Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Waut lieet de Schreft werkjlich?

 AUNHANK

Waut es “daut groote Babel”?

Waut es “daut groote Babel”?

EN DE Openboarunk es väl en Jlikjnisen jeschräwen. Daut rät doa biejlikj von eene Fru, waut eene Hua es. Opp dee äa Stiern steit jeschräwen: “Daut groote Babel”. Dee sett aun väle Wotasch, waut Maussen von Menschen un Velkja bedieden (Openboarunk 17:1, 5, 15). Soo aus daut hia beschräwen es, kaun daut  groote Babel nich opp iernst eene Fru sennen. Daut es gaunz kloa een Jlikjnis. Waut stalt dise Hua dan väa?

En Openboarunk 17:18 woat jesajcht, daut dise Fru “de groote Staut [es], dee äwa aule Kjennichs opp de Ieed harscht.” Daut Wuat “Staut” diet doano han, daut sikj daut om eene Grupp Menschen haundelt, waut toopschaufen. Dise groote Staut haft Jewault äwa de “Kjennichs opp de Ieed”; dee mott aulsoo eene stoakje Macht väastalen, waut äwa de gaunze Welt waut to sajen haft. Eena wudd kjennen sajen, dee Staut es soo aus een Rikj, waut de Welt beharscht. De Openboarunk jeft auntovestonen, daut sikj daut doabie om de Relijionen haundelt. See wie ons daut mol no.

Daut jeft dree Sachen, waut Macht uteewen enne Welt: de Rejierungen, de Haundel un de Relijionen. Daut groote Babel kaun nich eene polietische Macht ooda Rejierunk väastalen, wiels de Schreft sajcht, daut “de Kjennichs opp de Ieed”, aulsoo de Rejierungen, met dee “jehuat haben”. Daut dee toop jehuat haben, bediet, daut dise Fru met de polietische Harscha foaken eenen Bunt jemoakt haft. Un see haft uk sest aules jedonen, daut see dee en äare Macht kjrieech. Doawäajen woat see uk “de groote Hua” jenant (Openboarunk 17:1-2; Jakobus 4:4).

Dise Fru kaun uk nich de Haundelswelt väastalen, wäajen de “Haundelslied opp de Ieed” woaren roaren, wan de Fru ieescht venicht woat. Doa steit jeschräwen, daut de Kjennichs un de Haundelslied dan woaren “wiet auf stonen” un opptoo no daut groote Babel kjikjen (Openboarunk 18:3, 9-10, 15-17). Daut wiest, daut daut groote Babel nich de Rejierungen uk nich de Haundelswelt väastalt, oba de Relijionen.

Daut jeft noch mea Bewies doafäa, daut met daut groote Babel de Relijionen jemeent sent. De Schreft sajcht, daut daut aule Velkja derch “Zaubarie” veleit (Openboarunk 18:23). Zaubarie haft emma met Relijion un met de beese Jeista to doonen un doawäajen es daut nich toom wundren, daut daut groote Babel en de Schreft “eene Behusunk fa de beese Jeista” jenant woat (Openboarunk 18:2; 5. Mose 18:10-12). Daut groote Babel vefolcht “Profeeten un heilje” un schauft soo jäajen dän woaren Gloowen (Openboarunk 18:24). Daut es soo vehaust jäajen de woare Relijion, daut daut Menschen om Jesus sient haulwen grausom vefolcht un soogoa dootmoakt (Openboarunk 17:6).  De Fru, waut daut groote Babel jenant woat, mott aulsoo aule faulsche Gloowes toop väastalen, un doa sent aule Relijionen met en, waut sikj jäajen Jehova Gott stalen.