Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Waut lieet de Schreft werkjlich?

 DAUT 8. KAPITEL

Waut es Gott sien Kjennichrikj?

Waut es Gott sien Kjennichrikj?
  • Waut sajcht de Schreft äwa Gott sien Kjennichrikj?

  • Waut woat Gott sien Kjennichrikj doonen?

  • Wanea woat derch daut Kjennichrikj Gott sien Wellen oppe Ieed jedonen woaren?

1. Von waut fa een besondret Jebäd kjenn wie väl lieren?

MILLIONENDE Menschen äwa de gaunze Ieed kjanen daut “Unser Vater”. Derch dit Jebäd wees Jesus siene Jinja, woo see bäden kunnen. Daut, waut Jesus en dit Jebäd säd, halpt ons bäta vestonen, waut de Schreft werkjlich lieet. Well wie mol seenen, waut wie doavon lieren kjennen.

2. Om waut sullen Jesus siene Jinja bäden?

2 Aus Jesus daut Volkj bäden lieed, säd hee: “Doawäajen sell jie soo bäden: Ons Voda em Himmel! Dien Nomen saul heilich jehoolen woaren. Lot dien Rikj komen. Lot dien Wellen oppe Ieed jrod soo jedonen woaren aus em Himmel” (Matäus 6:9-13). Waut meend Jesus met dit aula?

3. Waut mott wie äwa Gott sien Rikj weeten?

3 Wie haben aul jelieet, daut Gott sien Nomen Jehova es un waut dee bediet. Wie haben uk aul jeseenen, waut dän sien Wellen es, aulsoo waut dee sikj met de Ieed un met de Menschen väajenomen haft. Oba waut meend Jesus, aus hee säd: “Lot dien Rikj komen”? Waut es Gott sien Rikj ooda Kjennichrikj? Woo woat Gott sien Nomen jeheilicht woaren, wan daut Rikj kjemt? Un woo woat derch dit Rikj Gott sien Wellen jedonen woaren?

 WAUT ES GOTT SIEN KJENNICHRIKJ?

4. Waut es Gott sien Kjennichrikj, un wäa es de Kjennich?

4 Gott sien Kjennichrikj es eene Rejierunk. Jehova Gott haft dee oppjestalt, un hee haft Jesus Christus doatoo aus Kjennich jewält. Dee haft väl mea Macht, aus aule Harscha hia oppe Ieed haben. Enne Schreft woat hee “Har äwa aule Haren, un Kjennich äwa aule Kjennichs” jenant (Openboarunk 17:14). Doawäajen kaun hee väl mea goodet doonen aus sest irjent een Harscha oppe Ieed.

5. Wua es Gott sien Kjennichrikj? Äwa waut woat daut rejieren?

5 Wua es Gott sien Kjennichrikj? Daut es em Himmel, wiels Jesus es je de Kjennich, un nodäm daut dee vom Doot oppjestonen wia, fua dee nom Himmel (Aposteljeschicht 2:33). Doawäajen woat daut en de Schreft uk “himlischet Rikj” jenant (2. Timotäus 4:18). Daut Kjennichrikj es em Himmel, oba daut woat äwa de Ieed rejieren (läs Openboarunk 11:15).

6-7. Wuarom es Jesus een besondra Kjennich?

6 Wuarom es Jesus een besondra Kjennich? Eemol, wiels dee nich stoaft. Menschliche Kjennichs stoawen, oba Jesus es onstoaflich. De Schreft sajcht, daut sien “Läwen . . . nich kaputt to moaken es” (Hebräa 7:16). Wiels hee eewich läft, woat aul daut goode, waut hee deit, fa emma un eewich bestonen. Un hee woat sea väl goodet doonen!

7 Äwa Jesus wort verutjesajcht: “Opp däm woat däm HARN sien Jeist komen, een Jeist met Weisheit un Vestentnis, een Jeist met Rot un Krauft, een Jeist dee däm HARN kjant un am ieet; däm HARN ieren woat am eene Freid sennen. Hee woat nich bloos doano rechten aus waut hee sitt ooda hieet, hee woat de oame met een jerajchtet Jerecht rechten un de stelle woat hee daut äaje jäwen” (Jesaja 11:2-4). Jesus woat aulsoo een jerajchta un metfeelenda Kjennich äwa de Menschen oppe Ieed sennen. Wensch wie ons nich aula soo eenen Harscha?

8. Wäa woat met Jesus toop rejieren?

 8 De Schreft sajcht uk, daut Jesus nich auleen harschen woat. Hee woat met aundre toop rejieren. De Apostel Paulus säd eemol to Timotäus: “Wan wie jeduldich uthoolen, sell wie met am toop rejieren” (2. Timotäus 2:12). Paulus, Timotäus un aundre true Christen, waut Gott utjewält haft, woaren met Jesus toop em Himmel rejieren. Woo väl woaren daut sennen?

9. Woo väl woaren met Jesus toop rejieren? Wanea funk Gott aun, deejanje uttowälen?

9 Soo aus wie en daut säwende Kapitel jeläst haben, sach de Apostel Johanes “daut Laum [Jesus Christus] opp däm Zions Boajch stonen [aus Kjennich em Himmel], un met am 144.000, dee sien Nomen uk sien Voda sien Nomen opp äare Stierns jeschräwen hauden.” Wäa sent de 144 000? Johanes sajcht, daut sent dee, waut “daut Laum hinjaraun [gonen], wuaemma daut hanjeit. Dee sent von mank de Menschen loosjekoft aus Ieeschtlinjsfrucht fa Gott un daut Laum” (Openboarunk 14:1, 4). Daut sent true Nofolja von Jesus Christus un sent uzhent doatoo utjewält, met Jesus toop äwa de Ieed to harschen. Dee woaren vom Doot toom Läwen em Himmel oppjewakjt un woaren “met am toop rejieren” (Openboarunk 20:6). Gott haft en de Aposteltiet doamet aunjefongen, de 144 000 von manke true Christen uttowälen.

10. Wuarom es daut von Jehova soo leeftolich, daut dee Jesus un de 144 000 bestemt haft toom äwa de Menschen rejieren?

10 Woo leeftolich es Jehova doch to de Menschen, daut hee Jesus un de 144 000 bestemt haft, äwa an to rejieren. Jesus weet krakjt, waut daut bediet, een Mensch to sennen un to lieden. Paulus säd von Jesus: “Wie haben nich eenen Huagenpriesta, dee nich met onse Schwakheiten metfeelen kaun, oba eenen, dee en aules krakjt soo vesocht worden es aus wie sent, oba onen to sindjen” (Hebräa 4:15;  5:8). Uk de 144 000 haben oppe Ieed jeläden un haben daut jeduldich jedroacht. Dee weeten, waut daut bediet, onvolkomen to sennen un krank to woaren. Doawäajen kjennen dee vestonen, met waut de Menschen to kjamfen haben.

WAUT WOAT GOTT SIEN KJENNICHRIKJ DOONEN?

11. Wuarom lieed Jesus siene Jinja doarom bäden, daut Gott sien Wellen sull em Himmel jedonen woaren?

11 Jesus säd uk noch, siene Jinja sullen doarom bäden, daut Gott sien Wellen sull “oppe Ieed jrod soo jedonen woaren aus em Himmel.” Em Himmel, doa wua Gott es, haben de true Enjel aul emma dän sienen Wellen jedonen. Oba soo aus wie en daut dredde Kapitel jeseenen haben, deed een Enjel met eemol nich mea daut, waut Gott wull, un veleid Adam un Eva toom sindjen. Soo wort dis Enjel de beesa Fient. Von dän woa wie en daut tieende Kapitel noch mea lieren. Eenje Enjel stalden sikj opp dän Fient siene Sied. Dee woaren beese Jeista jenant. Gott leet dän Soton un de beese Jeista oba noch eene wesse Tiet em Himmel bliewen. Doawäajen deeden to dee Tiet nich aule em Himmel Gott sienen Wellen. Oba wan Gott sien Kjennichrikj wudd aunfangen to rejieren, sull sikj daut endren. Jesus Christus, de Kjennich, wudd jäajen dän Fient Kjrich fieren (läs Openboarunk 12:7-9).

12. Von woone twee Sachen rät daut en Openboarunk 12:10?

12 Waut wudd dan passieren? En Openboarunk 12:10 sajcht daut: “Dan hieed ekj em Himmel eene lude Stemm sajen: Nu es onsen Gott siene Radunk, siene Krauft, sien Rikj un sien Christus siene Krauft jekomen, wiels nu es onse Breeda äa Vekjläaja [de Soton], dee an Dach un Nacht ver Gott vekloagd, rauf jeschmäten.” Hia rät daut von tweeatlei: Eemol, daut Gott sien Kjennichrikj haft aunjefongen to rejieren, aulsoo daut Jesus Christus  Kjennich es. Un dan noch, daut de Soton vom Himmel rauf oppe Ieed jeschmäten wort.

13. Woo wia daut em Himmel, aus de Fient doa ieescht wia rutjeschmäten?

13 Waut fa Foljen haud daut em Himmel? De Schreft sajcht: “Nu freit junt, jie Himmel un dee doabennen wonen!” (Openboarunk 12:12). De true Enjel freiden sikj sea, wiels de Soton un de beese Jeista nu nich mea em Himmel wieren. Em Himmel sent nu aule Jehova Gott tru un doa es Eenichkjeit un Fräd. Doa woat Gott sien Wellen aulsoo aul jedonen.

Von don, aus de Fient un de beese Jeista vom Himmel raufjeschmäten worden, jeft daut oppe Ieed väl Lieden. Oba daut woat boolt opphieren

14. Woo vehelt sikj daut nu oppe Ieed, wiels de Soton vom Himmel raufjeschmäten wort?

14 Woo vehelt sikj daut nu oba oppe Ieed? De Schreft sajcht: “Wee dee, dee opp de Ieed un opp daut Mäa wonen, wiels de beesa Fient es no junt rauf jekomen un es schrakjlich wuttent, wiels hee weet hee haft mau eene korte Tiet” (Openboarunk 12:12). De Soton es wuttent doll, daut dee es utem Himmel rutjeschmäten worden un daut dän mau eene korte Tiet blift. Doawäajen veuasoakt dee väl Lieden oppe Ieed, soo aus daut Wuat “wee” to vestonen jeft. Doavon haundelt sikj uk daut näakjste Kapitel. Woo woat dan Gott sien Kjennichrikj doafäa sorjen, daut uk hia oppe Ieed Gott sien Wellen jedonen woat?

15. Waut haft Gott met de Ieed em Senn?

15 Waut es Gott sien Wellen? Soo aus wie en daut dredde Kapitel jeseenen haben, wull Gott, daut de gaunze Ieed sull een scheenet Paradies sennen, wua de Jerajchte eewich bennen läwen kunnen. Oba de Soton brocht Adam un Eva toom sindjen un doawäajen neem sikj daut met de Ieed nich soo rom, aus Gott wull. Oba Jehova haft sienen Senn nich jeendat. Hee well noch emma, daut “de jerajchte . . . daut Launt oawen un eewich doabennen bliewen” (Psalm 37:29). Un doafäa woat Gott sien Kjennichrikj sorjen. Oba woo?

16-17. Waut lia wie ut Daniel 2:44 äwa Gott sien Kjennichrikj?

 16 En Daniel 2:44 es verutjesajcht: “To dee Tiet von dise Kjennichs woat Gott em Himmel een eewjet Rikj oppstalen. Kjeena woat daut jeemols äwamajchtjen. Daut woat aule aundre Kjennichrikjs en Bieta bräakjen un venichten, oba woat selfst opp emma bliewen.” Waut lia wie ut disen Varsch äwa daut Kjennichrikj?

17 Eemol, daut daut Kjennichrikj wudd oppjestalt woaren “to dee Tiet von dise Kjennichs”, aulsoo en eene Tiet, wan doa noch wudden aundre Rejierungen sennen. Daut sajcht uk, daut daut opp emma bliewen woat. Äwa daut woat kjeene aundre Rejierunk de Äwamacht kjrieen. Un dan sajcht daut noch, daut woat toom Kjrich komen tweschen Gott sien Kjennichrikj un de Rejierungen von dise Welt. Oba Gott sien Kjennichrikj woat jewennen un dan de eensje Rejierunk sennen. Daut woat de baste Rejierunk sennen, waut de Menschen jeemols jehaut haben.

18. Woo woat de Kjrich tweschen Gott sien Kjennichrikj un de menschliche Rejierungen jenant?

18 Enne Schreft steit noch mea äwa dän Kjrich tweschen Gott sien Kjennichrikj un de Rejierungen von dise Welt. Daut sajcht biejlikj, daut de beese Jeista verem Enj woaren Läajes vebreeden, om “de Kjennichs opp de Ieed” to veleiden un “dee to dän aulmajchtjen Gott sien grooten Dach toom Kjrich to saumlen.” Dee woaren to de Städ vesaumelt, “dee opp hebräisch Harmagedon heet” (Openboarunk 16:14, 16). Doawäajen woat de latsta Kaumf tweschen de menschliche Rejierungen un Gott sien Kjennichrikj “de Kjrich von Harmagedon” jenant.

19-20. Wuarom es daut vondoag oppe Ieed nich soo, aus Gott daut well?

19 Waut woat daut Kjennichrikj derch dän Kjrich von Harmagedon volbrinjen? Jehova Gott well je haben, de Ieed saul een scheenet Paradies sennen, wua jerajchte un  volkomne Menschen läwen, dee aula am deenen. Vondoag es daut noch nich soo, wiels de Menschen noch sindjen, krank woaren un stoawen. Oba doawäajen jroz es Jesus jestorwen, daut wie mol eewich läwen kjennen, soo aus wie en daut fefte Kapitel jeseenen haben. En Johanes sajcht je daut: “Gott seine Leew fa dise Welt es soo groot, daut hee sienen eensjen Sän jeef, daut aul dee, dee aun am jleewen, nich veloaren gonen, oba daut eewje Läwen haben” (Johanes 3:16).

20 Doa es oba noch waut, wuarom Gott sien Wellen oppe Ieed noch nich jedonen woat. Daut es, wiels väle Menschen soo schlajcht sent. Dee lieejen, sent onopprechtich un fieren een orreinet Läwen. Dee wellen goanich daut doonen, waut Gott haben well. Soone Menschen woaren en Harmagedon venicht woaren (läs Psalm 37:10). Dan sent doa uk noch de Rejierungen, dee de Menschen nich doarenn aunleiden, Gott sienen Wellen to doonen. Väle Rejierungen sent grausom, onopprechtich ooda haben nich väl to sajen. De Schreft sajcht gaunz kloa, daut “de Mensch äwa dän Mensch toom Schoden harscht” (Liera 8:9, NW).

21. Woo woat daut Kjennichrikj doafäa sorjen, daut Gott sien Wellen oppe Ieed jedonen woat?

21 No Harmagedon woat daut bloos noch eene Rejierunk jäwen, un daut es Gott sien Kjennichrikj. Daut Rikj woat doafäa sorjen, daut Gott sien Wellen jedonen woat un daut woat väl Säajen brinjen. Daut woat uk dän Fient un de beese Jeista äwatsied schaufen (Openboarunk 20:1-3). Dan woat de Menschen aul daut goode deelhauftich woaren, waut Jesus sien Opfa mäajlich muak. Wäa Gott tru blift, woat dan eewich läwen un woat uk nich mea krank woaren (läs Openboarunk 22:1-3). De Ieed woat to een Paradies jemoakt woaren. Soo woat derch daut Kjennichrikj Gott sien Wellen oppe Ieed jedonen un Gott  sien Nomen woat jeheilicht woaren. Daut bediet, daut schlieslich aule Gott sienen Nomen, Jehova, ieren woaren.

WANEA WOAT DAUT SENNEN?

22. Woo weet wie, daut daut Kjennichrikj nich kjeem, aus Jesus oppe Ieed wia ooda fuaz no sien Oppstonen vom Doot?

22 To Jesus siene Tiet wia daut Kjennichrikj noch nich jekomen, sest wudd hee to siene Jinja nich jesajcht haben, see sullen soo bäden: “Lot dien Rikj komen.” Kjeem daut dan, aus Jesus nom Himmel fua? Nä, wiels Petrus un Paulus jeewen beid to vestonen, daut no Jesus sien Oppstonen vom Doot sikj ieescht Psalm 110:1 erfellen must. Doa sajcht daut: “De HAR [Jehova] sajcht to mienen Harn: Sett bie mie to rajchte Haunt, bat ekj die ut diene Fiend eene Footbenkj moak” (Aposteljeschicht 2:32-35; Hebräa 10:12-13). Jesus must aulsoo eene jewesse Tiet wachten, bat dee ieescht Kjennich wort.

Derch daut Kjennichrikj woat Gott sien Wellen oppe Ieed jrod soo jedonen woaren aus em Himmel

23. (a) Wanea funk Gott sien Kjennichrikj aun to rejieren? (b) Waut woa wie en daut näakjste Kapitel seenen?

23 Woo lang must Jesus wachten? Aul een nat Stoot em verut kunnen eenje opprechtje Menschen ut de Schreft vestonen, daut hee bat aune 1914 wachten must. (See doatoo uk dän Artikjel “Woo biblische Profezeiungen opp daut Joa 1914 hanwiesen” em Aunhank von dit Buak.) Daut, waut von 1914 aun aules passieet es, bewiest, daut dise Menschen rajcht hauden. Von don aun erfellen sikj Profezeiungen ut de Schreft, waut wiesen, daut Christus aune 1914 em Himmel  Kjennich wort un daut Gott sien Kjennichrikj aunfunk to rejieren. Wie läwen nu aulsoo en de “korte Tiet”, waut dän Fient noch blift (Openboarunk 12:12; Psalm 110:2). Wie kjennen ons gaunz secha sennen, daut daut Kjennichrikj boolt doafäa sorjen woat, daut Gott sien Wellen oppe Ieed jedonen woat. Es daut nich scheen to weeten? Oba woo kjenn wie ons doarenn soo secha sennen? En daut näakjste Kapitel woa wie seenen, daut de Schreft daut werkjlich soo lieet.