Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Waut lieet de Schreft werkjlich?

 AUNHANK

Gott sien Nomen: Waut dee bediet un woo dee jebrukt saul

Gott sien Nomen: Waut dee bediet un woo dee jebrukt saul

WAUT steit en diene Schreft en Psalm 83:19? En de Neue-Welt-Übersetzung heet daut en disen Varsch: “Muchten de Menschen weeten, daut du, dee du Jehova heeten deist, du auleen de Hechsta best äwa de gaunze Ieed.” Biejlikj soo es daut uk en eenje aundre Biblen äwasat. En väle Biblen es de Nomen Jehova oba nich bennen. Doa steit bloos “HAR”. * Waut jehieet dan en Psalm 83:19 nenn? De Nomen Jehova ooda HAR?

Gott sien Nomen en hebräische Buakstowen

En disen Varsch jeit daut om Gott sienen Nomen. Ieeschtemma, aus de Schreft opp Hebräisch oppjeschräwen wort, stunt dee en disen Varsch. Opp Hebräisch woat dee soo aus dit jeschräwen: יהוה (YHWH). Opp Plautdietsch saj wie jeweenlich “Jehova”. Es dis Nomen bloos en disen eenen Varsch to finjen? Nä. Don, aus de Hebräische Schreften (daut Oole Tastament) jeschräwen worden, wia de Nomen Jehova doa meist 7 000 Mol bennen!

Woo wichtich es Gott sien Nomen? En daut “Unser Vater” heet daut: “Ons Voda em Himmel! Dien Nomen saul heilich jehoolen woaren” (Matäus 6:9). Aus Jesus eemol to Gott bäd, säd hee: “Voda, veharlich dienen Nomen!” Un Gott säd dan vom Himmel: “Ekj hab dän aul veharlicht un woa dän wada veharlichen” (Johanes 12:28). Daut wiest gaunz kloa, daut Gott sien Nomen opp iernst wichtich es. Wuarom steit dan en soo väle vondoagsche Biblen “HAR”, wua ieeschtemma Gott sien Nomen stunt?

Jeweenlich es daut wäajen tweeatlei. Eemol sajen väle, Gott sien Nomen saul nich jebrukt, wiels wie nich weeten, woo dee ieeschtemma jesajcht wort. Hebräisch wort don onen de Buakstowen a, e, i, o, u jeschräwen un doawäajen weet vondoag kjeena mea,  woo dee en de Bibeltiet dän Nomen YHWH utjesproaken haben. Sell wie nu oba doawäajen Gott sienen Nomen nich brucken? Wie weeten je uk nich neiw, woo en de Bibeltiet de Nomen Jesus utjesproaken wort. Woomäajlich säden dee Jeschua ooda Jehoschua. Oba äwaraul oppe Ieed woat de Nomen Jesus doawäajen jebrukt un de Menschen spräakjen dän soo ut, aus dee daut en äare Sproak jewant sent. Un es daut nich uk soo, daut eenem sien Nomen en eene aundre Sproak aundasch jesajcht woat? Bloos wiels wie nich krakjt weeten, woo Gott sien Nomen ieeschtemma utjesproaken wort, meent daut nich, daut dee nich jebrukt saul.

Daut Gott sien Nomen en väle Biblen es utjeloten worden, kjemt uk noch von eene oole judische Mood häa. Väle Juden jleewden, Gott sien Nomen must kjeenmol jesajcht. Daut wia woomäajlich, wiels dee daut Jesaz ut 2. Mose 20:7 faulsch utläden. Doa sajcht daut: “Jie sellen däm Nomen von däm HARN junen Gott nich buta en Ieaforcht brucken, wiels de HAR woat däm nich onbestroft loten, dee sienen Nomen jemeen brukt.”

No dit Jeboot no wia daut veboden, dän Nomen von Gott jemeen to brucken ooda dän to mesbrucken. Oba meent daut, daut wie dän äwahaupt nich brucken sellen? Nä, wiels en de Hebräische Schreften (daut Oole Tastament) finj wie dän Nomen foaken. Un dee, waut daut schreewen, wieren aules true Mana, waut sikj aun Gott sien Jesaz hilden. Dee schreewen Gott sienen Nomen biejlikj en väle Psalmen nenn, waut don bie de Aunbädunk von väle toop jesungen worden. Jehova wull haben, siene Deena sullen sienen Nomen aunroopen, un dee, waut am jehorchten, deeden daut uk (Joel 3:5; Aposteljeschicht 2:21). Doawäajen hoolen Christen vondoag uk Gott sienen Nomen en Ieren un brucken dän, soo aus Jesus daut secha uk deed (Johanes 17:26).

Daut es een groota Fäla, wan Bibeläwasata Gott sienen Nomen utloten un doa bloos “HAR” ooda “Gott” nenschriewen. Wiels dee daut jedonen haben, es Gott fa väle Menschen wiet auf un framd. Oba no de Schreft no es Jehova “de jerajchte sea noaun” (Spricha 3:32). Denkj mol aun eenen gooden Frint. Wurscht du sajen kjennen, daut daut dien Frint wia, wan du nich mol dän sienen Nomen wist? Woo wudd eena dan kjennen een Frint aun Gott sennen, wan eena nich mol wist, daut dee Jehova heet? Un dan uk, wan Gott sien Nomen nich jebrukt woat, kjennen de Menschen nich weeten, daut dee eene besondre Bediedunk haft. Waut bediet Gott sien Nomen?

 Aus Moses Gott eemol no sienen Nomen fruach, säd Gott: “Ekj sie, dee ekj sie” (2. Mose 3:14). Soo läd Gott selfst ut, waut sien Nomen bediet. En de Rotherham-Bibel es dis Varsch soo äwasat: “Ekj woa to daut woaren, waut ekj well”. Daut meent, Jehova kaun to aules woaren, waut needich es, om daut sien Väanämen sikj erfelt. Hee kaun daut uk bat doa brinjen, daut daut, waut hee jemoakt haft, aules deit ooda to aules woat, daut sien Väanämen sikj erfelt.

Stal die mol väa, du kust to aules woaren, waut du wust. Waut wurscht du nich kjennen aules fa diene Frind doonen! Wan eent von diene Frind sea krank wia, wurscht du die kjennen to eenen Dokta moaken un dän jesunt moaken. Ooda wan eenen von dee daut aun Jelt fäld, kust du die to eenen sea rikjen Mensch moaken un dän uthalpen. Oba kjeena von ons es emstaunt, to aules to woaren, waut wie wudden wellen. Jehova oba kaun to aules woaren, waut needich es, om sien Väanämen to erfellen. Je mea du de Schreft studieescht, je dietelja woascht du daut seenen kjennen. Jehova brukt uk wellich siene Macht, om dee bietostonen, waut am tru deenen (2. Chronik 16:9). Dee Menschen, waut dän sienen Nomen nich kjanen, kjennen aul dit nich vestonen.

De Nomen Jehova jehieet onen Twiewel en de Schreft nenn. Wan wie vestonen kjennen, waut dis Nomen bediet un dän uk emma en de Aunbädunk brucken, woa wie ons väl dolla met onsen himlischen Voda Jehova vebungen feelen. *

^ Varsch 1 Läs die daut no, woo daut Wuat “Har” en dän Toosauz “Butajeweenelje Wieed” en de Plautdietsche Bibel es utjelajcht, uk waut daut hinjen en de Friesenbibel en de korte Wuaterkjläarunk äwa Gott sienen Nomen sajcht.

^ Varsch 3 En daut Heft Der göttliche Name, der für immer bleiben wird jeit noch mea doaräwa notoläsen, waut Gott sien Nomen bediet un wuarom dee en de Aunbädunk jebrukt saul. Daut es bie Jehova siene Zeijen to haben. See uk Poat 1 von daut Buakje Help fa daut Bibelstudium.

 

Noch mea doaräwa

EENE GOODE NORECHT VON GOTT

Haft Gott eenen Nomen?

Gott woat veschieden jenant, biejlikj Aulmajchtja, Schepfa ooda Har. Oba en de Bibel steit uk äwa 7 000 Mol Gott sien Nomen bennen.