Trigj nom Enhault

No de Enhaultslist gonen

 AUNHANK

Waut es de Jerechtsdach?

Waut es de Jerechtsdach?

WOO stalst du die daut latste Jerecht ooda dän Jerechtsdach väa? Väle jleewen, daut aun janen Dach millionende Menschen ver dän Rechtastool komen motten, om aula eenselwies von Gott jerecht to woaren. Eenje woaren de Seelichkjeit kjrieen, un de aundre de eewje Vedaumnis. Oba en de Schreft woat de Jerechtsdach aundasch beschräwen. Daut es nich eene Tiet, fa dee eena Angst haben mott, daut es eene scheene Tiet, wiels dan woat aules wada soo woaren, aus Gott daut von Aunfank aun wull.

En Openboarunk 20:11-12 schrift de Apostel Johanes äwa dän Jerechtsdach: “Ekj sach een grooten, witten Troon un dän, dee doabowen saut. Himmel un Ieed fluagen von am wajch un wieren nich mea to finjen. Un ekj sach de Doodes, kjlien un groot, ver Gott un dän Troon stonen, un doa worden Bieekja opjemoakt. Dan wort noch een Buak opjemoakt, un daut wia daut Läwensbuak. Un de Doodes  worden doano jerecht, waut en dee Bieekja von äare Woakjen jeschräwen stunt.” Wäa es daut, waut de Menschen hia rechten deit?

Jehova Gott es de hechsta Rechta. Oba hia deit hee nich selfst rechten. En Aposteljeschicht 17:31 schrift Paulus, Gott “haft een Dach bestemt, aun dän hee de Welt met Jerajchtichkjeit rechten well, derch een Maun, dän hee doatoo jewält haft.” Dän, waut sikj Jehova aus Rechta jewält haft, es Jesus Christus, dän hee vom Doot oppjewakjt haft (Johanes 5:22). Wanea woat de Jerechtsdach sennen? Woo lang woat dee dieren?

Soo aus daut en de Openboarunk jewäsen woat, fangt de Jerechtsdach no dän Kjrich von Harmagedon aun, wan dän Soton siene Welt ieescht venicht es (Openboarunk 16:14, 16; 19:19-20:3). * No Harmagedon woaren de Soton un de beese Jeista fa dusent Joa en eenen Aufgrunt bemoakt sennen. En dän Tiet woaren de 144 000 Metoawen Rechta sennen un “met Christus toop 1.000 Joa” em Himmel rejieren (Openboarunk 14:1-3; 20:1-4; Reema 8:17). De Jerechtsdach es nich een Dach von 24 Stund, wua schwind von ojjefäa jerecht woat. Dee woat dusent Joa dieren.

En dise dusent Joa woat Jesus Christus “de Läwendje un de Doodje rechten” (2. Timotäus 4:1). Met “de Läwendje” es de groote Häad Menschen jemeent, waut Harmagedon äwaläwen woaren (Openboarunk 7:9-17). De Apostel Johanes sach uk de Doodes ver dän Troon stonen, om jerecht to woaren. Jesus säd verut, “daut aul dee, dee en de Jräwa ligjen, [Jesus] siene Stemm hieren woaren. See woaren dan verendach komen”, daut meent vom Doot oppstonen (Johanes 5:28-29; Aposteljeschicht 24:15). No waut woaren dee aula jerecht?

Johanes sach, daut “Bieekja opjemoakt” worden, “un de Doodes worden doano jerecht, waut en dee Bieekja von äare Woakjen jeschräwen stunt” (Openboarunk 20:12). Sent doabennen de Sinden oppjeschräwen, waut de Menschen ver äaren Doot jedonen haben, un woaren dee doano jerecht? Nä, wiels en de Schreft sajcht daut: “Wäa jestorwen es, es frie von Sind” (Reema 6:7). Derch dän Doot sent dee äare Sinden aula utjestrikjt. Aulsoo mott  en de Bieekja waut jeschräwen sennen, waut Gott von de Menschen dan velangen woat. Dee, waut Harmagedon äwaläwen, un aul dee, waut vom Doot oppstonen, motten sikj aun Gott siene Jebooten hoolen, uk aun dee Jebooten, waut Jehova veleicht en de dusent Joa noch jäwen woat, sest kjennen dee nich eewich läwen. Jieda eena woat no daut jerecht woaren, waut dee aun dän Jerechtsdach doonen woat.

Millionende Menschen woaren aun dän Jerechtsdach toom ieeschte Mol to hieren kjrieen, waut Gott haben well, un daut dan uk doonen kjennen. Dee woaren aula motten belieet woaren. De Menschen woaren dan lieren, “waut rajcht es” (Jesaja 26:9). Oba nich aula woaren daut uk doonen wellen. Daut heet en Jesaja 26:10: “De gottloosa lieet doa nich von, wan du jnädich to an best; uk en een goodet Launt deit hee orrajcht un sitt nich woo harlich du, HAR, best.” Soone schlajchte Menschen woaren aun dän Jerechtsdach fa emma äwatsied jeschauft woaren (Jesaja 65:20).

Wan de Jerechtsdach ieescht derch es, woaren aule Menschen “toom Läwen” jekomen sennen, aulsoo volkomen sennen (Openboarunk 20:5). Daut bediet, daut aum Jerechtsdach de Menschheit wada soo woat, aus Gott sikj daut von Aunfank aun väajenomen haft (1. Korinta 15:24-28). Tolatst woaren dee noch aula oppe Proow jestalt woaren. De beesa Fient woat ut dän Aufgrunt loosjeloten woaren un woat noch eemol de Jeläajenheit haben, de Menschen to veleiden (Openboarunk 20:3, 7-10). Deejanje, waut dan tru bliewen, woaren daut kjennen beläwen, waut en Psalm 37:29 verutjesajcht es: “De jerajchte woaren daut Launt oawen un eewich doabennen bliewen.” Fa aule Menschen, waut Jehova jehuarsom sent, woat de Jerechtsdach werkjlich een Säajen sennen!

^ Varsch 2 Von Harmagedon jeit noch mea notoläsen opp de Sieden 1059-1060 en daut 1. Buak von Einsichten über die Heilige Schrift un opp de Sieden 1077-1079 en daut 2. Buak von Einsichten über die Heilige Schrift un opp de Sieden 12-19 en daut Heft Blieft waka!. Dise Bieekja sent bie Jehova siene Zeijen to haben.