Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 38

Jehova jeef Simson Krauft

Jehova jeef Simson Krauft

Een deel Israeliten deeden wada faulsche Jetta aunbäden. Doawäajen leet Jehova too, daut de Filista äwa dee äa Launt rejieren kunnen. Oba doa wieren noch Israeliten, waut Jehova leewden. Eena von dee wia Manoach. Hee un siene Fru hauden kjeene Kjinja. Eemol schekjt Jehova eenen Enjel no Manoach siene Fru. De Enjel säd to ar: “Du woascht eenen Sän haben. Dee woat Israel von de Filista raden. Daut woat een Nazara sennen.” Weetst du, waut een Nazara wia? Soont wia een besondra Deena von Jehova. Een Nazara kunn sikj nich de Hoa aufschnieden.

Met de Tiet wort Manoach sien Sän jebuaren un dee wort Simson jenant. Aus Simson oppwoss, muak Jehova dän sea stoakj. Dee kunn eenen Leiw met ladje Henj dootmoaken. Eemol muak Simson gaunz auleen 30 Filista doot. De Filista jleichten dän nuscht un wullen dän seenen doottomoaken. Een aundret Mol, aus Simson en Gaza Nacht bleef, jinjen de Filista no de Stautspuat un wachten doa, daut see dän zemorjes kunnen dootmoaken. Oba medden en de Nacht stunt Simson opp un jinkj no de Stautspuat un reet dee von de Mia loos. Hee druach de Puat dän gaunzen Wajch äwa opp siene Schullasch bat oppe Spetz von eenen Boajch dicht bie Hebron!

Lota jinjen de Filista no Simson siene Mejal, no Delila, un säden: “Wie jäwen die miere dusent Selwastekja, wan du daut rutfinjst, wuarom Simson soo stoakj es. Wie wellen ons dän jriepen un dän enstoppen.” Wiels Delila daut Jelt jankad, wia see doamet envestonen. Ieeschtlich wull Simson ar daut nich sajen, wuarom hee soo stoakj wia. Oba dee schlemd am soo lang, bat hee daut ieescht rutleet. Hee säd: “Mie haben se noch newers de Hoa aufjeschnäden; ekj sie een Nazara. Wan se mie de Hoa aufschneeden, wudd miene Krauft wajch sennen.” Simson muak eenen grooten Fäla, aus hee ar daut säd, nich soo?

 Delila säd fuaz to de Filista: “Ekj weet daut nu!” Dee leet Simson opp äare Schoot enschlopen un leet am de Hoa aufschnieden. Dan breld Delila: “Simson, de Filista sent hia!” Simson wuak opp un haud siene Krauft veloaren. De Filista neemen sikj dän, muaken dän blint un stopten dän em Jefenkjnis nenn.

Eenen Dach kjeemen dusende Filista em Tempel von äaren Gott Dagon toop. Dee brelden: “Ons Gott haft Simson en onse Henj jejäft! Brinjt Simson häa! Well wie äwa dän sposen.” Dee leeten dän tweschen twee Stendasch stonen un hauden sikj domm äwa dän. Simson siene Hoa wieren aul wada lank jeworden. Hee bäd lud: “Oo Jehova, jeff mie toom Jefaulen noch eemol de Krauft.” Simson drekjt met aul siene Krauft jäajen de Stendasch em Tempel. De gaunza Tempel kjeiweld toop un aule Menschen doabennen storwen, mau rajcht Simson.

“Etj kaun aules derjch dem, dee mie stoatj moakt” (Filippa 4:13, Friesenbibel)