Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 14

Een Sklow es Gott jehuarsom

Een Sklow es Gott jehuarsom

Josef wia eent von Jakob siene jinjre Säns. Jakob jleicht Josef daut dolste un siene elre Breeda sagen daut. Waut denkjst du, waut dochten dee äwa daut? Dee wieren aufjenstich un kunnen Josef sea schlajcht lieden. Lota haud Josef een poa butajeweenelje Dreem un vetald siene Breeda dee. De Dreem bedieden, see wudden sikj noch mol aula motten ver am bekjen. Dan kunnen dee dän noch schlajchta lieden!

Eenen Dach deeden Josef siene Breeda dicht bie de Staut Sichem Schop heeden. Jakob schekjt Josef doahan toom seenen, woo dee daut jinkj. Siene Breeda sagen Josef aul von wiet auf komen un säden: “Hia kjemt de Dreema. Well wie dän dootmoaken!” Dee jreepen sikj dän un schmeeten dän en een deepet Loch nenn. Oba Juda, eena von de Breeda, säd: “Moakt dän nich doot! Vekjeep wie dän leewa aus eenen Sklow.” Nu vekoften dee Josef fa 20 Selwastekja aun midianitische Hendla, waut no Ägipten reisden.

Josef siene Breeda dukten dän sienen Äwarock en Kosenbloot en un schekjten dän no äare Pape un fruagen: “Es daut nich dienen Sän sien Äwarock?” Jakob docht, een willet Tia haud Josef dootjemoakt. Dän jinkj daut sea schlajcht. Kjeena kunn dän treesten.

En Ägipten vekoften se Josef aus eenen Sklow aun eenen huachbeaumten Maun, waut Potifar heet. Oba Jehova haud Josef nich veloten. Potifar sach, daut Josef eene goode Oabeit deed un opprechtich wia. Boolt stald Potifar dän äwa aules aun, waut hee haud.

 Potifar siene Fru sach, daut Josef schmock leet un stoakj wia. Jieda Dach wull see haben, dee sull sikj met ar toop dollajen. Waut deed Josef? Hee horcht doa nich no un säd: “Nä! Daut es schlajcht. Mien Wieet velat sikj opp mie un du best siene Fru. Wan ekj mie met die toop dolläd, dan wudd ekj jäajen Gott sindjen!”

Eenen Dach wull Potifar siene Fru Josef bemotten, daut dee sikj met ar dolläd. See pakt dän aun siene Kjleeda, oba hee rand wajch. Aus Potifar no Hus kjeem, säd see, Josef haud ar wult waut aundoonen. Oba daut wia jeloagen. Potifar wia sea doll un leet Josef enstoppen. Jehova deed Josef oba nich vejäten.

“Deemooticht junt unja Gott siene jewaultje Haunt, dan woat hee junt opprechten” (1. Petrus 5:6)