Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Woo de Ehe un Famielje kaun schaftich sennen

 8. POAT

Wan doa waut schlemmet woat

Wan doa waut schlemmet woat

“Jie [sent] froo, wan jie hia uk noch een stootje derch lieden gonen motten” (1. Petrus 1:6)

Wan jie uk jun bastet doonen, om eenen gooden Ehestaunt un eene schaftje Famielje to haben, kaun doawäajen mol waut schlemmet woaren (Liera 9:11). En soone Tiet jeft Gott ons leeftolich siene Help. Hia jeft daut Rot ut de Schreft, waut junt halpen kaun, mau rajcht met de schwanste Loagen foadich to woaren, onen de Freid to velieren.

 1 VELOT JUNT OPP JEHOVA

WAUT DE SCHREFT SAJCHT: “Schmiet aul june Sorjen opp am; hee sorcht fa junt” (1. Petrus 5:7). Hoolt emma em Denkj, daut et nich Gott siene Schult es, wan doa Trubbels sent (Jakobus 1:13). Wan jie am noda komen, dan woa jie de baste Help kjrieen, waut daut jeft (Jesaja 41:10). En Psalm 62:9 sajcht daut: “Schett jun Hoat ver am ut”.

Jie woaren uk Troost kjrieen, wan jie jieda Dach de Schreft läsen un studieren. Dan woa jie beläwen, woo Jehova “ons en aul onse Trubbels [treesten deit]” (2. Korinta 1:3-4; Reema 15:4). Hee vesprakjt junt sienen “Fräd, dee wiet äwa aules jeit waut Menschen vestonen kjennen” (Filippa 4:6-7).

WAUT JIE DOONEN KJENNEN:

  • Bät to Jehova, daut dee junt halpt, ruich to bliewen un kloa to denkjen

  • Denkjt äwa aule Mäajlichkjeiten no, waut jie haben, un wält junt de baste ut

2 SIET OM JIEDA EENEM ENNE FAMIELJE TODOONEN

WAUT DE SCHREFT SAJCHT: “Een kluaka Maun saumelt Weisheit, un däm Weisen siene Uaren sieekjen doano” (Spricha 18:15). Prooft, soo väl aus mäajlich äwa junen Trubbel ruttofinjen. Seet, waut jieda eenem en june Famielje fält. Rät met dee un horcht dee too (Spricha 20:5).

Waut, wan doa wäa jestorwen es, dän jie väl jeräakjent haben? Jie brucken junt nich schämen to wiesen, daut jie truarich sent. Denkjt doaraun, daut mau rajcht “Jesus hield” (Johanes 11:35; Liera 3:4). Sikj to vereiwen un jenuach to schlopen kaun eene groote Help sennen (Markus 6:31). Soo kaun eena bäta met eene schwoare Loag foadich woaren.

WAUT JIE DOONEN KJENNEN:

  • Unjahoolt junt foaken aus Famielje. Soo woat junt daut leichta sennen, unjarenaunda to räden, wan doa mol waut schlemmet woat

  • Rät met soone Menschen, waut uk derch soowaut jegonen sent

 3 FROACHT AUNDRE NO HELP

WAUT DE SCHREFT SAJCHT: “Een Frint woat emma Leew bewiesen, un een Brooda es jebuaren toom em Trubbel biestonen” (Spricha 17:17). Secha wellen june Frind junt halpen, oba veleicht weeten dee nich woo. Doawäajen wudd jie dee daut kjennen sajen, waut junt fält (Spricha 12:25). Sieekjt uk no jeistelje Help. Soone, waut de Schreft goot vestonen, kjennen junt biblischen Rot jäwen, waut junt wiedahalpen woat (Jakobus 5:14).

Wan jie emma wada met soone Menschen toopkomen, waut eenen stoakjen Gloowen haben un sikj opp Gott siene Vespräakjen veloten, dan woa jie de Help kjrieen, waut jie brucken. Junt woat daut uk een groota Troost sennen, wan jie aundre en äare Trubbels Moot moaken. Vetalt dee, waut jie äwa Jehova jelieet haben un äwa daut, waut hee vesproaken haft. Hoolt junt doamet drock, dee bietostonen, waut daut fält, un trakjt junt nich von dee trigj, waut junt leewen un om junt bekjemmat sent (Spricha 18:1; 1. Korinta 15:58).

WAUT JIE DOONEN KJENNEN:

  • Rät met eenen gooden Frint un nämt dän siene Help aun

  • Sajcht daut gaunz opprechtich, waut junt krakjt fält

Noch mea doaräwa

EENE GOODE NORECHT VON GOTT

Wuarom lat Gott too, daut daut soo väl lieden un beeset jeft?

Von wua kjemt aul daut schlajchte häa un wuarom lat Gott daut too? Woat daut lieden noch mol opphieren?