Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 55

Jehova sien Enjel beschizt Hiskia

Jehova sien Enjel beschizt Hiskia

De Assiera hauden daut Kjennichrikj Israel met de tieen Stam enjenomen. Nu wull Sanherib, de assierischa Kjennich, uk noch daut Kjennichrikj Juda met de twee Stam ennämen. Dee funk aun, sikj en Juda eene Staut no de aundre tootoieejnen. Jerusalem jankad am daut dolste. Oba Sanherib wist daut nich, daut Jehova Jerusalem beschitzen deed.

Hiskia, de Kjennich von Juda, jeef Sanherib een deel Jelt, daut dee Jerusalem sull tochloten. Sanherib neem daut Jelt, oba hee schekjt doawäajen siene stoakje Armee toom Jerusalem ennämen. De Menschen en Jerusalem wort sea angst, wäajen de Assiera emma noda kjeemen. Hiskia säd to dee: “Enjst junt nich. Wan de Assiera uk stoakj sent, woat Jehova ons noch stoakja moaken.”

Sanherib schekjt sienen Bootschofta, dän Rabschake, no Jerusalem toom äwa de Menschen spotten. De Rabschake stunt butakaunt Staut un breld: “Jehova kaun junt nich halpen. Lot junt nich von Hiskia aunschmäaren. Kjeen Gott kaun junt von ons raden.”

Hiskia fruach Jehova, waut hee doonen sull. Jehova säd dan: “Enjst die nich fa daut, waut de Rabschake sajcht. Sanherib woat Jerusalem nich kjrieen.” No daut schekjt Sanherib Hiskia Breew. En de Breew wia jeschräwen: “Jäft bloos opp. Jehova kaun junt goanich halpen.” Hiskia bäd un säd: “Jehova, rad ons toom Jefaulen, daut aule seenen, daut bloos du de woara Gott best.” Dan säd Jehova: “De Kjennich von Assierien woat nich en Jerusalem nenkomen. Ekj woa miene Staut beschitzen.”

Sanherib haud daut soo tohoolen, Jerusalem wudd boolt siene Staut sennen. Oba eene Nacht schekjt Jehova eenen Enjel no daut Loaga von de assierische Soldoten  butakaunt Staut. De Enjel muak 185 000 Soldoten doot! De Kjennich Sanherib wia siene stoakjste Soldoten loos. Dän bleef sest nuscht äwrich, aus trigj no Hus to gonen. Jehova beschizt Hiskia un Jerusalem, soo aus hee daut vesproaken haud. Wan du wieescht en Jerusalem jewast, wurscht du opp Jehova vetrut haben?

“Däm HARN sien Enjel loagat sikj om dee, dee am ferchten un halpt an ut” (Psalm 34:8)