Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 15

Jehova vejat Josef nich

Jehova vejat Josef nich

Aus Josef enjestopt wia, haud de Farao, de Kjennich von Ägipten, Dreem. Kjeena wist, waut dee bedieden. Eent von dän Farao siene Deena säd, daut Josef am daut sajen kunn. De Farao leet dän fuaz holen.

Dee fruach Josef: “Kaust du miene Dreem utlajen?” Josef säd to dän Farao: “Säwen Joa woat en Ägipten äwajenuach to äten sennen un dan säwen Joa Hungaschnoot. Sieekj die eenen kluaken Maun, daut dee väl toom äten oppbewoat, soo daut dien Volkj nich vehungat.” Dan säd de Farao: “Doo du daut! Du woascht de tweeda von daut väaschte en Ägipten sennen!” Woo wist Josef, waut de Dreem bedieden? Jehova holp dän.

En de näakjste säwen Joa deed Josef väl Äten oppbewoaren. Dan wia oppe gaunze Ieed Hungaschnoot, soo aus Josef jesajcht haud. Von aulawäajen kjeemen se no Josef un koften Äten. Josef sien Voda Jakob wort en, daut en Ägipten Äten to kjeepen wia, un schekjt dan tieen von siene Junges doa han.

Jakob siene Junges kjeemen no Josef. Hee kjand dee fuaz, oba siene Breeda kjanden am nich. Dee bekjten sikj ver am, krakjt soo aus Josef daut bie junk jedreemt haud. Josef wull seenen, aus siene Breeda noch emma soo schlajcht wieren. Hee säd to dee: “Jie komen hia inspakjten. Jie wellen bloos seenen, woo jie ons Launt kjennen ennämen.” Dee säden: “Nä! Wie sent 12 Breeda von Kanaan. Eent von  onse Breeda es aul doot un de jinjsta es tus bie Pape.” Dan säd Josef: “Brinjt junen jinjsten Brooda no mie, dan woa ekj daut jleewen.” Soo jinjen see no Hus no äare Pape.

Aus daut Äten von Jakob siene Famielje wada aula wia, schekjt hee siene Junges wada no Ägipten. Ditmol neemen dee äaren jinjsten Brooda Benjamin uk met. Josef wull siene Breeda oppe Proow stalen. Hee vestuak sien selwanet Kuffel en dän Jeträajdsak von Benjamin. Dan säd Josef, siene Breeda hauden daut jestolen. Aus siene Deena daut Kuffel en dän Jeträajdsak von Benjamin fungen, vefieeden siene Breeda sikj sea. Dee prachaden Josef, daut dee an bestrofen sull enne Städ Benjamin.

Nu wist Josef, daut siene Breeda sikj jeendat hauden. Hee kunn sikj nich lenja beoabeiden. Hee funk aun to roaren un säd: “Ekj sie Josef, jun Brooda. Läft Pape noch?” Siene Breeda wieren sea vewundat. Josef säd: “Siet sondasorj wäajen daut, waut jie mie mol deeden. Gott schekjt mie hiahan toom junt raden. Got bosich un holt Pape.”

Dee jinjen no Hus un vetalden äare Pape dit Nies un brochten dän no Ägipten. No väl Joaren kunnen Josef un siene Pape wada toop sennen.

“Wan jie aundre Menschen äare Sinden nich vejäwen, woat jun Voda junt june Sinden uk nich vejäwen” (Matäus 6:15)