Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 54

Jehova haft Jedult met Jona

Jehova haft Jedult met Jona

En de assierische Staut Ninive wieren de Menschen sea schlajcht. Jehova säd to sienen Profeet Jona, hee sull no Ninive gonen un de Menschen sajen, see sullen äa Läwen endren. Oba enne Städ doa hantogonen, rand Jona noch wieda wajch. Hee fua met een Schepp met, waut no Tarsis wull.

Aus daut Schepp oppem Mäa wia, kjeem doa een groota Storm opp, un de Mana oppem Schepp enjsten sikj bettalich. Dee bäden to äare Jetta un fruagen: “Wuarom passieet dit?” Met eenst säd Jona to dee: “Daut es miene Schult. Jehova säd mie, waut ekj doonen sull, oba ekj rand wajch. Schmiet mie em Mäa nenn, dan woat de Storm opphieren.” De Mana oppem Schepp wullen daut nich doonen, oba Jona meend daut soo. Aus dee dän dan em Mäa nenschmeeten, hieed de Storm opp.

Jona docht, hee wudd motten stoawen. Aus hee emma wieda unjajinkj, bäd hee to Jehova. Dan schekjt Jehova eenen grooten Fesch. Dee schlukt Jona opp, oba Jona storf nich. En dän Fesch bennen bäd Jona un säd: “Ekj vespräakj die, ekj woa die emma jehorchen.” Jehova hilt Jona dree Doag em Fesch bennen läwendich un dan muak hee daut soo, daut de Fesch dän aune Kaunt Mäa utspieech.

Jehova haud Jona jerat. Durft hee dan nu aul nich no Ninive gonen? Jo, dee must. Jehova säd wada to dän, hee sull gonen. Ditmol deed  Jona daut. Hee jinkj no Ninive un säd doa to de schlajchte Menschen: “Ninive woat 40 Doag wieda venicht woaren.” Dan wort doa waut, waut kjeena jedocht haud: De Menschen von Ninive horchten un endaden äa Läwen. De Kjennich von Ninive säd to dee: “Doot to Gott bäden un lot junt daut leet sennen. Veleicht bliew wie dan veschoont.” Aus Jehova sach, daut de Menschen sikj endaden, deed hee Ninive nich venichten.

Jona wia doll, daut de Staut nich venicht wort. Nu denkj mol: Jehova wia jeduldich un metliedent met Jona jewast, oba Jona wia nich metliedent met de Menschen von Ninive. Enne Städ daut saut dee butakaunt Staut em Schauten von eene Plaunt un wia vedrislich. Dan jinkj de Plaunt doot un Jona wort doll. Jehova säd to dän: “Dise Plaunt es die mea wieet aus de Menschen von Ninive. Ekj wees dee Metleet, daut dee kunnen läwen bliewen.” Waut wull Jehova doamet sajen? De Menschen von Ninive talden mea aus eene Plaunt.

“[Jehova] haft bloos Jedult met junt, wiels hee well, daut aulemaun sikj oppmoaken saul, un daut kjeena veloaren jeit” (2. Petrus 3:9)