Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Woo de Ehe un Famielje kaun schaftich sennen

 2. POAT

Sie dienen Poatna tru

Sie dienen Poatna tru

“Waut Gott jebungen haft, saul de Mensch nich uteneen leesen” (Markus 10:9)

Jehova well, daut eena saul tru sennen (Spricha 5:15). Em Ehestaunt es daut besonda needich, wiels wan eena sienen Poatna nich tru es, es doa kjeen Vetruen. Un onen Vetruen kaun de Leew nich waussen.

Vondoag dän Dach es daut nich emma leicht, dän Poatna tru to bliewen. Daut daut met junen Ehestaunt nich boajauf jeit, motst du die eenich sennen, tweeatlei to doonen.

 1 TAL DIENEN EHESTAUNT FA WAUT BESONDRET

WAUT DE SCHREFT SAJCHT: “Jie [sellen] fauststalen lieren, waut daut aulabaste es” (Filippa 1:10). Eent von daut baste, ooda ieeschte en dien Läwen saul jun Ehestaunt sennen. Nemm dän sea iernst.

Jehova well, daut du om dienen Poatna todoonen best un daut jie toop een scheenet Läwen haben (Liera 9:9). Hee well nich, daut du äwa dienen Ehepoatna endoontich woascht; beid sellen no Jeläajenheiten sieekjen, dän aundren eene Freid to moaken (1. Korinta 10:24). Wies dienen Ehepoatna, daut dee fa die väl wieet es un daut du sea tofräd best met dän.

WAUT JIE DOONEN KJENNEN:

  • Nemm die räajelmässich Tiet fa dienen Poatna un lot die dan nich von waut auflenkjen

  • Denkj nich bloos aun die, oba aun junt beid

 2 PAUSS NO DIEN HOAT OPP

WAUT DE SCHREFT SAJCHT: “Wäa een Frumensch doaropp aunkjikjt, daut hee ar haben mucht, haft bie sikj em Hoat aul met ar de Ehe jebroaken” (Matäus 5:28). Wan doa wäa emma wada orreine Jedanken fieet, es dee sienen Poatna en jewessen Senn aul ontru.

Jehova sajcht: “Moak secha daut du em Hoat weis best” (Spricha 4:23; Jeremia 17:9, NW). Daut kaust du, wan du oppaust, wua du hankjikjst (Matäus 5:29-30). Doo daut soo aus de trua Hiob; hee beräd daut met siene Uagen, nich no aundre Frues to kjikjen (Hiob 31:1). Sie die gaunz eenich, kjeenmol noaktje Bilda to kjikjen. Un lot daut nienich bat doa komen, daut du die aun eenen aundren veleefst.

WAUT JIE DOONEN KJENNEN:

  • Lot aundre enwoaren, daut du befriet best un die met dienen Poatna vebungen feelst

  • Denkj emma aun dienen Poatna siene Jefeelen; wan sikj dän daut soo späaren kunn, daut daut tweschen die un eenen aundren aul too wiet jinkj, dan moak fuaz een Enj doamet