Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Waut lieet de Schreft werkjlich?

 AUNHANK

Woo biblische Profezeiungen opp daut Joa 1914 hanwiesen

Woo biblische Profezeiungen opp daut Joa 1914 hanwiesen

VON de 1870ja Joaren aun muaken Bibelforscha bekaunt, daut aune 1914 waut besondret passieren wudd. Waut sull daut sennen? Un woo weet wie, daut 1914 werkjlich een besondret Joa wia?

 Jesus säd eemol: “De Velkja woaren Jerusalem unja de Feet haben, bat äare Tiet [“de Heiden äare Tiet”, Reimerbibel] woat aufjerant sennen” (Lukas 21:24). Jerusalem wia de judische Hauptstaut. Doa harschten de Kjennichs, waut von Kjennich David aufstaumden (Psalm 48:2-3). Daut wieren oba nich irjent Kjennichs. Dee sauten soo to sajen “opp däm HARN sienen Troon” un stalden dän aus Harscha väa (1. Chronik 29:23). Jerusalem wia aulsoo een Bilt fa Jehova siene Harschoft.

Woo wudden de Velkja Gott siene Harschoft “unja de Feet haben”, un wanea wudd daut passieren? Daut funk aune 607 v. o. T. aun, aus Jerusalem von de Babelonia enjenomen wort. Von doa aun saut kjeen Kjennich mea “opp däm HARN sienen Troon” un von David siene Nokomen wia kjeena mea Kjennich (2. Kjennichs 25:1-26). Oba sullen de Velkja fa emma “Jerusalem unja de Feet haben”? Nä, wiels en eene Profezeiunk wort to Zedekia, dee de latsta Kjennich en Jerusalem wia,  jesajcht: “Nemm die diene Koppbinj auf un sat diene Kroon tosied . . . bat deejanja kjemt, wäm daut met rajcht jehieet. Däm woa ekj daut jäwen” (Hesekiel 21:31-32). Dän, wäm David siene Kroon “met rajcht jehieet”, es Jesus Christus (Lukas 1:32-33). Wan dee ieescht wudd aunfangen, aus Kjennich to rejieren, wudd de Tiet to Enj sennen, wua de Velkja Gott siene Harschoft “unja de Feet” hauden.

Wanea sull Jesus Kjennich woaren? Soo aus hee säd, wudden de Velkja mau fa eene bestemde Tiet harschen. Woo lang dise Tiet sennen wudd, kjenn wie en daut 4. Kapitel en daut Buak Daniel seenen. Doa rät daut von eenen profeetischen Droom, waut Nebukadnezar, de Kjennich von Babel, haud. Hee sach eenen sea grooten Boom, waut omjehakt wort. Dan wort de Stobben met Iesa un Brons beschloagen, daut dee nich waussen kunn. No daut no, waut een Enjel säd, sullen dan “säwen Joa” vegonen (Daniel 4:7-13).

Enne Schreft stalen Beem eenjemol eene Harschoft väa (Hesekiel 17:22-24; 31:2-5). Soo aus wie jeseenen haben, deed Gott ieeschtemma derch de Kjennichs en Jerusalem harschen. Daut de Boom omjehakt wort, bediet aulsoo, daut dise Harschoft fa eene bestemde Tiet nich mea wudd sennen. Oba en dän Droom wort jewäsen, daut daut nich emma soo bliewen wudd. Daut wudd bloos fa säwen profeetische Joa sennen. Woo lang es daut?

Soo aus daut en Openboarunk 12:6, 14 sajcht, dieren dreeunhaulf profeetische Joa “1.260 Doag”. Säwen profeetische Joa dieren dan 2 520 Doag, aulsoo dobbelt soo lang. Oba 2 520 Doag no däm Jerusalem enjenomen wort, hauden de Heiden Gott siene Harschoft noch emma “unja de Feet”. Daut kaun sikj aulsoo nich om jeweenelje Doag haundlen. Wan wie “fa jieda Dach een Joa” talen, soo aus daut en 4. Mose 14:34 un Hesekiel 4:6 steit, dieren dise säwen profeetische Joa en Werkjlichkjeit 2 520 Joa.

Em Oktooba aune 607 v. o. T. fungen de 2 520 Joa aun to talen. Daut wia don, aus Jerusalem von de Babelonia enjenomen wort, un de latsta Kjennich raufjesat wort, waut von David aufstaumd. Em Oktooba aune 1914 wieren de 2 520 Joa dan to Enj.  Doamet wia de Velkja äare Tiet aufjerant un Gott muak Jesus Christus em Himmel toom Kjennich (Psalm 2:1-6; Daniel 7:13-14). *

Jesus haud verutjesajcht, waut hia oppe Ieed aules passieren wudd, wan hee em Himmel wudd aus Kjennich rejieren. Daut wudd väl Kjrich, Hungaschnoot, Ieedbäben un schlemme Krankheiten jäwen (Matäus 24:3-8; Lukas 21:11). Un krakjt soo es daut romjekomen. Daut bewiest, daut Gott sien Rikj werkjlich aune 1914 em Himmel es oppjestalt worden un daut de “latste Doag” fa dise beese Welt aunfungen (2. Timotäus 3:1-5).

^ Varsch 4 Von Oktooba aune 607 v. o. T. bat Oktooba en daut Joa 1 v. o. T. wieren daut 606 Joa. Von Oktooba en daut Joa 1 v. o. T. bat Oktooba aune 1914 e. o. T. sent daut 1 914 Joa, wiels je daut kjeen Joa 0 jeef. Wan eena nu 606 Joa mea 1 914 Joa tooptalt, jeft daut 2 520 Joa. En daut Buak Einsichten über die Heilige Schrift jeit unja “Chronologie” noch mea doaräwa notoläsen, daut Jerusalem es aune 607 v. o. T. enjenomen worden. Dit Buak es bie Jehova siene Zeijen to haben.