Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Waut lieet de Schreft werkjlich?

 DAUT 4. KAPITEL

Wäa es Jesus Christus?

Wäa es Jesus Christus?
  • Waut fa een besondret Aumt haft Jesus?

  • Wua kjeem Jesus häa?

  • Waut wia Jesus soo fa een Mensch?

1-2. (a) Wan ons wäm sien Nomen bekaunt es, heet daut dan aul, daut wie dän werkjlich kjanen? (b) Waut sajen väle Menschen, wäa Jesus wia?

VÄLE Menschen sent wiet un breet bekaunt, eenje en äare Omjäajent, aundre äwa de gaunze Welt. Oba bloos wiels ons dee äa Nomen bekaunt es, heet daut noch nich, daut wie dee werkjlich kjanen un weeten, waut daut fa Menschen sent.

2 De mieeschte Menschen haben aul mol von Jesus jehieet, uk wan daut aul soo bie 2 000 Joa trigj es, waut dee oppe Ieed läwd. Un doch weeten väle nich, wäa Jesus werkjlich wia. Eenje hoolen dän bloos fa eenen feinen Mensch. Aundre talen dän nich fa mea aus eenen Profeet. Noch aundre jleewen, Jesus es Gott selfst un saul aunjebät. Oba es daut soo?

3. Wuarom mott wie de Woarheit äwa Jehova Gott un Jesus Christus weeten?

3 Es daut needich to weeten, wäa Jesus werkjlich es? Jo, daut es, wiels de Schreft sajcht: “Daut eewje Läwen es dit: daut see die, dän eensich woaren Gott, un Jesus Christus, dän du jeschekjt hast, kjanen lieren” (Johanes 17:3). Daut wie noch mol kjennen eewich em Paradies läwen, mott wie de Woarheit äwa Jehova Gott un Jesus Christus  weeten (Johanes 14:6). Jesus es ons uk daut baste Väabilt, woo wie läwen sellen un woo wie aundre behaundlen sellen (Johanes 13:34-35). En daut ieeschte Kapitel en dit Buak hab wie jeseenen, woo Gott werkjlich es. Un nu well wie seenen, wäa Jesus Christus werkjlich es.

DE VESPROAKNA MESSIAS

4. Waut bedieden de Wieed “Messias” un “Christus”?

4 Noch lang ea Jesus jebuaren wort, wia daut enne Schreft aul verutjesajcht, daut de Messias ooda Christus komen wudd. Daut Wuat “Messias” kjemt vom Hebräischen un daut Wuat “Christus” vom Griechischen, un beides meent “Jesaulwda”. Daut es  eena, dän Gott to een besondret Aumt jesaulft ooda bestemt haft. Lota woa wie noch seenen, waut de Messias aules doatoo biedrajcht, daut Gott siene Vespräakjen sikj erfellen. Wie woaren uk lieren, waut fa goodet ons nu aul derch Jesus tookomen kaun. Ea Jesus jebuaren wort, sent secha väle nieschierich jewast, woont de Messias sennen wudd.

5. En waut wieren Jesus siene Jinja sikj gaunz secha?

5 Jesus siene Jinja wieren sikj gaunz secha, daut hee de vesproakna Messias wia (Johanes 1:41). Simon Petrus, eent von de Jinja, säd gaunz frie to Jesus: “Du best de Christus” (Matäus 16:16). Woo kunnen de Jinja sikj soo secha sennen? Un woo kjenn wie ons vondoag secha sennen?

6. Woo sorjd Jehova doafäa, daut opprechtje Menschen seenen kunnen, wäa de Messias wia? Met waut jeit daut to vejlikjen?

6 Gott siene Profeeten säden aul lang trigj väle Eenselheiten verut, aun waut de Messias wudd to kjanen sennen. Doatoo mol een Vejlikj: Saj wie mol, du saust wäm vom Boss- ooda Zuach-Stäschen ooda vom Zhett-Plauz aufholen, wua daut stiew voll Menschen es, un du hast dänjanjen oba noch kjeenmol jeseenen. Wudd die daut dan nich leichta sennen, dän to finjen, wan die wäa jesajcht haud, woo dän leet? Biejlikj soo säd Jehova derch de Profeeten krakjt verut, waut de Messias wudd doonen un beläwen. Doaderch wudden opprechtje Menschen kloa seenen kjennen, woont de Messias wia.

7. Waut fa Profezeiungen erfelden sikj aun Jesus?

7 See wie mol tweeatlei, waut doa verutjesajcht wia: De Profeet Micha säd aul 700 Joa em verut, daut de Messias wudd en Betlehem jebuaren woaren (Micha 5:1). Un wua kjeem Jesus to Welt? Krakjt doa jroz, en Betlehem (Matäus 2:1, 3-9). Daut tweede es eene Profezeiunk von ut Daniel 9:25. Doa woat doaropp hanjewäsen, wanea de Messias  komen wudd. Daut wudd aune 29 e. o. T. sennen. * Dise uk noch aundre Profezeiungen erfelden sikj aun Jesus. Daut bewiest, daut daut de vesproakna Messias wia.

Aus Jesus sikj deepen leet, wort dee de Messias ooda Christus

8-9. Woo wort daut bie Jesus siene Doop kloa, daut daut de Messias wia?

8 Utgangs Joa aune 29 e. o. T. wort daut noch kloara, daut Jesus de Messias wia. Daut wia don, aus Jesus no Johanes dän Deepa jinkj un sikj em Jordan Riefa deepen leet. Jehova haud Johanes vesproaken, hee wudd am een Tieekjen jäwen, aun waut hee wudd seenen kjennen, woont de Messias wia. Dit Tieekjen sach hee dan, aus hee Jesus deepen deed. De Schreft sajcht: “Sooboolt aus Jesus jedeept wia, kjeem hee utem Wota rut, un dan muak sikj de Himmel äwa am op, un hee sach Gott sien Jeist, soo aus eene Duw rauf komen un sikj opp am saten. Un eene Stemm vom Himmel säd: Dit es mien leewa Sän, met däm ekj sea tofräd sie” (Matäus 3:16-17). Aus Johanes dit sach un hieed, wia dee sikj gaunz secha, daut Jesus von Gott jeschekjt wia (Johanes 1:32-34). Aus Gott sien heilja Jeist, aulsoo siene Krauft, opp Jesus kjeem, wort hee de Messias ooda Christus, dee, waut doa toom Leida un Kjennich bestemt wia (Psalm 2:6).

9 Aul de Profezeiungen, waut sikj erfelden, uk waut Jehova selfst säd, bewiest sea kloa, daut Jesus de vesproakna Messias wia. Oba de Schreft lieet ons noch mea von Jesus Christus, biejlikj wua dee häakjeem un woo dee soo wia.

WUA KJEEM JESUS HÄA?

10. Wua läwd Jesus, ea dee opp de Ieed kjeem?

10 De Schreft sajcht, daut Jesus em Himmel läwd, ea dee opp de Ieed kjeem. De Profeet Micha (dee, waut  verutsäd, daut de Messias wudd en Betlehem jebuaren woaren) säd uk, daut dän sien “Aunfank un sien aufstaumen von lang häa” wia (Micha 5:1). Uk Jesus selfst haft välmol jesajcht, daut hee ea em Himmel jeläft haud (läs Johanes 3:13; 6:38, 62; 17:4-5). Em Himmel wia Jesus een Jeist un haud een sea besondret Veheltnis to Jehova.

11. Wuarom es Jesus Jehova sien wieetvolsta Sän?

11 Jesus es Jehova sien wieetvolsta Sän. See wie mol, wuarom. De Schreft sajcht, Gott muak Jesus “aus daut ieeschte von aul siene Woakjen” (Spricha 8:22; Kolossa 1:15). * Jesus es uk Jehova sien eensja Sän (Johanes 3:16). Daut bediet, hee es de eensja, dän Gott gaunz auleen muak. Aulet aundre muak Gott derch Jesus (Kolossa 1:16). Jesus woat uk noch “daut Wuat” jenant (Johanes 1:14). Daut wiest, daut hee fa Gott räden deed un Enjel uk Menschen Norechten von Gott äwabrocht.

12. Woo weet wie, daut Jesus un Gott nich jlikj sent?

12 Sent Gott, de Voda, un Jesus, de Sän, jlikj, soo aus eenje jleewen? De Schreft lieet soont nich. Soo aus wie jroz jeseenen haben, wort Jesus von Gott jemoakt. Jesus haud aulsoo eenen Aunfank. Jehova Gott oba es eewich, onen Aunfank un onen Enj (Psalm 90:2). Gott sienen ieeschten Sän es daut niemols nich em Senn jekomen, daut dee wull met sienen Voda jlikj sennen. Enne Schreft woat daut gaunz kloa jesajcht, daut de Voda jrata es aus de Sän (läs Johanes 14:28; 1. Korinta 11:3). Jehova es auleen de “aulmajchtja Gott” (Openboarunk 16:7). Doawäajen kaun kjeena met Jehova jlikj sennen. *

13. Waut es doamet jemeent, wan daut sajcht, daut de Sän “jeneiw Gott likjent, dän wie nich seenen kjennen”?

 13 Wie kjennen ons goanich väastalen, woo lang Jehova un sien ieeschta Sän aul toop wieren, ea daut de Stierns un de Ieed jeef. Daut wieren de baste Frind (Johanes 3:35; 14:31). De Sän wia krakjt soo aus de Voda. Doawäajen sajcht de Schreft, de Sän “likjent jeneiw Gott, dän wie nich seenen kjennen” (Kolossa 1:15). Eenjemol es daut bie Menschen uk soo, daut een Jung sienen Voda sea änlich es. Soo es daut uk bie Gott sienen Sän; dee es krakjt soo aus sien Voda.

14. Woo kjeem daut, daut Jehova sien ieeschta Sän aus Mensch jebuaren wort?

14 Jehova sien ieeschta Sän wia reed, vom Himmel oppe Ieed to komen un hia aus een Mensch to läwen. Oba woo kunn een Jeist aus Mensch jebuaren woaren? Doatoo must Jehova een Wunda doonen. Hee leet de judische Junkfru Maria schwanga woaren un sienen Sän to Welt brinjen. Daut Bäbe haud aulsoo nich eenen menschlichen Voda. Daut wia volkomen un dän wort de Nomen Jesus jejäft (Lukas 1:30-35).

WAUT WIA JESUS FA EEN MENSCH?

15. Wuarom kjenn wie Jehova derch Jesus bäta kjanen lieren?

15 Derch daut, waut Jesus säd un deed, aus dee oppe Ieed wia, kjenn wie dän fein kjanen lieren. Un derch Jesus kjenn wie uk Jehova bäta kjanen lieren, wiels dee krakjt sienen Voda likjent. Doawäajen säd Jesus mol to eent von siene Jinja: “Wäa mie jeseenen haft, haft uk dän Voda jeseenen” (Johanes 14:9). En de Evangelien Matäus, Markus, Lukas un Johanes woat väl beschräwen, woo Jesus soo wia un waut dee deed.

16. Wuavon räd Jesus daut mieeschte? Von wäm kjeem siene Lia?

16 De Menschen kjanden Jesus aus eenen Liera (Johanes  1:38; 13:13). Waut lieed Jesus? Daut mieeschte räd hee von de goode Norecht ooda “daut Evangelium vom Rikj” (Matäus 4:23). Daut Rikj es Gott siene Rejierunk em Himmel, waut äwa de gaunze Ieed rejieren woat un jehuarsome Menschen fa emma Säajen brinjen woat. Dise Norecht kjeem von Jehova. Jesus säd: “Miene Lia es nich miene, oba däm siene, dee mie jeschekjt haft” (Johanes 7:16). Jehova well, daut de Menschen von dise goode Norecht hieren, un Jesus wist daut. En daut achte Kapitel woa wie noch mea von Gott sien Kjennichrikj lieren un waut doaderch tostaund komen woat.

17. Wua deed Jesus aulawäajen prädjen? Wuarom bemieejd dee sikj soo sea, aundre to lieren?

17 Jesus deed de Menschen aulawäajen lieren: oppem Launt, en de Städa, en de Darpa, oppem Moakjt un bie de Menschen tus. Jesus luad nich, daut de Menschen sullen no am komen. Hee jinkj selfst no de Menschen (Markus 6:56; Lukas 19:5-6). Wuarom bemieejd Jesus sikj soo sea un vebrocht soo väl Tiet met prädjen un lieren? Gaunz eefach, wiels Gott daut von am haben wull, un Jesus deed emma, waut sien Voda wull (Johanes 8:28-29). Oba Jesus deed uk noch wäajen waut aundret prädjen: Dän jaumad daut äwa de Menschen, waut no am kjeemen (läs Matäus 9:35-36). De Gloowesliera hauden daut vesiemt, de Menschen de Woarheit von Gott un von dän sien Väanämen to lieren. Un Jesus wist, woo needich de Menschen daut fäld, daut dee de Norecht vom Kjennichrikj hieeden.

18. Waut jleichst du aun Jesus daut mieeschte?

18 Jesus wia een sea leeftolja, frintelja un metfeelenda Mensch. Doawäajen wieren de Menschen jieren met dän toop. Soogoa Kjinja jinkj daut sea scheen bie dän (Markus 10:13-16). Jesus muak uk kjeenen Unjascheet manke  Menschen. Un Onopprechtichkjeit un Jeheichel kunn dee nich vedroagen (Matäus 21:12-13). En Jesus siene Tiet worden Frues jeweenlich nich väl jeacht un hauden uk nich väl to sajen. Oba Jesus behaundeld dee met Iea (Johanes 4:9, 27). Jesus wia uk opp iernst deemootich. Opp eene Sauz wosch hee soogoa siene Apostel de Feet. Daut deed jeweenlich mau een läach aunjeseena Kjnajcht.

Jesus deed de Menschen aulawäajen lieren

19. Waut wiest, daut Jesus sea om aundre todoonen wia?

19 Jesus moakjt daut fuaz, wan doa wäm fäld to halpen. Daut wia besonda to seenen, wan dee derch Gott siene Krauft Kranke heelen deed (Matäus 14:14). Eemol kjeem doa een Lepra-Kranka no Jesus un säd: “Wan du west kaust du mie reinjen.” Jesus kunn vestonen, woo sea dis Maun lieden must. Ut Metleet strakjt hee siene Haunt ut un schieed dän aun un säd: “Ekj woa daut doonen; sie rein!” Un doamet wia de Maun jeheelt (Markus 1:40-42).  Kaust du die väastalen, woo froo dis Maun mott jewast sennen?

TRU BAT AUM DOOT

20-21. Wuarom es Jesus daut baste Väabilt doarenn, Gott en aules jehuarsom to sennen?

20 Jesus es daut baste Väabilt doarenn, Gott en aules jehuarsom to sennen. Hee bleef sienen Voda em Himmel emma tru, soogoa wan hee lieden must un de Menschen jäajen am wieren. Uk aus de Fient am vesocht, wia hee sikj gaunz eenich un wees dän trigj (Matäus 4:1-11). Ieeschtlich jleewden eenje von Jesus siene Vewaunte nich aun am un säden soogoa, dee wia nich mea gaunz kloa em Kopp (Markus 3:21). Oba Jesus muak sikj doa nuscht ut un deed wieda daut, waut Gott haben wull. Jesus deed sikj uk emma beharschen, wan hee utjeloamt un schlajcht behaundelt wort, un vesocht sikj kjeenmol to rajchnen (1. Petrus 2:21-23).

 21 Jesus wort von siene Fiend grausom un kjemmavoll omjebrocht, oba hee bleef bat aum Doot tru (läs Filippa 2:8). Ver sienen Doot muak hee noch sea väl derch. Hee wort faustjenomen, von faulsche Zeijen beschulcht, von ojjerajchte Rechta veuadeelt, von eene Häad Menschen vespott, von Soldoten jetualeit un tolatst aum Pol jenoagelt. Siene latste Wieed wieren: “Nu es aules foadich jebrocht!” (Johanes 19:30). Aum dredden Dach wuak sien himlischa Voda am opp aus eenen Jeist (1. Petrus 3:18, NW). Een poa Wäakj lota fua Jesus trigj nom Himmel. Doa wia dee dan “bie Gott siene rajchte Sied” un wacht, bat am de Kjennichsmacht jejäft wort (Hebräa 10:12-13).

22. Waut muak Jesus doaderch mäajlich, daut dee bat aum Doot tru bleef?

22 Doaderch, daut Jesus bat aum Doot tru bleef, muak dee daut mäajlich, daut wie mol eewich em Paradies läwen kjennen, soo aus Jehova daut aum Aunfank em Senn haud. En daut näakjste Kapitel woa wie seenen, waut Jesus sien Doot doamet to doonen haft, daut sikj daut erfelt.

^ Varsch 7 En dän Artikjel “Woo en daut Buak Daniel verutjesajcht wia, wanea de Messias komen wudd” em Aunhank von dit Buak es noch mea doaräwa to finjen, woo de Profezeiunk von Daniel sikj aun Jesus erfelt haft.

^ Varsch 11 Jehova woat de Voda jenant, wiels hee de Schepfa es (Jesaja 64:7). Wäajen Jesus von Gott jemoakt wort, woat dee Gott sien Sän jenant. De Enjel un soogoa Adam woaren uk aus Gott siene Säns betieekjent, wiels hee dee jemoakt haft (Hiob 1:6, Friesenbibel; Lukas 3:38, NW).

^ Varsch 12 En dän Artikjel “De Woarheit äwa dän Voda, dän Sän un dän heiljen Jeist” em Aunhank von dit Buak jeft daut noch mea Bewies, daut Jesus un Gott nich jlikj sent.