Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 56

Josia leeft Gott sien Jesaz

Josia leeft Gott sien Jesaz

Josia wort de Kjennich von Juda, aus dee acht Joa wia. En dee Tiet deeden de Menschen Hakjsarie driewen un faulsche Jetta aunbäden. Aus Josia 16 Joa wia, wull hee lieren, woo eena Jehova deenen sull. Aus hee 20 Joa wia, funk hee aun, de Jettabilda un de Aultoaren em gaunzen Launt opptoriemen. Un aus Josia 26 Joa wia, leet hee Jehova sienen Tempel oppfiksen.

Hilkija, de Huaga Priesta, funk em Tempel de Buakroll met Jehova sien Jesaz; woomäajlich de Buakroll, waut Moses selfst jeschräwen haud. Schafan, dän Kjennich sien Schriewa, brocht de Buakroll no Josia un funk aun dee väatoläsen. Aus Josia toohorcht, kunn hee seenen, daut daut Volkj Jehova aul fa Joaren wia ojjehuarsom jewast. De Kjennich Josia säd to Hilkija: “Jehova es sea doll äwa ons. Go un räd met dän. Jehova woat ons sajen, waut wie doonen sellen.” Dan leet Jehova derch de Profeetin Hulda sajen: “Daut Volkj von Juda haft mie veloten. Dee woaren bestroft woaren, oba wäajen Josia sikj jedeemooticht haft, woat daut nich en siene Rejierungstiet komen.”

Aus de Kjennich Josia daut hieed, jinkj hee nom Tempel un roopt de Menschen von Juda toop. Dan läsd hee Jehova sien Jesaz opp ludes ver daut gaunze Volkj. Josia un daut Volkj vespruaken, daut see Jehova wudden met äa gaunzet Hoat jehuarsom sennen.

 Daut Volkj von Juda haud aul fa Joaren nich mea daut Passafast jefieet. Oba aus Josia en daut Jesaz läsd, daut se daut jieda Joa fieren sullen, säd hee to daut Volkj: “Well wie fa Jehova daut Passafast fieren.” Dan muak Josia reed, daut doa kunnen een deel Opfa jebrocht woaren, un stald em Tempel eene Grupp Sinja aun. Nu hilt daut Volkj daut Passafast un doahinja noch daut Fast met daut ojjesuade Broot, waut säwen Doag dieed. Soon Passafast aus dit haud daut aul von Samuel siene Tiet aun nich mea jejäft. Josia leewd Gott sien Jesaz sea. Jeit die daut uk scheen, von Jehova to lieren?

“Dien Wuat es eene Laump, mie dän Wajch to wiesen, uk een Licht, mie dän Stich to bedachen” (Psalm 119:105)