Trigj nom Enhault

No de Enhaultslist gonen

 12. POAT

Woo kaun eena Gott noda komen?

Woo kaun eena Gott noda komen?

1. Horcht Gott no aule Jebäda?

Gott jeft aule Menschen de Jeläajenheit, to am to bäden (Psalm 65:3). Oba hee nemt nich aule Jebäda aun. Aus biejlikj de Israeliten nich opphieeden, schlajchtet to doonen, wull Jehova äare Jebäda nich mea hieren. Soont kaun uk passieren, wan een Maun siene Fru schlajcht behaundelt (1. Petrus 3:7). Wan oba wäa schwoa jesindicht haft un dän daut opp iernst leet es, woat Gott no dän horchen. Daut es gaunz waut besondret, daut wie to Gott bäden kjennen. Läs Jesaja 1:15; 55:7.

2. Woo saul eena bäden?

Daut Jebäd jehieet to onsen Deenst fa Gott; doawäajen sell wie bloos to Jehova bäden (Matäus 4:10; 6:9). Oba wie sellen daut en Jesus sienen Nomen doonen, wiels wie aula onvolkomen sent un hee fa onse Sinden jestorwen es (Johanes 14:6). Jehova well nich, daut wie utwendich jelieede ooda oppjeschräwne Jebäda sajen. Onse Jebäda sellen von Hoaten komen. Läs Matäus 6:7; Filippa 4:6-7.

Jehova hieet ons mau rajcht, wan wie opp stelles bäden (1. Samuel 1:12-13). Hee jeft ons de Jeläajenheit, emma to am to bäden, biejlikj verem äten, wan wie oppstonen, schlopen gonen ooda wan wie Trubbels haben. Läs Psalm 55:23; Matäus 15:36.

3. Wuarom es daut soo wichtich, daut Christen toopkomen?

Väle jleewen nich aun Gott ooda spotten soogoa äwa dän sien Vespräakjen, daut daut oppe Ieed noch mol woat Fräd jäwen. Wan wie met soone toop sent, es daut nich leicht,  Gott noda to komen (2. Timotäus 3:1, 4; 2. Petrus 3:3, 13). Oba wan wie met Gloowesbreeda toopkomen, kjenn wie ons unjarenaunda oppmuntren. Läs Hebräa 10:24-25.

Met Menschen toop to sennen, waut Gott leewen, halpt eenem, Gott noda to komen. Bie de Toopkomes von Jehova siene Zeijen kaun eena derch aundre äaren Gloowen fresch Moot kjrieen. Läs Reema 1:11-12.

4. Woo kaun eena Gott noda komen?

Eena kaun Jehova noda komen, wan eena bäden deit un äwa daut nodenkjt, waut eena ut de Schreft jelieet haft, biejlikj äwa Gott siene Woakjen, siene Vespräakjen un sienen Rot. Soo woa wie emma bäta vestonen kjennen, woo groot Gott siene Leew un Weisheit es. Läs Josua 1:8; Psalm 1:1-3.

Eena kjemt Gott mau dan noda, wan eena sikj opp dän velat un Gloowen haft. Eene Plaunt mott pinkjlich jegoten, daut dee jalsta blift. Soo es daut uk met dän Gloowen. Daut dee stoakj blift, mott wie ons emma wada unjastonen, wuarom wie aun jewesse Sachen jleewen. Läs Matäus 4:4; Hebräa 11:1, 6.

5. Wuarom loont sikj daut, Gott noda to komen?

Jehova es om dee bekjemmat, waut am leewen. Hee kaun ons doafäa beschitzen, daut wie nich onsen Gloowen ooda de Hopninj opp daut eewje Läwen vespälen (Psalm 91:1-2, 7-10). Hee woarnt ons uk fa Sachen, waut onse Jesuntheit schoden ooda ons de Freid aum Läwen vedoawen kjennen. Jehova wiest ons, woo wie kjennen daut baste Läwen haben. Läs Psalm 73:27-28; Jakobus 4:4, 8.