Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Waut lieet de Schreft werkjlich?

 DAUT 19. KAPITEL

En Gott siene Leew bliewen

En Gott siene Leew bliewen
  • Waut es doamet jemeent, Gott to leewen?

  • Woo kjenn wie en Gott siene Leew bliewen?

  • Waut woat Jehova deejanje jäwen, waut en siene Leew bliewen?

Sieekjst du en dise orruje Tiet bie Jehova Schutz?

1-2. Wua kjenn wie en de vondoagsche Tiet Schutz finjen?

STAL die väa, du jeist irjentwua han un doa kjemt plazlich een grootet Owwada. Daut woat emma dunkla un windja, daut blizt un rummelt un fangt aun, sea to räajnen. Du ranst emma bosja un sieekjst, wua du die kaust unja Dak brinjen. Met eenst sitst du biesied Wajch een kjlienet Hus. Du ranst doa nenn. Daut es stoakj jebut, doabennen es daut drieech un du feelst die secha. Woo froo best du doch, daut du die hia hast kunt unja Schutz brinjen!

2 Wie läwen en orruje Tieden. De Welt woat emma schlajchta. Wua kjenn wie Schutz finjen, daut wie em jeistlichen nich Schoden lieden un de Hopninj opp daut eewje Läwen vespälen? En de Schreft sajcht daut von Jehova: “Du best miene Tooflucht un miene vesechade Staut, mien Gott opp dän ekj mie velot” (Psalm 91:2).

3. Woo kjenn wie bie Jehova Schutz finjen?

3 Denkj die mol han. Jehova, de Schepfa un aulahechsta Harscha, es onse Tooflucht un  kaun ons Schutz jäwen. Doa kjenn wie ons gaunz opp veloten, wiels hee es stoakja aus aules, waut ons schoden kaun. Un wan ons waut passieet, woat hee noch mol aules wada en Ordninj brinjen. Woo kjenn wie bie Jehova Schutz finjen? Wie motten ons opp am veloten. Un en de Schreft sajcht daut uk: “Blieft en Gott siene Leew” (Judas 21). Daut doo wie, wan wie met onsen himlischen Voda en Leew vebungen bliewen. Dan kjenn wie ons gaunz doaropp veloten, daut wie bie am Schutz finjen. Oba woo kjenn wie en Jehova siene Leew bliewen?

FA GOTT SIENE LEEW DANKBOA SENNEN

4-5. Aun waut es to seenen, daut Gott ons leeft?

4 Daut wie kjennen en Gott siene Leew bliewen, mott wie vestonen, woo hee ons siene Leew bewäsen haft. Denkj wie mol aun eenje Lieren ut de Schreft, waut wie en dit Buak aul derchjenomen haben: Jehova haft dän wundascheenen Ieedbaul fa ons jemoakt, wua daut mea aus jenuach Äten un Wota jeft, aulahaunt Tieren, schmocke Jäajenden, un uk väl aundre Sachen, waut wie brucken kjennen. Gott haft ons de Schreft jejäft, wua hee ons haft weeten loten, woo sien Nomen es uk woo hee es. Doabennen läs wie uk, daut hee sienen leewen Sän haft no de Ieed jeschekjt, wua dee väl lieden must un dan fa ons jestorwen es (Johanes 3:16). Doaderch, daut Gott daut jedonen haft, hab wie eene scheene Hopninj.

5 Jehova haft uk noch waut jedonen, waut met onse Hopninj to doonen haft. Hee haft em Himmel een Kjennichrikj oppjestalt, wua de Messias aus Kjennich harscht. Dise Rejierunk woat boolt met aul daut lieden een Enj moaken. De gaunze Ieed woat een Paradies woaren, wua wie fa emma en Fräden läwen kjennen un wua ons daut woat sea scheen gonen (Psalm 37:29). Un uk aul vondoag jeft Jehova ons gooden Rot fa ons Läwen. Hee haft daut uk soo enjerecht, daut wie aulentiet kjennen to am bäden. Dit sent mau bloos eenje Dinj, wuaderch Gott siene Leew to aule Menschen bewäsen haft.

6. Woo kjenn wie wiesen, daut wie dankboa sent fa de Leew, waut Jehova to ons haft?

 6 Woo kjenn wie wiesen, daut wie Jehova dankboa sent fa siene Leew? Secha wurscht du sajen, daut kjenn wie doaderch, daut wie am uk leewen. Un Jesus säd je uk, daut daut jratste Jeboot wia: “Du saust dän Harn, dienen Gott, met dien gaunzet Hoat goot sennen, un met diene gaunze Seel, un met aul diene Jedanken” (Matäus 22:37). Wie haben werkjlich jenuach Uasoak, Jehova Gott to leewen. Oba rieekjt daut too, bloos Leew to Gott en ons to haben, ooda es doa noch mea met en, wan daut sajcht, wie sellen Jehova met ons gaunzet Hoat, onse gaunze Seel un aul onse Jedanken goot sennen?

7. Es doa noch mea needich, aus bloos Leew to Gott en ons to haben? Met waut kjenn wie daut vejlikjen?

7 No de Schreft no es de Leew to Gott nich bloos waut, waut wie en ons haben. Gott werkjlich to leewen bediet noch mea. Daut es een bät soo aus met de Kjieena von eenen Aupel. Daut doa kaun een Aupelboom waussen, waut Frucht drajcht, bruck wie ieescht de Kjieena. Soo es daut met de Leew to Gott. Dee en ons to haben es ieescht de Aunfank. Oba daut auleen rieekjt nich too, wiels wan wie eenen Aupel äten wellen, sent wie uk nich tofräd, wan ons wäa bloos de Kjieena jeft. Krakjt soo mott uk onse Leew to Gott Frucht droagen. Woare Leew wiest sikj en goode Woakjen (läs Matäus 7:16-20). En de Schreft sajcht daut: “Wan wie Gott goot sent, dan hool wie siene Jebooten, un siene Jebooten sent nich schwoa” (1. Johanes 5:3).

8-9. Wuaderch kjenn wie wiesen, daut wie Gott leewen un dän dankboa sent?

8 Wan wie ons aun Gott siene Jebooten hoolen un soo läwen, aus hee daut haben well, wies wie, daut wie dän leewen. Daut es nich too väl velangt, wiels Gott siene Jebooten sent fa ons nich eene Laust. Wan wie ons aun dee hoolen,  halpt ons daut, tofräd to sennen un mea Freid aum läwen to haben (Jesaja 48:17-18). Doaderch, daut wie daut nokomen, waut Jehova von ons haben well, wies wie, daut wie fa aul daut dankboa sent, waut hee fa ons jedonen haft. Vondoag sent väle ondankboa. Soo wia daut uk en Jesus siene Tiet. Aus Jesus eemol tieen leprakranke Mana heelen deed, kjeem mau eena von dee trigj un bedankt sikj doafäa (Lukas 17:12-17). Secha well wie nich soo sennen aus de näajen ondankboare, leewa soo aus dee, waut doa trigjkjeem un sikj bedankt.

9 Waut sent daut oba fa Jebooten, aun dee wie ons hoolen sellen? Eenje von dee hab wie en dit Buak aul derchjenomen. Well wie noch mol een poa von dee nanen. Gott siene Jebooten notokomen woat ons halpen, en siene Leew to bliewen.

JEHOVA EMMA NODA KOMEN

10. Wuarom sell wie kjeenmol opphieren, mea äwa Jehova to lieren? Met waut kjenn wie daut vejlikjen?

10 Wie kjennen Jehova bloos noda komen, wan wie mea äwa dän lieren. Wie sellen niemols opphieren met lieren. Saj  wie mol, du woamsd die en eene ieskolde Nacht buten aum Fia. Secha wurscht du nich eefach setten un kjikjen, woo daut Fia emma kjlanda wort un schlieslich utjinkj. Du wurscht emma wada Holt aunlajen, daut daut aum brennen bleef un die woamen kunn, daut du nich dootfrieezhd. Krakjt soo aus eena biem Fia emma wada Holt aunlajen mott, soo mott wie uk nich opphieren, äwa Gott to lieren, daut onse Leew to am nich weinja woat (Spricha 2:1-5).

Onse Leew to Jehova es soo aus een Fia. Doa mott emma wada Holt aunjelajcht, daut daut nich utjeit

11. Waut deed daut bie de Jinja, aus Jesus an waut Städen ut de Schreft utläd?

11 Jesus wull, daut siene Jinja äare Leew to Jehova un to dän sien Wuat nich velieren sullen. Aus Jesus vom Doot oppjestonen wia, räd hee met twee von siene Jinja un läd an ut, waut en de Bibel äwa am verutjesajcht wia. Waut deed daut bie de Jinja? Lota säden dee: “Brenden onse Hoaten nich en ons, aus hee opp däm Wajch met ons räd un ons de Schreft utläd?” (Lukas 24:32).

12-13. (a) Woo es daut vondoag met väle äare Leew to Gott un to de Schreft? (b) Waut kjenn wie doonen, daut onse Leew nich kolt woat?

12 Woo wia daut, aus du toom ieeschte Mol doavon hieezhd, waut de Schreft werkjlich lieet? Jeef die daut nich eene groote Freid un feelsd du nich eene groote Leew to Gott en die? Wia dien Hoat nich soo voll, daut du doavon räden must? Soo wia daut bie väle. Wie motten doano seenen, daut dise Leew nich weinja, oba noch jrata woat. Bie ons saul daut nich soo sennen aus bie väle en de Welt. Soo aus Jesus verutsäd, wudd “de Leew bie väle Menschen kolt woaren” (Matäus 24:12). Waut kjenn wie doonen, daut onse Leew to Jehova un to de Woarheit ut sien Wuat nich kolt woat?

13 Hia nich opp, mea äwa Jehova Gott un Jesus Christus to lieren (Johanes 17:3). Nemm die Tiet, äwa daut notodenkjen, waut du ut de Schreft lieescht. Biejlikj, waut du ut eene wesse Schreftstäd äwa Jehova lieren kaust un woo die daut halpt, Jehova noch dolla to leewen (läs Psalm 119:97). Soo aus dit woat diene Leew to Jehova emma stoakj bliewen.

14. Woo halpt ons daut Jebäd, daut onse Leew to Jehova stoakj blift?

 14 Noch eent, waut die halpen woat, daut diene Leew to Jehova stoakj blift, es wan du pinkjlich to am bäden deist (1. Tessalonicha 5:17). En daut 17. Kapitel hab wie aul jeseenen, daut daut Jebäd een besondret Jeschenkj von Gott es. Met Jehova es daut soo aus met eenen gooden Frint. Wie motten ons pinkjlich met dän unjahoolen un dän sajen, woo ons daut werkjlich jeit. Wie motten uk doano seenen, daut onse Jebäda waut enhoolen un daut wie nich bloos emma un emma dautselwje sajen, onen doaräwa notodenkjen. To Jehova sell wie soo bäden, aus wan een Kjint met siene Pape rät. Uk wan wie dän väl achten, kjenn wie doawäajen opprechtich met dän äwa aules räden, waut wie oppem Hoaten haben (Psalm 62:9). Wan wie Gott rajcht deenen un en dän siene Leew bliewen wellen, mott wie selfst de Schreft studieren un iernstlich bäden.

WELLICH JEHOVA DEENEN

15-16. Wuarom saul daut prädjen fa ons gaunz waut besondret sennen, soo aus een wieetvolla Schauz?

15 Daut wie Gott kjennen rajcht deenen, mott wie nich bloos fa ons selfst de Schreft studieren un to Jehova bäden, oba uk met aundre äwa daut räden, waut wie jleewen. Hast du aul aundre kunt doavon vetalen, waut du ut de Schreft jelieet hast? Daut es eene goode Mäajlichkjeit, woo du Gott deenen kaust (Lukas 1:74). Doaderch daut wie met aundre äwa Jehova Gott räden, kom wie daut no, waut aule woare Christen schuldich sent: De goode Norecht von Gott sien Rikj bekauntmoaken (läs Matäus 24:14; 28:19-20).

16 Fa dän Apostel Paulus wia sien Deenst fa Gott soo besonda aus een wieetvolla Schauz (2. Korinta 4:7). Daut jeft nuscht bätret, aus aundre von Jehova vetalen un von daut, waut dee noch doonen woat. Wuarom saj wie daut? Wiels daut jeft kjeenen bätren Wieet aus Jehova, uk kjeene Oabeit, waut sikj mea loont aus daut prädjen. Derch daut prädjen halp wie opprechtje Menschen, daut dee kjennen Jehova kjanen lieren un daut  eewje Läwen kjrieen. Daut es daut baste, waut wie doonen kjennen! Wan wie met aundre äwa Jehova un sien Wuat räden, woat uk ons ieejna Gloowen stoakja un onse Leew to am jrata. Bie Jehova es daut väl wieet, waut wie doonen (Hebräa  6:10). Wan wie fa wieda flietich prädjen, halpt ons daut, en Gott siene Leew to bliewen (läs 1. Korinta 15:58).

17. Wuarom es daut vondoag soo needich, daut wie prädjen?

17 Wie sellen niemols vejäten, woo iernst daut met daut prädjen von Gott sien Rikj es. En de Heilje Schreft sajcht daut: “Prädj daut Wuat, auf de Tiet rajcht es ooda nich” (2. Timotäus 4:2). Wuarom es daut vondoag soo needich? En de Schreft läs wie: “De groota Dach fa däm HARN es dicht bie, un kjemt bosich noda” (Zefanja 1:14). Boolt woat Jehova dise beese Welt venichten un wie motten de Menschen doafäa woarnen. Dee motten weeten, daut nu de Tiet es, Jehova aus dän Aulahechsten to jehorchen. Daut Enj woat “nich utbliewen” ooda siemen (Habakuk 2:3).

18. Wuarom sell wie Jehova met siene woare Deena toop aunbäden?

18 Jehova well uk, daut wie am met siene woare Deena toop aunbäden. En de Schreft sajcht daut: “Well wie toophoolen un ons unjarenaunda aunspornen, en goode Woakjen, Leew to bewiesen. Vonne Vesaumlungen wajch bliewen, soo aus eenje doonen, daut well wie nich, oba väl leewa ons unjarenaunda Moot toospräakjen. Un daut es wichtich, wiels de latsta Dach noda kjemt, soo aus jie seenen kjennen” (Hebräa 10:24-25). Wan wie en de Vesaumlungen met onse Gloowesbreeda toopkomen, kjenn wie doa aulatoop Gott aunbäden un dän preisen. Un wie kjennen ons unjarenaunda bestoakjen un ons Moot toospräakjen.

19. Waut kjenn wie doatoo doonen, daut de Leew en de Vesaumlunk jrata woat?

19 Wan wie met Gott siene Deena toopkomen, kjenn wie aula ons Poat doatoo doonen, daut daut en de Vesaumlunk noch emma mea Leew un Eenichkjeit jeft. Doatoo mott wie bie aundre emma no dee äare goode Sieden kjikjen, wiels daut es, waut Jehova bie ons uk deit. Wie motten doaraun denkjen, daut onse Gloowesbreeda nich volkomen sent. Dee sent uk noch nich aula äwareen wiet em jeistlichen un dan moak wie uk noch aula Fäla (läs Kolossa 3:13). Wan wie ons  soone Frind sieekjen, waut Jehova opp iernst leewen, woat ons daut halpen, em jeistlichen verauntokomen. Jehova met onse Gloowesbreeda toop auntobäden halpt ons, en Gott siene Leew to bliewen. Woo woat Jehova dee beloonen, waut am tru deenen un en siene Leew bliewen?

NO “DAUT WOARE LÄWEN” STRÄWEN

20-21. Waut es met “daut woare Läwen” jemeent? Wuarom woat daut sea scheen sennen?

20 Jehova haft siene true Deena Läwen vesproaken. Waut fa een Läwen es doamet jemeent? Wäa wudd sajen, daut wie nu nich läwen? Wie doonen doch äten un drinkjen un odmen. Un wan ons daut ieescht mol soo rajcht scheen jeit, saj wie veleicht: “Dit’s een Läwen!” Oba no de Schreft no haft vondoag noch kjeena werkjlich “daut woare Läwen”.

Jehova well, daut du “daut woare Läwen” kjrichst. Nu es daut aun die!

21 De Schreft sajcht, wie sellen doano sträwen, daut wie “daut woare Läwen to hoolen kjrieen” (1. Timotäus 6:19, Reimerbibel). No dise Wieed no es “daut woare Läwen” waut, waut doa noch kjemt. Ieescht wan wie volkomen sent, woa wie soo to sajen werkjlich läwen, wiels ieescht dan woat ons Läwen soo sennen, aus Gott daut von Aunfank aun wull. Dan woat de Ieed een Paradies sennen, aulawäajen woat daut Fräd jäwen, wie woaren gaunz jesunt sennen un ons woat daut opp iernst scheen gonen. Daut woat dan “daut woare Läwen” sennen, daut eewje Läwen (1. Timotäus 6:12). Woat daut nich sea scheen sennen?

22. Woo kaust du no “daut woare Läwen” sträwen?

22 Woo kaun eena no “daut woare Läwen” sträwen? Paulus schreef, Christen “sellen goodet doonen, daut see rikj sent aun goode Woakjen” (1. Timotäus 6:18). Daut wiest, daut wie doano läwen motten, waut wie ut de Schreft lieren. Meend Paulus doamet, daut wie ons “daut woare Läwen” met goode Woakjen vedeenen kjennen? Nä, daut kjrie wie mau derch “Gott siene Jnod” (Reema 5:15). Oba Jehova jeft ons “daut woare Läwen” jieren, wan wie am tru deenen. Hee well uk,  daut du daut kjrichst. Wan du en Gott siene Leew blifst, kaust du die doatoo freien, noch mol fa emma jlekjlich un en Fräd to läwen.

23. Wuarom sell wie en Gott siene Leew bliewen?

23 Wie aula motten doaräwa nodenkjen, aus wie Gott soo deenen, aus hee daut enne Schreft haft oppschriewen loten. Wan wie daut doonen, dan sent wie opp dän rajchten Wajch un dan kjenn wie ons doa uk gaunz opp veloten, daut wie bie Jehova Schutz finjen. Hee woat siene true Deena bewoaren, soo lang aus dise beese Welt noch es un woat doano seenen, daut dee kjennen en de scheene niee Welt läwen. Waut woat daut nich fa eene Freid jäwen, wan wie daut woaren beläwen kjennen! Un woo froo woa wie nich sennen, daut wie ons sent eenich jeworden, dän rajchten Wajch to gonen! Wan du die nu entscheiden deist, daut rajchte to doonen, woascht du fa emma kjennen soo läwen, aus Gott daut von Aunfank aun wull. Du woascht kjennen “daut woare Läwen” deelhauftich woaren!

Noch mea doaräwa

BIBELSTUDIUM

Wuarom loont sikj daut, de Bibel studieren?

De Bibel haft aul millionende Menschen jeholpen. Dee kaun die uk halpen!