Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

“Blieft en Gott siene Leew”

 DAUT 8. KAPITEL

Gott leeft Menschen, waut rein sent

Gott leeft Menschen, waut rein sent

“Bie de reine best du rein” (PSALM 18:27)

1-3. (a) Wuarom acht eene Mame doaropp, daut äare Kjinja rein un ordentlich lat? (b) Wuarom well Jehova, daut siene Deena rein sent? Wuarom well wie rein bliewen?

EA DE kjliena Jung kaun wua hangonen, deit de Mame dän bereinjen un trakjt dän reine un ordentliche Kjleeda aun. Wuarom deit dee daut? Dee weet, daut de Renlichkjeit goot es fa de Kjinja äare Jesuntheit un daut aundre aun de Kjinja seenen kjennen, waut dee fa Elren haben.

2 Ons himlischa Voda well, daut siene Deena rein sent. En de Schreft sajcht daut: “Bie de reine best du rein” (Psalm 18:27). * Jehova leeft ons un hee weet, daut daut goot fa  ons es, rein to sennen. Wie sent siene Zeijen un hee well, daut wie am un sienen heiljen Nomen veharlichen un nich Schaund opp am brinjen. Daut kjenn wie, wan wie rein un ordentlich sent un ons aunstendich benämen (Hesekiel 36:22; läs 1. Petrus 2:12).

3 To weeten, daut Gott reine Menschen jleicht, es ons eene Help, rein to bliewen. Wie leewen am un doawäajen well wie soo läwen, daut wie am eenen gooden Nomen moaken un en siene Leew bliewen kjennen. Well wie nu mol seenen, wuarom daut needich es, daut wie rein sent, waut doa aules met en es un woo wie rein bliewen kjennen. Soo woa wie moakjen, aus wie ons noch irjentwua vebätren motten.

WUAROM ES DAUT NEEDICH, REIN TO SENNEN?

4-5. (a) Waut es de Hauptsach, wuarom wie motten rein sennen? (b) Woo es daut aun de Natua to seenen, daut Jehova opp Renlichkjeit helt?

4 Jehova es fa ons daut baste Väabilt. En de Schreft woa wie oppjefoddat, doano to sträwen, “am emma änelja to woaren” (Efeesa 5:1). De Hauptsach, wuarom wie motten rein sennen, es aulsoo, wiels Jehova Gott gaunz un goa rein un heilich es (läs 3. Mose 11:44-45).

5 Aun de Natua es to seenen, woo Jehova es un daut hee uk opp Reinheit helt (Reema 1:20). Hee wull, daut de Menschen opp eene reine Ieed läwen kunnen. Doawäajen haft hee daut soo enjerecht, daut de Natua sikj selfst reinicht, biejlikj daut Wota un de Loft. Aun daut es to seenen, daut deejanja, waut de Ieed jemoakt haft, opp Renlichkjeit helt (Jeremia 10:12). Sull wie daut dan nich uk?

6-7. Woo es aun daut Jesaz Moses to seenen, daut Jehova siene Deena motten rein sennen?

6 Jehova, ons hechsta Harscha, velangt, daut siene Deena rein sent. Aun daut Jesaz Moses es to seenen, woo needich  Reinheit bie de Aunbädunk es. De Huaga Priesta biejlikj must sikj aum Veseenungsdach twee Mol boden (3. Mose 16:4, 23-24). Un ea de Priesta Jehova een Opfa brinjen kunnen, musten dee sikj de Henj un de Feet wauschen (2. Mose 30:17-21; 2. Chronik 4:6). Em Jesaz wieren uk soo bie 70 veschiedne Sachen oppjeschräwen, wuaderch eena kjarpalich un fa de Aunbädunk orrein wort. Wan een Israelit orrein wia, kunn dee sikj nich aum Gottesdeenst bedeeljen. Deed dee daut oba doch, kunn dee doafäa dootjemoakt woaren (3. Mose 15:31). Wäa orrein wia, must sikj soo reinjen, aus daut Jesaz velangd. Doa wia uk boden un Kjleeda wauschen met en. Wan dee daut nich deed, dan sull dee “ut de Jemeent utjerot woaren” (4. Mose 19:17-20).

7 Wan wie uk nich unja daut Jesaz Moses sent, kjenn wie doch doarut lieren, woo Gott denkjt, biejlikj daut hee velangt, daut siene Deena rein sent. Jehova haft sikj nich jeendat (Maleachi 3:6). Hee nemt onse Aunbädunk mau dan aun, wan dee rein es (Jakobus 1:27). Doawäajen mott wie weeten, en waut fa Stekjen wie ons motten rein hoolen.

WAUT TALT GOTT FA REIN?

8. Waut es bie rein sennen aules met en?

8 No de Schreft no bediet rein sennen nich bloos, daut eenem sien Kjarpa rein es. Jehova well, daut ons gaunzet Läwen rein es. Doatoo jehieet biejlikj onse Aunbädunk, ons Läweswaundel, onse Jedanken un daut wie uk sest noch renlich sent. Dise vea Dinj well wie ons nu mol unjastonen.

9-10. Waut es met de reine Aunbädunk jemeent? Waut meiden woare Christen?

9 Reine Aunbädunk. Met reine Aunbädunk es jemeent, dän woaren Gloowen nich met faulsche Lieren to veorreinjen. Aus de Juden Babel veleeten un wada trigj no Jerusalem jinjen, musten dee Jehova sien Jeboot nokomen: “Trakjt dort wajch. Schieet nuscht orreinet aun. . . . Moakt junt rein” (Jesaja 52:11). De Juden jinjen hauptsechlich  doawäajen trigj, om Jehova wada soo auntobäden, aus hee daut haben wull. De woare Aunbädunk must rein sennen von de babelonische Glooweslieren un Sitten, waut Gott eenen schlajchten Nomen muaken.

10 Vondoag mott wie uk oppaussen, daut wie ons nich met faulsche Glooweslieren veorreinjen (läs 1. Korinta 10:21). Daut wudd leicht kjennen passieren, wiels dee sikj äwaraul vebreet haben. Väle Sitten un Jewanheiten, waut de Menschen en veschiedne Lenda haben, komen von faulsche Lieren häa, biejlikj von de Lia, daut de Seel onstoaflich es (Liera 9:5-6, 10). Woare Christen meiden aules, waut von faulsche Lieren häakjemt. * Dee loten sikj nich von aundre bat doa brinjen, von de reine Lia ut de Schreft auftoloten (Aposteljeschicht 5:29).

11. Waut jehieet to eenen reinen Läweswaundel? Wuarom mott wie een reinet Läwen fieren?

11 Een reina Läweswaundel. Doatoo jehieet, daut wie jieda Oat Huararie meiden (läs Efeesa 5:5). Daut wie kjennen en Gott siene Leew bliewen, mott wie een reinet Läwen fieren. Soo aus wie en daut näakjste Kapitel en dit Buak seenen woaren, mott wie “von aule Huararie [wajchranen]”. Menschen, waut Huararie begonen un sikj nich endren wellen, “woaren daut Gottesrikj nich oawen” (1. Korinta 6:9-10, 18). Soone Menschen talt Gott mank “de oppscheiselje”, un wan dee nich omkjieren, dan woaren dee met dän tweeden Doot bestroft woaren (Openboarunk 21:8).

12-13. Waut haben onse Jedanken met onse Woakjen to doonen? Woo kjenn wie onse Jedanken rein hoolen?

12 Reine Jedanken fieren. Doano, waut fa Jedanken wie haben, woaren uk onse Woakjen sennen. Wan wie tooloten, daut schlajchte Jedanken sikj en ons Vestaunt ooda Hoat ennasten, woa wie irjentwanea uk waut orreinet doonen  (Matäus 5:28; 15:18-20). Oba wan wie ons met goode un reine Jedanken aufjäwen, woat ons daut eene Help sennen, rein to bliewen (läs Filippa 4:8). Woo kjenn wie daut doonen? Eent es, daut wie aulen Tietvedrief meiden, wua wie opp orreine Jedanken komen. * Un wan wie pinkjlich Gott sien Wuat studieren, woat ons daut halpen, reine Jedanken to fieren (Psalm 19:9-10).

13 Daut wie kjennen en Gott siene Leew bliewen, mott wie doano seenen, daut onse Aunbädunk, ons Läweswaundel un onse Jedanken rein sent. Von daut woa wie en aundre Kapitels en dit Buak noch mea lieren. Oba nu woa wie seenen, daut wie uk sest en ons Läwen motten renlich sennen.

RENLICH SENNEN

14. Wuarom mott wie opp Renlichkjeit achten?

14 Wie motten ons selfst rein hoolen un uk ons Tus. Es onse Renlichkjeit eene Sach, waut aundre nuscht kjemmat? Nä, wiels wie deenen Jehova, un soo aus wie jeseenen haben, well hee, daut wie rein sent. Hee weet, daut daut goot fa ons es. Oba nich bloos daut. Derch onse Renlichkjeit moak wie am uk eenen gooden Nomen. Denkj wie noch eemol aun dän kjlienen Jung. Waut wudden aundre Menschen von dän siene Elren denkjen, wan dän emma schwiensch un vekomen sach? Wie wellen nich, daut doaderch, woo ons lat ooda woo wie läwen, Schaund opp onsen himlischen Voda kjemt ooda daut de Menschen wäajen daut nich no de goode Norecht horchen. Gott sien Wuat sajcht: “Wie jäwen kjeenem de Jeläajenheit, sikj aun waut en onsem Deenst to steeten, daut doavon nich schlajcht jerät woat. Wie bewiesen en aules waut wie doonen, daut wie Gott siene Deena sent” (2. Korinta 6:3-4).  En waut fa Stekjen mott wie dan opp Renlichkjeit bedocht sennen?

15-16. Waut es bie Renlichkjeit aules met en? Opp waut mott wie bie onse Kjleeda achten?

15 Onse Kjleeda un onsen Kjarpa rein hoolen. De Menschen haben daut nich aula äwareen un en eenje Lenda läwen dee sea eefach. Oba auljemeen jeft daut doch emma jenuach Wota un Seep toom sikj un uk de Kjinja pinkjlich boden. To Renlichkjeit jehieet uk, sikj de Henj met Seep to wauschen, ea eena äten deit ooda met Ätwoa omjeit, uk wan eena vom Zekjreet kjemt ooda een Kjint eene reine Winjel omjebungen haft. De Henj met Seep to wauschen kaun Krankheiten väabieejen un Läwes raden. Daut halpt uk, daut Krankheiten sikj nich soo utspreeden, biejlikj soone, waut Derchfaul veuasoaken. En Lenda, wua daut met de  Zekjreets nich fein enjerecht es, wudd eena daut Aufgank veleicht kjennen unjaschedden, soo aus daut Volkj Israel daut doonen sull (5. Mose 23:13-14).

16 Onse Kjleeda motten uk pinkjlich jewoschen, daut dee rein un ordentlich sent. Waut wie ons auntrakjen, brukt nich daut dieeschte ooda von daut nieste sennen, wan daut mau ordentlich, aunstendich un rein es (läs 1. Timotäus 2:9-10). Wie wellen, daut ons emma soo lat, daut wie doaderch “de Lia von Gott, onsen Rada, auntrakjent moaken” (Titus 2:10, NW).

17. Wuarom saul ons Tus un onse Sachen rein un ordentlich sennen?

17 Ons Tus un onse Sachen. Ons Hus saul soo rein un ordentlich sennen aus mäajlich, wan daut veleicht uk mau eefach ooda kjlien es. Un krakjt soo saul ons Foatich von buten un von bennen soo goot aus daut jeit rein jehoolen, besonda wan wie doamet no de Toopkomes foaren ooda em Deenst sent. Wan wie rein un ordentlich sent, es daut een goodet Zeichnis. Schlieslich lia je wie de Menschen, daut Jehova een reina Gott es, waut dee venichten woat, “dee de Ieed vedorwen haben”, un daut sien Rikj de Ieed boolt to een Paradies moaken woat (Openboarunk 11:18; Jesaja 65:21-22). Wie wellen ons aunwanen, daut ons Tus un onse Sachen nu aul soo renlich sent, aus daut fa de niee Welt paussent es.

Wäa renlich es, helt sikj selfst un siene Sachen rein

18. Woo wies wie, daut daut Vesaumlungshus fa ons waut besondret es?

18 Ons Vesaumlungshus. Daut Vesaumlungshus es eene Städ, wua Jehova aunjebät woat, un wiels wie am väl räakjnen, see wie emma doano, daut daut goot en Ordninj es. Wan daut pinkjlich besorcht un unjahoolen woat, lat daut väl moakhauftja un daut es uk een goodet Zeichnis fa de Niee, waut doa hankomen. Wan wie soo goot aus wie kjennen biem besorjen un oppfiksen methalpen, wies wie, daut daut Vesaumlungshus fa ons waut besondret es. Doawäajen  näm wie ons wellich Tiet, daut to vebätren un bruckboa to hoolen (2. Chronik 34:10). Un krakjt soo doo wie daut uk met de Jebieda, wua wie onse Kongressen aufhoolen.

ONS VON AULES REINJEN, WAUT KJARPA UN JEIST BESUDELT

19. Waut mott wie meiden, daut wie kjennen rein bliewen? Woo halpt de Schreft ons doabie?

19 Rein to sennen bediet uk, aules to meiden, waut onsen Kjarpa besudelt. Daut kaun biejlikj soont sennen aus schmieekjen, supen un Sachen brucken, waut aun eenem sien Vestaunt waut doonen ooda wua eena aufhenjich von woat, buta daut es toom doktren. Vondoag jeft daut väle orreine Aunjewanheiten, wua de Schreft nich krakjt von rät, oba daut jeft biblische Gruntsauzen, waut ons wiesen, woo Jehova doaräwa denkjt. Un wiels wie Jehova leewen, well wie daut doonen, waut hee fa rajcht talt. Well wie doatoo mol fief biblische Gruntsauzen seenen.

20-21. Von waut well Jehova, daut wie wajchbliewen? Wuarom sell wie rein bliewen?

20 “Leewe Frind, wan ons dit aula vesproaken es, dan well wie ons nu von aules reinjen waut Kjarpa un Jeist besudelt, un en Gottesforcht heilich läwen” (2. Korinta 7:1). Jehova well, daut wie von aules wajchbliewen, waut onsen Kjarpa veorreinicht un onsen Jeist ooda onse Jesennunk schoden kaun. Doawäajen mott wie aules tochloten, wua wie kjennen aufhenjich von woaren un waut schlajcht fa onse Jesuntheit un ons Vestaunt es.

21 De Schreft sajcht ons krakjt, wuarom wie ons “von aules reinjen” sellen, waut ons besudelt. Soo aus 2. Korinta 7:1 sajcht, sell wie daut doonen, wiels ons waut “vesproaken es”. Waut es daut? Een poa Varzh ea säd Jehova: “Ekj [well] junt aunnämen. Ekj well jun Voda sennen” (2. Korinta 6:17-18). Stal wie ons daut mol väa: Jehova vesprakjt ons, ons soo to beschitzen un to leewen aus een Voda siene  Kjinja deit. Oba daut woat hee bloos doonen, wan wie onsen “Kjarpa un Jeist” rein hoolen. Wudd sikj daut werkjlich betolen, bloos wäajen eene orreine Aunjewanheit Jehova aus Frint to velieren?

22-25. Waut fa biblische Gruntsauzen halpen ons, schlajchte Aunjewanheiten to meiden?

22 “Du saust dän Harn, dienen Gott, met dien gaunzet Hoat goot sennen, un met diene gaunze Seel, un met aul diene Jedanken” (Matäus 22:37). Soo aus Jesus säd, es dit daut jratste Jeboot (Matäus 22:38). Un Jehova haft daut uk vedeent, daut wie am soo aus dit leewen. Doawäajen mott wie aules tochloten, waut ons Läwen aufkjarten ooda ons Vestaunt schoden kaun, waut Gott ons jeschonken haft.

23 “[Jehova] jeft aule Menschen Läwen un Odem un aulet aundre” (Aposteljeschicht 17:24-25). Gott haft ons daut Läwen jeschonken un doafäa sent wie sea dankboa. Un wie leewen Jehova uk. Doawäajen meid wie aule Aunjewanheiten, waut onse Jesuntheit schoden kjennen. Wan wie daut nich doonen wudden, wudd wie daut Läwen nuscht achten, waut Jehova ons jejäft haft (Psalm 36:10).

24 “Du saust dienen Noba jrod soo goot sennen aus die selfst” (Matäus 22:39). Orreine Aunjewanheiten schoden foaken nich bloos dän, waut dee haft. Wan doa biejlikj wäa schmieekjt, schot daut uk dee, waut doa biesied sent un sikj dän Ruak enholen motten. Un wäa aundre schot, haundelt jäajen Gott sien Jeboot, dän Näakjsten goot to sennen, un bewiest uk, daut hee Gott nich opp iernst leeft (1. Johanes 4:20-21).

25 “Hool an daut väa, daut see de Rejierunk un dee, dee Jewault äwa an haben, sellen jehorchen” (Titus 3:1). En väle Lenda es daut veboden, Droggs to haben ooda dee to brucken. Doawäajen haben woare Christen met soone Sachen nuscht to doonen (Reema 13:1).

26. (a) Waut mott wie doonen, daut wie kjennen en Gott siene Leew bliewen? (b) Wuarom jeft daut nuscht bätret, aus een reinet Läwen to haben?

 26 Wan wie en Gott siene Leew bliewen wellen, mott wie en aules rein bliewen, nich bloos en jewesse Stekjen. Met orreine Jewanheiten un Lausta opptohieren un doavon frietobliewen es leichta jesajcht aus jedonen. Oba daut es mäajlich. * Daut jeft nuscht bätret, aus soo to läwen, aus Jehova daut haben well. Waut hee ons lieet, es emma goot fa ons (läs Jesaja 48:17). Un daut baste es: Wan ons gaunzet Läwen rein es, moak wie Gott eenen gooden Nomen. Daut moakt ons sea tofräd, wiels wie am väl räakjnen un en siene Leew bliewen wellen.

^ Varsch 2 De Wieed, waut en de Schreft met “rein” äwasat sent, kjennen bedieden, daut eena renlich es, oba foakna haben dee doamet to doonen, daut eenem sien Läwen ooda siene Aunbädunk rein es.

^ Varsch 12 Daut 6. Kapitel en dit Buak haundelt sikj doavon, woo wie gooden Tietvedrief haben kjennen.

^ Varsch 67 Daut es nich werkjlich dee äa Nomen.