faulschen Gloowen to doonen haben, motst du dee aufschaufen. Doaderch, daut du daut deist, kaust du fa dän rajchten Gloowen enstonen. Fa soone Sachen mott wie krakjt soonen Aufschu haben, aus Jehova haft (5. Mose 27:15).

4. (a) Wuarom halpt daut nuscht, de Väafoaren to veieren? (b) Wuarom haft Gott siene Deena daut gaunz veboden, Hakjsarie to driewen?

4 Bie väle faulsche Gloowes haben dee daut uk soo, daut dee äare Väafoaren veieren. Ea eenje de Woarheit von ut de Schreft kjanen lieeden, jleewden dee, daut de Vestorwne en eene Jeistawelt läwden un an halpen ooda an schoden kunnen. Doawäajen haben dee väl jedonen, om äare vestorwne Väafoaren  tofräd to stalen. Oba soo aus wie en daut saste Kapitel en dit Buak jelieet haben, weeten de Doodje nuscht un läwen uk nich irjentwua wieda. Aulsoo es daut vejäfs, wan doa wäa vesieekjt, met dee to räden. Eenje meenen, daut dee von de Vestorwne eene Norecht jekjräajen haben, oba en Werkjlichkjeit es dee von de beese Jeista. Doawäajen jroz haud Jehova de Israeliten daut gaunz aufjesajcht, Hakjsarie to driewen ooda vesieekjen, met de Doodje to räden (läs 5. Mose 18:10-12).

5. Waut kaust du doonen, wan du bat nu Bilda jebrukt hast ooda diene Väafoaren veieet hast?

5 Waut, wan du bat nu Bilda jebrukt hast, om Gott auntobäden, ooda diene Väafoaren veieet hast? Dan wudd daut fein sennen, die daut en de Schreft to unjastonen, woo Gott doaräwa denkjt. Bäd jieda Dach to Jehova un saj dän, du west daut rajchte doonen un du west äwa aules soo denkjen, aus hee deit (Jesaja 55:9).

IEESCHTEMMA DEEDEN CHRISTEN NICH WIENACHTEN HOOLEN

6-7. (a) Wuarom hoolen de Menschen jeweenlich Wienachten? Deeden Jesus siene Jinja ieeschtemma Wienachten hoolen? (b) Woo dochten de Christen ieeschtemma äwa Jeburtsdach fieren?

6 Noch waut, waut fa Gott siene Deena eene Jefoa sennen kaun, sent de Heljedoag, waut met dän faulschen Gloowen to doonen haben. Biejlikj Wienachten. En de mieeschte Gloowes, waut sikj christlich nanen, woat Wienachten jehoolen, wiels de Menschen jleewen, daut daut de Dach es, wua Jesus jebuaren es. Oba noanich sajcht daut, daut de Christen ieeschtemma soonen Heljedach hauden. En een Buak heet daut: “En de tweehundat Joa no Jesus siene Jeburt wist kjeena jeneiw, aun waut fa eenen Dotem Jesus jebuaren wia, un de mieeschte wia daut uk endoont” (Sacred Origins of Profound Things).

7 Nich mol wan Jesus siene Jinja dän Dotem jewist hauden, wudden see dän sienen Jeburtsdach jefieet haben. Wuarom nich? Wiels, soo aus daut en een Buak sajcht, hilden de Christen  ieeschtemma “Jeburtsdach fieren fa waut, waut bie de Heiden Mood wia” (The World Book Encyclopedia). En de Schreft läs wie bloos von twee Menschen, waut Jeburtsdach fieeden, un daut wieren beides Harscha, waut nich Jehova aunbäden deeden (1. Mose 40:20; Markus 6:21). De Heiden deeden uk dän Jeburtsdach von äare Jetta fieren. Biejlikj dän 24. Mei fieeden de Reema dän Jeburtsdach von de Jettin Diana. Dän näakjsten Dach hilden dee dän Jeburtsdach von äaren Gott Apollo. Wie kjennen seenen, daut Jeburtsdach fieren ieeschtemma waut wia, waut bloos de Heiden deeden un nich de woare Christen.

8. Wuarom haft Jeburtsdach fieren met Äwagloowen to doonen?

8 Daut jeef oba noch waut, wuawäajen de Christen ieeschtemma nich wudden haben Jesus sienen Jeburtsdach jefieet. Jeburtsdach fieren haud met Äwagloowen to doonen un daut haben dee secha jewist. Väle Griechen un Reema ieeschtemma jleewden biejlikj, daut daut fa jieda Mensch eenen Jeist jeef, waut von dän siene Jeburt aun bie dän wia, un sien gaunzet Läwen lank no dän oppaust. “Dis Jeist wia jeheemnisvoll met dän Gott vebungen, waut aun dän Dach joarich wia, aus dis Mensch jebuaren wort,” heet daut en een Buak (The Lore of Birthdays). Woo wudd Jehova doaräwa denkjen, wan wie een Fast fieeden, waut met Äwagloowen to doonen haud, un dan noch säden, daut wia fa Jesus? Daut wudd dän sea schlajcht jefaulen (Jesaja 65:11-12). Oba woo kjemt daut dan, daut soo väl Menschen Wienachten hoolen?

WUA WIENACHTEN HÄAKJEMT

9. Woo kjeem daut, daut de 25. Dezamba fa Jesus sienen Jeburtsdach jehoolen wort?

9 Een poa hundat Joa no Jesus sienen Doot wort daut Mood, dän sienen Jeburtsdach dän 25. Dezamba to fieren. Oba Jesus es goanich aun dän Dach jebuaren; daut wia woomäajlich em Oktooba. * Wuarom fieeden dee daut dan dän 25. Dezamba?  Veleicht wullen eenje, waut sikj lota Christen nanden, jieren haben, daut Jesus sien Jeburtsdach “met dän Dotem äwareen wia, aun dän de Reema een heidnischet Fast fieeden, dän ‘Jeburtsdach von de Sonn’” (The New Encyclopædia Britannica). Em Winta, wan de Sonn aum weinichsten schienen deed, eewden de Heiden aulahaunt ut, om de Sonn trigjtoholen, daut daut wada woama un dacha wort. Dän 25. Dezamba fieeden dee dan een Fast, wiels see dochten, de Sonn kjeem nu trigj von äare lange Reis. Gloowesleidasch, waut Heiden bekjieren wullen, neemen dit Fast en äaren Gloowen opp un dreiden daut soo, aus wan daut een christlichet Fast wia. *

10. Wuarom wia Wienachten fieren opp eenje Städen eene Tietlank veboden?

10 Daut es aul lang bekaunt, daut Wienachten von de Heiden häakjemt. Doawäajen wia dit Fast ojjefäa 400 Joa trigj en Enjlaunt un en eenje Prowinsen enne Stäts veboden. Wan doa wäa aune Wienachten nich oppe Oabeid jinkj, must dee doafäa aul Strof tolen. Oba een Stootje lota deeden de Menschen wada Wienachten fieren soo aus ieescht, un doa kjeemen noch aundre Sitten too. Daut wort wada een groota Heljedach un soo es daut bat vondoag en väle Lenda. Oba wäa Gott jefaulen well, fieet nich Wienachten uk nich aundre Heljedoag, waut von dän faulschen Gloowen häakomen. *

 HELT SIKJ DAUT JLIKJ, VON WUA DAUT HÄAKJEMT?

11. Wuarom jleichen väle daut, Heljedoag to hoolen? Waut saul fa ons daut ieeschte sennen?

11 Eenje weeten, daut väle Heljedoag, soo aus Wienachten, von dän faulschen Gloowen häastaumen, un doch fieren dee dee. Oba de mieeschte Menschen denkjen doa goanich äwa no, aus een Heljedach waut met dän faulschen Gloowen to doonen haft ooda nich. Fa dee es daut bloos eene scheene Tiet, wua de gaunze Famielje toopkjemt. Jeit die daut uk soo? Felt die daut schwoa, en dän Stekj fa dän woaren Gloowen entostonen? Daut es je secha nich, wiels de faulscha Gloowen die soo väl wieet es, daut es mea, wiels du dien Frintschoft väl räakjenst. Un Jehova haft je de Famielje jeschaufen un hee well uk, daut wie ons met dee aula eenich sent (Efeesa 3:14-15). Oba daut kjenn wie uk, onen daut wie waut doonen, waut Gott nich jefelt. Paulus schreef, waut bie ons daut ieeschte sennen saul: “Prooft daut to lieren un to doonen, waut däm Harn jefelt” (Efeesa 5:10).

Wurscht du een Kende oppäten, waut mankem Mest jefollen es?

12. Wuarom sell wie nich Heljedoag hoolen, waut von dän faulschen Gloowen häakomen? Met waut kjenn wie daut vejlikjen?

12 Väle jleewen veleicht, daut vondoag Heljedoag nich ut dän Senn jefieet woaren, waut ieeschtemma, un daut sikj daut jlikj helt, von wua dee häakomen. Oba es daut werkjlich soo? Stal die väa, du sitst een Kende mankem Mest ligjen. Wurscht du daut nämen un oppäten? Secha nich. Uk wan daut no scheenschmakjen lat, es daut oba schwiensch. Krakjt soo kaun ons daut no scheengonen loten, Heljedoag hoolen, oba wan wie doaräwa nodenkjen, von wua dee häakomen, woat ons kloa, daut dee väl orreinet aun sikj haben. Wan wie Gott rajcht deenen wellen, mott wie daut doonen, waut de Profeet Jesaja säd: “Schieet nuscht orreinet aun” (Jesaja 52:11).

WAN AUNDRE HELJEDOAG HOOLEN

13. Wuarom es daut nich emma leicht, wan wie de Heljedoag nich hoolen?

13 Daut es nich emma leicht, ons gaunz von de Heljedoag  auftohoolen. Veleicht kjennen diene Poatna oppe Oabeit daut nich vestonen, wuarom du de Heljedoag nich metmoakst. Un waut, wan die wäa waut to Wienachten schenkjen well? Wudd daut rajcht sennen, daut auntonämen? Waut, wan dien Ehepoatna nich dänselwjen Gloowen haft waut du? Un waut kaun eena doonen, daut de Kjinja nich truarich sent, wan aule aundre Heljedoag hoolen?

14-15. Waut kjenn wie doonen, wan ons wäa scheene Heljedoag wenscht ooda ons waut schenkjen well?

14 Woo eena sikj vehoolen saul, es gaunz doano, woo de Omstend sent. Wan ons biejlikj irjentwäa eene scheene Wienachten wenscht, kjenn wie eefach dankscheen sajen. Oba wan ons daut een Bekaunda ooda een Poatna oppe Oabeit säd, wudd wie dän daut veleicht kjennen dietlich moaken, wuarom wie nich Heljedoag hoolen. Daut well wie oba emma heeflich doonen. Enne Schreft woat ons dän Rot jejäft: “Jun räden saul emma leeftolich un intressaunt sennen. Bemieecht junt, eenen jiedren soo to auntwuaten, daut daut goot fa am es” (Kolossa 4:6). Wie wellen aundre nich beleidjen. Wie wellen, daut dee vestonen, daut wie nuscht doajäajen haben, met aundre toop to sennen un ons unjarenaunda to beschenkjen, bloos nich aun soone Heljedoag.

15 Waut doo wie, wan ons wäa waut schenkjen well? Daut es uk doano, woo de Omstend sent. Veleicht sajcht wäa: “Ekj weet, jie haben daut goanich soo met de Heljedoag. Oba ekj well die dit doawäajen schenkjen.” Wie wudden daut veleicht kjennen aunnämen, wiels doamet wudd je wie nich dän Heljedach metmoaken. Wan oba deejanja, waut ons waut schenkjen well, nich weet, woo wie daut haben, dan kjenn wie dän daut dietlich moaken, waut wie jleewen. Wie wellen je, daut dee vestonen kaun, wuarom wie am en dise Tiet nuscht schenkjen, uk wan wie sien Jeschenkj veleicht aunnämen. Wan ons oba wäa waut schenkjen well, bloos om ons auftoproowen ooda to wiesen, daut ons Jeschenkja wichtja sent aus ons Gloowen, wudd wie daut leewa nich aunnämen.

 MET ONSE VEWAUNTE RAJCHT OMGONEN

16. Woo kjenn wie met onse Vewaunte rajcht omgonen, wan daut om Heljedoag jeit?

16 Waut, wan wäa en ons Frintschoft eenen aundren Gloowen haft? Uk dan mott wie heeflich sennen. Doa brukt goanich jiedatsmol doajäajen jerät, wan dee wellen Heljedach hoolen. Dee haben de Frieheit, to doonen un to jleewen, waut dee wellen. Wie wellen je uk, daut dee ons de Frieheit doatoo loten (läs Matäus 7:12). Wan daut om waut jeit, waut nuscht met Heljedoag hoolen to doonen haft, bruck wie nich too neiw sennen. Wie woaren oba nuscht nich doonen, met waut wie eenen Heljedach wudden metmoaken. Bie aules, waut wie doonen, well wie een reinet Jewessen haben (läs 1. Timotäus 1:18-19).

17. Waut kjennen Elren doonen, daut äare Kjinja daut nich domm jeit, wan aule aundre Heljedoag hoolen?

17 Waut kjennen Elren doonen, daut äare Kjinja nich truarich sent, wan aule aundre Heljedoag hoolen? Dee motten doano seenen, daut see de Kjinja to eene aundre Tiet em Joa eene Freid moaken. Eenje Famieljes sieekjen sikj eenen Dach ut, wua see äare Kjinja waut schenkjen. Oba daut baste, waut Elren äare Kjinja schenkjen kjennen, es, wan dee dee väl räakjnen un sikj Tiet fa dee nämen.

FA DÄN WOAREN GLOOWEN ENSTONEN

Wan wie Gott rajcht deenen, woat ons daut opp iernst scheen gonen

18. Woo kjennen ons de Vesaumlungen halpen, fa dän woaren Gloowen entostonen?

18 Om Gott to jefaulen, mott wie gaunz von dän faulschen Gloowen wajchbliewen un fa dän rajchten Gloowen enstonen. Woo kjenn wie daut doonen? En de Schreft heet daut: “Well wie toophoolen un ons unjarenaunda aunspornen, en goode Woakjen, Leew to bewiesen. Vonne Vesaumlungen wajch bliewen, soo aus eenje doonen, daut well wie nich, oba väl leewa ons unjarenaunda Moot toospräakjen. Un daut es wichtich,  wiels de latsta Dach noda kjemt, soo aus jie seenen kjennen” (Hebräa 10:24-25). De Vesaumlungen sent scheene Jeläajenheiten, wua wie Gott soo aunbäden kjennen, aus hee daut haben well (Psalm 22:23; 122:1). Bie dise Vesaumlungen spräakj wie ons eena dän aundren Moot too (Reema 1:12).

19. Wuarom sell wie aundre von daut vetalen, waut wie ut de Schreft jelieet haben?

19 Woo kaust du noch fa dän rajchten Gloowen enstonen? Daut kaust du doaderch, daut du aundre von daut vetalst, waut du met de Help von Jehova siene Zeijen ut de Schreft jelieet hast. Wie läwen en eene beese Welt un daut jeft väle Menschen, waut sikj tieren un waut äwa aul daut oppscheiselje stänen, waut passieet. Veleicht kjanst du uk soone Menschen. Wudd daut nich fein sennen, met dee äwa de scheene Hopninj ut de Schreft to räden? Wan du dit deist un die met Gott siene Deena vesaumelst, woascht du die emma weinja no daut trigjbangen, waut met dän faulschen Gloowen to doonen haft. Du kaust die doaropp veloten, daut du woascht sea jesäajent woaren un daut die daut woat scheen gonen, wan du fa dän rajchten Gloowen ensteist (Maleachi 3:10).

^ Varsch 9 En dän Artikjel “Es Jesus em Dezamba jebuaren?” em Aunhank von dit Buak jeit noch mea doaräwa notoläsen.

^ Varsch 9 Vom 17. bat dän 24. Dezamba hauden de Reema uk noch een aundret Fast, un daut wia fa dän Aufgott fa de Akarie. Doa deeden dee fräten un supen un sikj unjarenaunda beschenkjen. Daut wia uk noch eent, wuarom de 25. Dezamba fa Wienachten jenomen wort.

^ Varsch 10 En dän Artikjel “Sell wie Heljedoag hoolen?” em Aunhank von dit Buak jeit noch von mea Heljedoag notoläsen, waut woare Christen doavon hoolen.