Trigj nom Enhault

No de Enhaultslist gonen

 2. POAT

Wäa es Gott?

Wäa es Gott?

1. Wuarom saul eena Gott aunbäden?

De woara Gott haft aules jemoakt. Hee haft kjeenen Aunfank uk kjeen Enj (Psalm 90:2). Von am kjemt de goode Norecht, ooda daut Evangelium, waut en de Schreft es (1. Timotäus 1:11). Gott haft ons daut Läwen jejäft, un doawäajen saul eena bloos am aunbäden. Läs Openboarunk 4:11.

2. Woo es Gott?

Gott es nich Fleesch un Bloot soo aus wie. Hee es een majchtja Jeist, un am haft noch kjeen Mensch jeseenen (Johanes 1:18; 4:24). Oba derch daut, waut Gott jemoakt haft, weet eena, woo hee es. Biejlikj es aun de veschiedne Sorten Frucht un Bloomen to seenen, woo väl Leew un Weisheit Gott haft. Un aun daut groote Weltaul met aul de Stierns es siene Macht to seenen. Läs Reema 1:20.

Eena lieet noch mea äwa Gott, wan eena de Schreft läst. Dee sajcht ons, waut Gott jefelt un waut nich, woo hee de Menschen behaundelt un woo hee met veschiedne Loagen omjeit. Läs Psalm 103:7-10.

3. Haft Gott eenen Nomen?

Jesus säd: “Ons Voda em Himmel! Dien Nomen saul heilich jehoolen woaren” (Matäus 6:9). Gott haft veschiedne Tietels, oba mau eenen Nomen. Doano, waut fa eene Sproak eena rät, woat dee dan utjesproaken. Opp Plautdietsch sajcht eena jeweenlich “Jehova”. Eenje sajen uk “Jahwe”. Läs Psalm 83:19. *

En väle Biblen haben see Gott sienen Nomen utjeloten un enne Städ daut “Har” ooda “Gott” nenjeschräwen. Oba  ieeschtemma wia Gott sien Nomen en de Schreft soo bie 7 000 Mol bennen. Aus Jesus de Menschen äwa Gott lieed, brukt hee dän sienen Nomen. Läs Johanes 17:26.

4. Es Jehova om ons bekjemmat?

Soo aus een leeftolja Voda well Gott, daut ons daut oppe Lenjd goot jeit

Wan Jehova werkjlich om ons bekjemmat es, wuarom motten dan soo väl Menschen lieden? Eenje sajen, daut es, wiels dee ons aufproowen well. Oba daut es nich soo. Läs Jakobus 1:13.

Gott jeft ons de Frieheit, selfst to entscheiden. Schaz wie daut nich, daut wie wälen kjennen, aus wie am deenen wellen? (Josua 24:15). Oba väle wälen sikj, schlajchtet to doonen, un doawäajen woat daut enne Welt emma schlemma. Dit moakt Jehova sea truarich. Läs 1. Mose 6:5-6.

Jehova es om ons bekjemmat un well daut baste fa ons. Boolt woat hee met daut lieden een Enj moaken, uk met dee, waut daut aunrechten. Oba nu lat hee daut noch too. En daut 8. Poat von dit Heft woa wie seenen, daut hee goode Uasoak doafäa haft. Läs Psalm 37:10-11; Spricha 2:21-22.

5. Woo kaun eena Gott noda komen?

Jehova well, daut wie to am bäden un am soo noda komen. Hee es om jiedren eenen bekjemmat (Psalm 65:3; 145:18). Un hee es reed to vejäwen. Hee weet, daut wie Fäla moaken, oba hee schazt daut, wan eena sikj bemieecht, sienen Wellen to doonen. Wie kjennen aulsoo Gott siene Frind sennen, wan wie uk onvolkomen sent. Läs Psalm 103:12-14; Jakobus 4:8.

Jehova jeef ons daut Läwen; doawäajen sell wie am daut mieeschte räakjnen (Markus 12:30). Wäa Gott väl räakjent, woat sikj bemieejen, mea äwa am to lieren un daut to doonen, waut am jefelt. Soo kjemt eena Gott emma noda. Läs 1. Timotäus 2:4; 1. Johanes 5:3.

^ Varsch 4 Läs die daut no, woo daut Wuat “Har” en dän Toosauz “Butajeweenelje Wieed” en De Plautdietsche Bibel utjelajcht es, uk waut daut hinjen en de Friesenbibel en de korte Wuaterkjläarunk äwa Gott sienen Nomen sajcht.