Trigj nom Enhault

No de Enhaultslist gonen

 AUNHANK

De Flag bejreessen, wälen ooda Oabeit doonen enne Städ Millitäadeenst

De Flag bejreessen, wälen ooda Oabeit doonen enne Städ Millitäadeenst

De Flag bejreessen. Foaken bekjen de Menschen sikj ver de Flag ooda bejreessen dee, un eenjemol woat doabie uk noch een Leet jespält ooda jesungen. Jehova siene Zeijen talen daut fa Jettadeenst. Wuarom? Wiels eena doaderch auntovestonen jeft, daut nich Gott, oba daut Launt ooda de Rejierungsmana eenem ut de Trubbels ruthalpen (Jesaja 43:11; 1. Korinta 10:14; 1. Johanes 5:21). Soont jeef daut ieeschtemma uk aul. Nebukadnezar, de majchtja Kjennich von Babel, wull de Menschen siene Harlichkjeit wiesen un uk woo iernst am daut met sienen Gloowen wia. Doawäajen stald hee eene groote Jestault opp un velangd, daut aule sikj ver dee bekjen sullen, wan een Leet jespält wort. Wäa daut nich deed, sull stoawen. Oba de dree Hebräa Schadrach, Meschach un Abed-Nego bekjten sikj nich (Daniel, Kapitel 3).

De Jeschichtsforscha Carlton Hayes schrift äwa de vondoagsche Tiet: “De Flag es daut Tieekjen, waut bie de Laundesveierunk daut mieeschte jebrukt un veieet woat . . . De Mana nämen sikj ver de Flag dän Hoot auf, de Dichta preisen dee met äare Jedichta un de Kjinja met äare Leeda.” Hee schrift wieda, daut daut bie de Laundesveierunk uk “Heljedoag” jeft, soo aus biejlikj dän 4. Juli en de Stäts. Daut jeft doa uk “Heilje un Rada” un soone Städen, wua daut Launt ooda de Laundestieekjen jeieet ooda veieet woaren. Bie een Toopkomen en Brasilien säd de Präsident von daut hechste Millitäajerecht: “De Flag woat jeieet  un veieet . . . krakjt soo aus daut Vodalaunt veieet woat.” Un de Encyclopedia Americana säd: “De Flag es heilich soo aus daut Kjriez”.

En eene niedre Utgow von de Encyclopedia Americana sajcht daut, daut de Leeda, waut fa daut Launt jesungen woaren, “auntovestonen jäwen, daut eena sien Launt fa besonda talt un Gott doano frajcht, daut dee de Menschen von daut Launt ooda de Harscha schitzen un leiden saul.” Daut es aulsoo nich äwadräwen, daut Jehova siene Zeijen daut doafäa hoolen, daut eene Feia fa een Launt, wua de Flag bejreest un fa daut Launt jesungen ooda Musikj jespält woat, met Jettadeenst to doonen haft. Daut Buak The American Character rät doaräwa, daut de Kjinja von Jehova siene Zeijen en de School nich de Flag bejreesten un uk nich opp dee schwieeden. Doa sajcht daut: “Daut hechste Jerecht haft schlieslich bie miere Uadeel bestädicht, daut dise Sitten eene Sort Aunbädunk sent.”

Wan Jehova siene Zeijen dise Sitten uk nich metmoaken, wiels dee fa an to beseenen jäajen de Schreft sent, weeten dee doch, daut aundre daut Rajcht haben, daut to doonen. Wie achten de Laundesflag aus een Tieekjen fa de Rejierungsmacht un sent de Laundesrejierunk unjadon, wiels “de Rejierungen” sent aus “Gott sien Deena” aunjestalt (Reema 13:1-4). Doawäajen hool wie ons aun dän Rot, “fa de Kjennichs un aule dee huach aunjestalt sent” to bäden, soo “daut wie en Gottesforcht un Opprechtichkjeit ruich läwen kjennen” (1. Timotäus 2:2).

Polietische Wolen. Woare Christen hoolen aundre nich doavon auf, wälen to gonen. Wan doa wua eene Wol es, schaufen dee doa nich jäajen. Dee sent de Rejierunk, waut jewält es, unjadon. Oba dee sent sikj gaunz eenich, sikj opp kjeenem siene Sied to stalen, wan daut om polietische Sachen jeit (Matäus 22:21; 1. Petrus 3:16). Waut saul een Christ en soon Launt doonen, wua jieda eena stemmen mott ooda wua se sikj sea oppräajen, wan eena doa nich hanjeit? Wan sien Jewessen daut toolat, wudd dee kjennen no de Städ gonen, wua de Wol es, wiels Schadrach, Meschach un Abed-Nego jinjen je uk no de Dura-Stapen. Hee wudd oba oppaussen, daut hee doa nich jäajen sienen Gloowen haundeld. Doatoo sull hee äwa sas Gruntsauzen nodenkjen:

  1.   Jesus siene Nofolja “sent . . . nich von dise Welt” (Johanes 15:19).

  2. Christen veträden Christus un sien Kjennichrikj (Johanes 18:36; 2. Korinta 5:20).

  3. Aule, waut to de Christenvesaumlunk jehieren, sent em Gloowen veeent un en de christelje Leew vebungen (1. Korinta 1:10; Kolossa 3:14).

  4. Deejanje, waut fa eenen Rejierungsmaun stemmen, sent uk doafäa veauntwuatlich, waut dee deit. (See doatoo de Gruntsauzen, waut en 1. Samuel 8:5, 10-18 un 1. Timotäus 5:22 to finjen sent.)

  5. Aus de Israeliten eenen menscheljen Harscha wullen, tald Jehova daut doafäa, daut see am veschmäten hauden (1. Samuel 8:7).

  6. Christen motten met een frieet Jewessen to aulem äwa Gott sien Kjennichrikj räden kjennen, endoont woo deejanje äwa Politikj denkjen (Matäus 24:14; 28:19-20; Hebräa 13:18).

Oabeit enne Städ Millitäadeenst. En eenje Lenda velangt de Rejierunk, daut deejanje, waut nich Millitäadeenst doonen wellen, enne Städ daut fa eene jewesse Tiet fa de Rejierunk Oabeit doonen motten, waut nuscht met daut Millitäa to doonen haft. Wäa en soone Loag es, kaun Jehova no Weisheit froagen, veleicht met eenen erfoarnen Brooda doaräwa räden un dan no sien Jewessen no entscheiden (Spricha 2:1-5; 11:14).

Gott sien Wuat sajcht, wie sellen “de Rejierunk un dee, dee Jewault äwa . . . [ons] haben, . . . jehorchen, un emma reed sennen goodet to doonen.” Wie sellen uk “derchjedocht sennen” (Titus 3:1; 3:2, NW). Ea wie ons aulsoo fa waut entscheiden, sell wie äwalajen: “Wudd ekj bie soone Oabeit waut doonen motten, waut jäajen mienen christeljen Gloowen wia, ooda wudd ekj doaderch waut met dän faulschen Gloowen to doonen haben?” (Micha 4:3, 5; 2. Korinta 6:16-17). “Wudd daut doaderch schwoa ooda ommäajlich sennen, miene Veauntwuatunk aus Christ notokomen?” (Matäus 28:19-20; Efeesa 6:4; Hebräa 10:24-25). “Ooda wudd ekj derch soone Oabeit mau rajcht mea Tiet fa daut jeistelje haben un biejlikj kjennen em Voltietdeenst sennen?” (Hebräa 6:11-12).

 Wan een Christ sikj eenich woat, daut hee enne Städ Millitäadeenst soone Oabeit doonen well, soo daut hee nich em Jefenkjnis kjemt, dan sellen aundre Christen am wäajen daut nich rechten (Reema 14:10). Wan hee soone Oabeit wäajen sien Jewessen oba nich doonen well, dan sellen de aundre dän daut uk nich veachten (1. Korinta 10:29; 2. Korinta 1:24).