Jehova säd to Samuel: “Go no Isai sien Hus. Eent von dän siene Junges woat Israel äa näakjsta Kjennich sennen.” Dan jinkj Samuel doa han. Aus hee Isai sienen elsten Jung sach, docht hee: “Dit mott dee sennen”. Oba Jehova säd to Samuel, daut et nich dee wia. Hee säd uk: “Ekj kjikj no daut Hoat; nich bloos no daut, woo eenen Mensch lat.”

Isai brocht noch sas aundre von siene Junges. Oba Samuel säd: “Jehova haft kjeenem von dise jewält. Hast du noch mea Junges?” Isai säd: “Doa es noch mien jinjsta Jung, David. Dee deit oppe Stap Schop heeden.” Aus David nenkjeem, säd Jehova to Samuel: “Dit es dee!” Samuel goot Saulweelj opp David sienen Kopp, om to wiesen, daut dee en Israel noch mol wudd Kjennich sennen.

Eene Tiet lota hauden de Israeliten met de Filista Kjrich. De Filista hauden eenen Kjrichsmaun, waut een Ries wia. Dee heet Goliat. Jieda Dach vespott Goliat de Israeliten. Dee breld: “Schekjt mie eenen Maun, daut ekj met dän feiten kaun. Wan dee jewent, dan woa wie june Sklowen sennen. Wan ekj jewenn, dan woa jie onse Sklowen sennen.”

David kjeem no de Städ, wua de israelitische Soldoten wieren, un brocht siene Breeda Äten. Daut wieren uk Soldoten. Hee hieed Goliat siene Wieed un säd: “Ekj woa  met dän feiten!” De Kjennich Saul säd: “Du best je noch mau een Jung.” Oba David säd: “Jehova woat mie halpen.”

Saul boot David siene Soldotenkjleeda aun, oba David säd: “Met dise Kjleeda kaun ekj nich feiten gonen.” David neem sienen Schleida un jinkj no eenen Riefa. Hee socht sikj fief glaute Steena un stopt dee en siene Tausch nenn. Dan rand David no Goliat. De Ries breld: “Komm, du kjliena Jung. Ekj woa die de Väajel un de wille Tieren to fräten jäwen.” David haud nich Angst. Hee breld trigj: “Du kjemst met een Schwieet un eenen Spies, oba ekj kom en Jehova sienen Nomen. Du stalst die nich jäajen ons, oba jäajen Gott. Aule, waut hia sent, woaren seenen, daut Jehova stoakja es aus een Schwieet ooda een Spies. Hee woat junt aula en onse Macht jäwen.”

David deed eenen Steen en sienen Schleida nenn un hold aules ut, waut hee kunn. Jehova holp am un de Steen fua en Goliat sienen Stiern nenn. De Ries kjeiweld om un wia doot. Dan kleiwden de Filista ut, om äa Läwen to raden. Deist du uk opp Jehova vetruen, soo aus David?

“Fa Menschen es dit ommäajlich oba nich fa Gott; fa Gott es aules mäajlich” (Markus 10:27)