Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Waut lieet de Schreft werkjlich?

 DAUT 12. KAPITEL

Een Läwen fieren, waut Gott jefelt

Een Läwen fieren, waut Gott jefelt
  • Woo kaust du Gott toom Frint haben?

  • Waut haft daut met ons to doonen, waut de Fient von Jehova säd?

  • Waut fa een Vehoolen jleicht Jehova nich?

  • Woo kaun eena soo läwen, daut Gott daut jefelt?

1-2. Biejlikj woone Menschen tald Jehova fa goode Frind?

WÄM jleichst du toom Frint to haben? Secha wäm, waut soo jesonnen es aus du un waut dautselwje intressieet. Met feine Menschen, waut biejlikj opprechtich un leeftolich sent, es eena jieren toop.

2 Daut haft emma wada Menschen jejäft, waut Gott fa siene Frind tald. Biejlikj Abraham nand hee sienen Frint (läs Jesaja 41:8; Jakobus 2:23). Uk David wia een Mensch, dän Jehova jleicht, un hee säd, daut wia een Maun no sienem Hoaten (Aposteljeschicht 13:22). Un dän Profeet Daniel leet Gott sajen, daut hee dän väl räakjend (Daniel 9:23).

3. Waut vonne Menschen haft Jehova jieren to Frind?

3 Wuarom wieren Abraham, David un Daniel goode Frind aun Jehova? To Abraham säd Jehova: “Wiels du mie jehorchen deetst” (1. Mose 22:18). Daut wiest, daut hee aul dee aus Frind haben well, waut deemootich daut doonen, waut hee sajcht. To de Israeliten säd Jehova, daut see am jehorchen sullen, un dan wudd hee äa Gott sennen un see wudden sien Volkj sennen (Jeremia 7:23). Wan du no Jehova horchst, kaust du dän uk toom Frint haben!

 JEHOVA STEIT SIENE FRIND BIE

4-5. Woo steit Jehova sien Volkj bie?

4 Waut deit Gott fa siene Frind? De Schreft sajcht, hee sieekjt emma no Jeläajenheiten, “om dee bietostonen, waut am met een onjedeeldet Hoat vetruen” (2. Chronik 16:9). Woo biejlikj deit Jehova daut? En Psalm 32:8 sajcht hee: “Ekj woa die unjarechten un die dän Wajch wiesen dän du gonen saust; ekj woa die Rot jäwen un die em Uag hoolen.”

5 Es daut nich scheen, woo sea Jehova om ons aula todoonen es? Hee jeft ons Rot un halpt ons, dän uk notokomen. Gott well ons derch aulet schwoare halpen (läs Psalm 55:23). Wan du Jehova met dien gaunzet Hoat deenst, kaust du uk soo aus de Psalmenschriewa sajen: “Ekj hab dän HARN emma ver de Uagen; wiels hee mie to rajchte Haunt steit, woa ekj secha stonen” (Psalm 16:8; 63:9). Jehova kaun die halpen, een Läwen to fieren, waut am jefelt. Oba wie weeten je, daut de Fient ons met aula Jewault doavon aufhoolen well.

WAUT DE FIENT SÄD

6. Waut säd de Fient von de Menschen?

6 En daut alfte Kapitel hab wie jeseenen, daut de Fient dän Twiewel oppkomen leet, aus Jehova met rajcht de hechsta Harscha wia. Dee jeef auntovestonen, daut Gott een Läajna wia un daut daut ojjerajcht wia, daut Adam un Eva nich selfst bestemmen kunnen, waut rajcht un orrajcht wia. Nodäm daut Adam un Eva jesindicht hauden un dee äare Nokomen sikj vemieet hauden, brocht de Fient noch waut opp, un daut betroff de gaunze Menschheit. Daut wia een bät soo aus wan hee säd: “De Menschen deenen Gott nich ut Leew. Ekj weet, ekj wudd jiedren eenen soo wiet kjrieen, daut dee sikj jäajen Gott stald.” De Jeschicht von Hiob wiest, daut de Fient sikj doarenn gaunz secha wia. Wäa wia Hiob? Un waut haud dee doamet to doonen, waut de Fient säd?

7-8. (a) Wuarom wia Hiob soo een besondra Mensch? (b) Waut säd de Fient von Hiob?

7 Hiob läwd soo bie 3 600 Joa trigj. Daut wia een gooda  Mensch. Jehova säd von dän: “Doa es nich noch eena oppe Ieed, dee soo es aus hee. Däm es met nuscht to beschuljen un deit emma waut rajcht es; dee haft Forcht fa Gott, un deit nuscht schlajchtet” (Hiob 1:8). Gott haud eenen Jefaulen aun Hiob.

8 Oba de Fient jeef auntovestonen, daut Hiob Gott nich ut Leew deend. Dee säd to Jehova: “Hast du [Hiob] sien Hus un aules waut hee haft nich von jieda Jefoa beschizt? Du hast daut jesäajent waut hee deed, un sien Vemieejen haft sikj groot utjebreet em Launt. Oba wan du sien Vemieejen auntuksen wurscht, waut jleefst du doch, dee wudd die jlikjtoo aufsajen” (Hiob 1:10-11).

9. Waut deed Jehova, aus de Fient Hiob aunkloagen deed, un wuarom?

9 De Fient säd aulsoo, daut Hiob Gott bloos doawäajen deend, wiels hee doa waut fäa kjrieech. Oba wan dee mol oppe Proow jestalt wort, wudd dee Gott dän Rigjen dreien. Woo jinkj Jehova doamet om? Hee leet daut too, daut de Fient kunn Hiob oppe Proow stalen. Soo wudd sikj daut utwiesen, aus Hiob Gott werkjlich ut Leew deend ooda nich.

HIOB WOAT OPPE PROOW JESTALT

10. Waut muak Hiob aules derch, oba waut deed dee doawäajen nich?

10 De Fient funk fuaz aun, Hiob to vesieekjen. Hiob worden een Deel Tieren fuatjestolen uk eenje dootjemoakt. De mieeschte von siene Oabeida worden omjebrocht. Un soo wia dee met eemol en eene sea schwoare Loag. Aus wan daut noch nich jenuach wia, storwen uk noch siene tieen Kjinja en eenen Storm. Oba doawäajen “vesindijd Hiob sikj nich un schmeet kjeene Schult opp Gott” (Hiob 1:22).

11. (a) Waut säd de Fient noch von Hiob? Waut deed Jehova dan? (b) Waut deed Hiob, aus hee met de schlemme Krankheit jeploacht wort?

11 De Fient jeef nich bie. Woomäajlich docht dee soo bie sikj: “Uk wan Hiob daut noch vedroagen kaun, daut dee haft siene Tieren, siene Oabeida un siene Kjinja veloaren, woat dee oba secha Gott dän Rigjen dreien, wan dee ieescht  krank es.” Jehova leet daut too, daut de Fient Hiob met eene äakjelje Krankheit un väl Weedoag ploagen kunn. Oba uk dan velua Hiob sienen Gloowen nich. Hee wia sikj gaunz eenich un säd: “Bat ekj stoaw, woa ekj tru bliewen!” (Hiob 27:5, NW).

Hiob wort doafäa beloont, daut hee soo tru wia

12. Woo wia daut aun Hiob to seenen, daut de Fient em orrajchten wia?

12 Hiob wist nich, daut daut de Fient wia, waut am soo toosad. Hee wist doa nich krakjt om, waut de Fient äwa Jehova sien Rajcht to harschen aules jesajcht haud. Hee docht, aul daut schlemme kjeem von Gott (Hiob 6:4; 16:11-14). Oba Hiob bleef Jehova doawäajen tru. Soo wort bewäsen, daut de Fient em orrajchten wia un daut Hiob Gott nich bloos deend, wiels hee doa waut fäa kjrieech.

13. Waut fa goode Foljen haud daut, daut Hiob Gott tru wia?

13 Wäajen Hiob soo tru wia, kunn Jehova kloa wiesen, daut daut nich soo wia, waut de Fient jesajcht haud. Hiob wia opp iernst een Frint aun Jehova, un Jehova beloond dän doafäa, daut dee soo tru wia (Hiob 42:12-17).

WOO SENT WIE DOA MET EN?

14-15. Wuarom weet wie, daut de Fient von aule Menschen sajcht, dee wudden Gott nich ut Leew deenen?

14 Säd de Fient daut bloos von Hiob, daut dee Gott nich ut Leew tru wia? Nä, dautselwje sajcht dee von ons aula. Woo weet wie daut? En Spricha 27:11 sajcht Jehova: “Sie weis, mien Sän, un moak mie daut Hoat froo, daut ekj dän, dee mie vespott, eene Auntwuat jäwen kaun” (NW). Dit wiest, daut de Fient hundade Joaren no Hiob sienen Doot Gott noch emma väaschmeet, daut siene Deena am nich ut Leew deenden. Woo kjenn wie dan wiesen, daut de Fient em orrajchten es? Daut kjenn wie, wan wie soo läwen, aus Gott daut haben well. Soo moak wie Gott sien Hoat froo. Wurscht du nich uk wellen bewiesen, daut de Fient een Läajna es, uk wan du doatoo veleicht en dien Läwen waut endren motst?

15 De Fient säd uk: “Waut jeft de Mensch nich fa siene  Jesuntheit?” (Hiob 2:4). Dee säd “de Mensch”, un meend doamet nich bloos Hiob; doa sent wie aula met en. De Fient sajcht aulsoo uk von die, daut du Gott mau dan tru best, wan du doa waut fäa kjrichst. Dee wudd daut sea jleichen, wan du en schwoare Tieden wurscht Gott dän Rigjen dreien un dän rajchten Wajch veloten. Woo well dee die bat doa kjrieen?

16. (a) Woo prooft de Fient, de Menschen von Gott wajchtobrinjen? (b) Woo wudd dee daut kjennen uk bie die proowen?

16 En daut tieende Kapitel hab wie jelieet, daut de Fient veschiednet brukt, om de Menschen von Gott wajchtobrinjen. Bieaun prooft dee daut soo ruchloos “aus een brellenda Leiw un sieekjt no wäm, dän hee verieten kaun” (1. Petrus 5:8). Daut deit dee derch Frind un Vewaunte ooda aundre, dee sea doajäajen sent, wan du de Schreft studieescht un doano läfst (Johanes 15:19-20). * Dan sajcht de Schreft oba uk, de “Soton selfst vekjleet sikj aus een Enjel vom Licht” (2. Korinta 11:14). Eenjemol well dee die hinjalestich bat doa brinjen, daut du nich saust opp dän rajchten Wajch bliewen. Dee well die uk enbillen, daut Gott aulmols kjeenen Jefaulen aun die haft, un soo well dee die mootloos moaken. Endoont, aus dee die aunkjemt “aus een brellenda Leiw” ooda “aus een Enjel vom Licht”, dee haft emma eent em Senn: Dee well bewiesen, daut du Gott nich mea deenen woascht, wan du aufjeprooft ooda vesocht woascht. Woo kaust du Gott uk soo tru sennen, aus Hiob wia, un bewiesen, daut de Fient nich rajcht haft?

JEHOVA SIENE JEBOOTEN NOKOMEN

17. Wuarom well wie Jehova siene Jebooten hoolen?

17 Du kaust wiesen, daut de Fient nich rajcht haft, wan du  soo läfst, aus Gott daut jefelt. Waut woat die doabie halpen? De Schreft sajcht: “Jie sellen däm HARN junen Gott met jun gaunzet Hoat goot sennen, un met june gaunze Seel, un met aul june Krauft” (5. Mose 6:5). Wan du Gott goot best un diene Leew to am jrata woat, woascht du daut doonen wellen, waut Gott jefelt. De Apostel Johanes schreef: “Wan wie Gott goot sent, dan hool wie siene Jebooten.” Wan du Jehova met dien gaunzet Hoat leefst, woascht du seenen, daut “siene Jebooten . . . nich schwoa” sent (1. Johanes 5:3).

18-19. (a) Waut sent eenje von Jehova siene Jebooten? (Besee die dän Kausten “ Bliew von daut wajch, waut Jehova nich lieden kaun”.) (b) Woo weet wie, daut Jehova nich too väl von ons velangt?

18 Waut sent daut fa Jebooten? Biejlikj haft Gott ons jeboden, von eenje Sachen wajchtobliewen. Besee die doatoo dän Kausten “ Bliew von daut wajch, waut Jehova nich lieden kaun”. Doa woat ons opp Sachen hanjewäsen, waut de Schreft gaunz kloa veuadeelt. Bie eenjet mucht eena denkjen, daut es je goanich soo schlemm. Oba wan eena sikj daut en de Schreft noläst un doaräwa nodenkjt, woat eenem kloa, woo goot Jehova siene Jebooten fa ons sent. Veleicht motst du en dien Läwen eenjet endren, om Jehova to jefaulen. Daut es nich emma eefach, oba daut loont sikj, wiels daut jeft eenem een tofrädnet un jlekjeljet Läwen (Jesaja 48:17-18). Jiedra eena kaun soo läwen, aus Gott daut jefelt. Woo weet wie daut?

19 Jehova velangt von ons kjeenmol waut, waut wie nich kjennen (läs 5. Mose 30:11-14). Hee weet väl bäta aus wie selfst, to waut wie emstaunt sent un to waut nich (Psalm 103:14). Jehova jeft ons uk de Krauft, daut wie am jehorchen kjennen. De Apostel Paulus schreef: “Gott es tru, un hee woat daut nich tooloten, daut jie schwanda vesocht woaren, aus jie Krauft haben. Hee woat fa eenen Wajch sorjen, ut de Vesieekjunk rut to komen, soo daut jie daut vedroagen kjennen” (1. Korinta 10:13). Jehova kaun die soogoa “butajeweenelje Krauft” jäwen, daut du am kaust tru  bliewen (2. Korinta 4:7, Reimerbibel). Paulus muak selfst uk väl derch, un hee säd: “Ekj kaun aules derch däm, dee mie stoakj moakt” (Filippa 4:13, Friesenbibel).

SOO LÄWEN, DAUT GOTT DAUT JEFELT

20. Woo well Jehova, daut wie sellen sennen? Wuarom es daut soo wichtich?

20 Om Jehova to jefaulen, derw wie aulsoo nuscht doonen, waut hee nich lieden kaun. Oba daut auleen es nich jenuach.  Wie motten uk daut jleichen, waut hee jleicht (Reema 12:9). Best du nich jieren met Menschen toop, waut soo jesonnen sent aus du un waut dautselwje intressieet? Soo jeit Jehova daut uk. Doawäajen mott wie lieren, daut to leewen, waut Jehova väl wieet es. Waut biejlikj es daut? En Psalm 15 kaust du seenen, woone Menschen Gott jieren to Frind haft (läs Psalm 15:1-5). Jehova siene Frind wiesen en äa Läwen uk “dän Jeist siene Frucht”, daut es “Leew, Freid, Fräd, Jedult, Frintlichkjeit, gootjesonnen sennen, Gloowen, Jelindichkjeit un Selfstbeharschunk” (Galata 5:22-23).

21. Waut woat die halpen, soo een Mensch to sennen, aus Gott daut jefelt?

 21 Doo pinkjlich de Schreft läsen un studieren. Daut halpt die, soo een Mensch to sennen, aus Gott daut jefelt. Du woascht dan uk bäta vestonen kjennen, waut Gott von ons haben well, un noch mea soo denkjen, aus Jehova denkjt (Jesaja 2:3). Je stoakja diene Leew to Jehova es, je dolla woascht du wellen soo een Läwen fieren, aus hee daut haben well.

22. Wuarom well wie soo läwen, aus Gott daut haben well?

22 Daut es nich soo leicht jedonen, fa Gott to läwen. Doatoo mott eena sikj eenjemol endren. De Schreft sajcht, daut es biejlikj soo aus wan eena siene oole Natua soo aus een Kjleet auflajcht un eene niee aunnemt (Kolossa 3:9-10). Oba en de Psalmen sajcht daut von Gott siene Jebooten: “Wäa dee hoolen deit haft een grooten Loon” (Psalm 19:12). Du woascht seenen, daut sikj daut loont, soo to läwen, aus Gott daut jefelt. Soo woascht du Gott sien Hoat froo moaken un bewiesen, daut de Fient een Läajna es!

^ Varsch 16 Daut bediet nich, daut dee, waut jäajen die sent, vom Fient besäten sent. Oba de Soton es de Gott äwa dise Welt, un de gaunze Welt woat von dän beharscht (2. Korinta 4:4; 1. Johanes 5:19). Wan wie soo läwen wellen, aus Gott daut jefelt, mott wie aulsoo doamet räakjnen, daut eenje jäajen ons sennen woaren.