Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Eene goode Norecht von Gott

 14. POAT

Wuarom haft Gott eene Organisazion?

Wuarom haft Gott eene Organisazion?

1. Wuarom deed Gott de Israeliten organisieren?

Gott organisieed Abraham siene Nokomen. Daut bediet, hee jeef an Jesazen un muak een Volkj von an. Dit Volkj nand hee “Israel”. Dee sullen doano seenen, daut Gott rajcht aunjebät wort un daut Gott sien Wuat bewoat bleef (Psalm 147:19-20). Daut wia Menschen von aule Velkja toom gooden. Läs 1. Mose 22:18.

De Israeliten sullen Gott siene Zeijen sennen. Dee sent een Bewies doafäa, woo goot daut es, wan eena sikj aun Gott siene Jesazen helt (5. Mose 4:6). Derch de Israeliten kunnen aundre dän woaren Gott kjanen lieren. Läs Jesaja 43:10, 12.

2. Wuarom sent woare Christen organisieet?

Met de Tiet vespälden de Israeliten Jehova siene Jnod. Doawäajen wäld hee sikj de Christenvesaumlunk aus sien Volkj (Matäus 21:43; 23:37-38). Nu sent nich mea de Israeliten siene Zeijen, oba de woare Christen. Läs Aposteljeschicht 15:14, 17.

Jesus organisieed siene Nofolja, daut see kunnen Menschen von aule Velkja prädjen un Jinja moaken (Matäus 10:7, 11; 24:14; 28:19-20). Nu, en de latste Doag von dise Welt, es dit Woakj voll em ranen. Noch kjeenmol ea haft Jehova millionende Menschen ut aule Velkja em woaren Gloowen veeent (Openboarunk 7:9-10). Wiels woare Christen organisieet toopschaufen, kjennen dee sikj unjarenaunda oppmuntren un halpen. Oppe gaunze Welt woat bie dee äare Toopkomes dautselwje jelieet. Läs Hebräa 10:24-25.

 3. Woo haft daut en de vondoagsche Tiet met Jehova siene Zeijen aunjefongen?

En de 1870ja Joaren vestunt eene kjliene Grupp Bibelforscha soo bie sacht biblische Woarheiten, waut lang wieren em diestren jewast. Dee wisten, Jesus haud de Christenvesaumlunk oppjestalt toom prädjen. Soo fungen dee aun, de goode Norecht vom Kjennichrikj en väle Lenda bekaunttomoaken. Von 1931 aun nanen dee sikj Jehova siene Zeijen. Läs Aposteljeschicht 1:8; 2:1, 4; 5:42.

4. Woo sent Jehova siene Zeijen organisieet?

Em ieeschten Joahundat jeef daut en miere Lenda Christenvesaumlungen. Dee worden von eenen Väastaunt jeleit, waut Jesus, daut Haupt von de Vesaumlunk, unjadon wia (Aposteljeschicht 16:4-5). Krakjt soo haben uk Jehova siene Zeijen vondoag eenen Väastaunt. Daut sent erfoarne Eltestasch, waut äwa de Offizen von Jehova siene Zeijen en de gaunze Welt aunjestalt sent. En dise Offizen woaren biblische Bieekja opp mea aus 600 Sproaken äwasat, jedrekjt un veschekjt. Soo kaun de Väastaunt de äwa 100 000 Vesaumlungen oppe gaunze Welt met Rot ut de Schreft aunleiden un oppmuntren. En jieda Vesaumlunk sent jeieejende Mana aus Eltestasch aunjestalt, waut sikj leeftolich om Gott siene Häad kjemren. Läs 1. Petrus 5:2-3.

Jehova siene Zeijen sent organisieet, om de goode Norecht to prädjen un Jinja to moaken. Wie prädjen von Hus to Hus, soo aus de Apostel deeden (Aposteljeschicht 20:20). Un met dee, waut sikj fa de Woarheit intressieren, studia wie de Bibel. Oba wie sent nich bloos eene Organisazion. Wie sent eene Famielje met eenen leeftoljen himlischen Voda un sent om onse Gloowesbreeda bekjemmat (2. Tessalonicha 1:3). Wie schaufen toop, wiels wie Gott jefaulen un aundre halpen wellen. Doawäajen sent wie de jlekjlichste Famielje oppe gaunze Welt. Läs Psalm 33:12; Aposteljeschicht 20:35.