Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Eene goode Norecht von Gott

 6. POAT

Woaren dee, waut jestorwen sent, wada läwen?

Woaren dee, waut jestorwen sent, wada läwen?

1. Woaren dee, waut jestorwen sent, oppstonen?

Vea Doag nodäm Jesus sien Frint Lazarus jestorwen wia, kjeem Jesus no Betanien, een Darp dicht bie Jerusalem. Hee jinkj met Lazarus siene Sestren Marta un Maria nom Grauf un an kjeemen noch een Deel Menschen hinjaraun. Woo schaftich motten Marta un Maria jewast sennen, aus Jesus Lazarus vom Doot oppwuak. Läs Johanes 11:21-24, 38-44.

Marta jleewd aul aun de goode Norecht, daut de Vestorwne oppstonen un wada oppe Ieed läwen wudden. See wist, daut Jehova daut vesproaken haud. Läs Hiob 14:14-15.

2. Waut es met dee, waut jestorwen sent?

Gott säd to Adam: “Du best von de Ieed jenomen, un du woascht wada Ieed woaren” (1. MOSE 3:19)

De Menschen sent von Ieed jemoakt (1. Mose 2:7; 3:19). Wie haben nich eene onstoafelje Seel, waut en onsen fleescheljen Kjarpa wont. Wan wie stoawen, es doa nuscht, waut wiedaläft, uk nich ons Vestaunt. Wäa doot es, kaun nich mea denkjen. Doawäajen haft Lazarus uk nuscht vetalt von de Tiet, aus hee doot wia. Läs Psalm 146:4; Liera 9:5-6, 10.

Kjwält Gott de Vestorwne em Fia? De Schreft sajcht, de Vestorwne weeten nuscht. Woo wudd de Lia dan kjennen rajcht sennen, daut dee em Halenfia jekjwält woaren? Dise Lia moakt Gott eenen schlajchten Nomen, wiels am wudd daut nich mol em Senn komen, Menschen em Fia to kjwälen. Läs Jeremia 7:31.

 3. Kjennen de Vestorwne met ons räden?

Dee, waut jestorwen sent, kjennen nich räden uk nich hieren (Psalm 115:17). Oba daut jeft beese Jeista, waut met de Menschen räden un an enbillen, daut see de Vestorwne sent (Judas 6). Jehova es daut sea jäajenaun, wan eena prooft, sikj met de Vestorwne to unjahoolen. Läs 5. Mose 18:10-11.

4. Wäa woat vom Doot oppstonen?

Millionende Menschen woaren vom Doot oppstonen un wada oppe Ieed läwen. Doa sent uk soone mank, waut Gott nich kjanden un schlajchtet jedonen haben. Läs Psalm 37:29; Aposteljeschicht 24:15.

Dee, waut wada toom läwen komen, kjennen de Woarheit äwa Gott lieren. Dee kjennen uk bewiesen, daut see aun Jesus jleewen, wan see am jehorchen (Openboarunk 20:11-13). Soo kjennen see dan fa emma oppe Ieed läwen. Läs Johanes 5:28-29.

5. Waut wiest ons daut Oppstonen vom Doot äwa Jehova?

Daut Oppstonen vom Doot es mäajlich, wiels Gott sienen Sän jeschekjt haft, fa ons to stoawen. Daut wiest, woo groot Jehova siene Leew un Jnod es. Wäm wurscht du jleichen wada to seenen, wan de Vestorwne ieescht oppstonen? Läs Johanes 3:16; Reema 6:23.