Trigj nom Enhault

No de Enhaultslist gonen

 AUNHANK

Sell wie Heljedoag hoolen?

Sell wie Heljedoag hoolen?

VÄLE Heljedoag, waut vondoag Mood sent, komen nich ut de Schreft. Von wua komen dee dan? En Bibliotäkjen jeft daut Bieekja, wua eena sikj daut unjastonen kaun. Well wie mol seenen, von wua eenje bekaunde Heljedoag häakomen.

 Oostren. En een Buak es to läsen: “En daut Niee Tastament es noanich wua jeschräwen, daut doa wäa Oostren jefieet haft” (The Encyclopædia Britannica). Woo haft daut dan met Oostren aunjefongen? Daut funk bie de Heiden aun. Uk wan väle sajen, daut see dän Dach Jesus sien Oppstonen vom Doot fieren, es doch bie Oostren välet Mood, waut nich christlich es. Biejlikj de Oostahos. “Daut met dän Hos kjemt von de Heiden häa un dee wia aul emma een Tieekjen fa Fruchtboakjeit”, heet daut en een aundret Buak (The Catholic Encyclopedia).

Niejoa. Woo un wanea Niejoa jefieet woat, es nich en aule Lenda äwareen. En een Buak schrift daut: “De reemischa Harscha Julius Cäsar fieed daut aune 46 v. o. T. soo en, daut Niejoa dän 1. Jaunewoa jefieet sull. Krakjt dän Dach veieeden de Reema dän Gott Janus. Daut wia de Aufgott fa Däaren un Puaten un fa waut nieet aunfangen. De Moonat Jaunewoa wort no dän jenant. Janus haud twee Jesechta, eent kjikjt no väaren un eent kjikjt no hinjen” (The World Book Encyclopedia). Niejoa fieren kjemt aulsoo von de Heiden häa.

Halloween. En een Buak kjenn wie läsen: “Välet, waut bie Halloween Mood es, kjemt von doa häa, waut aul bie de keltische Priesta ver Jesus siene Tiet Mood wia. De Kelten hauden Fasten fa twee besonda wichtje Jetta, fa dän Sonnengott un fa dän Gott fa de Doodes . . . Dän Gott fa de Doodes sien Heljedach wia de 1. Nowamba un krakjt dän Dach funk bie de Kelten daut niee Joa aun. Dit Fast fa de Doodes wort soo bie langsom von de Christen aunjenomen” (The Encyclopedia Americana).

Aundre Heljedoag. Wie kjennen hia nich von aule Heljedoag räden, waut daut enne Welt jeft. Oba eent es kloa: Soone Heljedoag, wua Menschen ooda Organisazionen veieet woaren, jleicht Jehova nuscht (Jeremia 17:5-7; Aposteljeschicht 10:25-26). Gott es daut nich eefach endoont, von wua Heljedoag häakomen (Jesaja 52:11; Openboarunk 18:4). De Schreftstäden, waut en dit Buak en daut 16. Kapitel sent utjelajcht, halpen die uk vestonen, woo Gott äwa daut metmoaken bie Heljedoag denkjt, waut nich met Relijion to doonen haben.