Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 98

De Christengloowen vebreet sikj mank väl Velkja

De Christengloowen vebreet sikj mank väl Velkja

De Apostel jehorchten Jesus sien Jeboot un vebreeden de goode Norecht aulawäajen oppe Ieed. En daut Joa 47 schekjten de Breeda en Antiochia Paulus un Barnabas ut, daut dee eene Prädichtreis muaken. Dee reisden toop derch Kjlien-Asien un deeden flietich prädjen, biejlikj en Derbe, Liestra un Ikonion.

Paulus un Barnabas prädijden jieda eenem: Oame, Rikje, Junge uk Oole. Väle neemen de Woarheit von Christus aun. Aus Paulus un Barnabas Sergius Paulus, dän Harscha von Ziepern, prädjen deeden, wull een Zaubra dee doavon aufhoolen. Paulus säd to dän: “Jehova woat die bestrofen.” De Zaubra wort fuaz blint. Aus Sergius Paulus daut sach, kjeem dee toom Gloowen.

Paulus un Barnabas deeden aulawäajen prädjen: von Hus to Hus, oppem Moakjtplauz, oppe Gaussen un en de Judenschoolen. Aus dee en Liestra eenen lomen Maun heelden, dochten de Menschen, daut wieren Jetta, un wullen dee aunbäden. Oba Paulus un Barnabas leeten daut nich un säden: “Bät bloos Gott aun! Wie sent bloos Menschen.” Dan kjeemen waut Juden un deeden de Menschen jäajen Paulus enhitzen. Dee vekjielden Paulus soo sea met Steena, daut see dochten, dee wia doot, un dee schlapten dän ut de Staut rut. Oba Paulus läwd noch! De Breeda kjeemen dän fuaz halpen un brochten dän trigj en de Staut nenn. Lota reisd Paulus dan wada no Antiochia.

Aune 49 muak Paulus noch eene Reis. Hee reisd wada no Kjlien-Asien toom seenen, woo de Breeda daut doa jinkj, un dan prädijd hee  de goode Norecht noch wieda auf, en Europa. Hee reisd no Ateen, Efesus, Filippi, Tessalonich un no aundre Städa. Silas, Lukas un een Jung, waut Timotäus heet, reisden met Paulus toop. Dee deeden toop Vesaumlungen oppstalen un holpen dee, stoakj to woaren. Paulus bleef eentunhaulf Joa en Korint un stoakjt de Breeda doa. Hee deed prädjen, lieren un schreef aun väl Vesaumlungen Breew. Hee schauft uk aus Zeltmoaka. Eene Tiet lota reisd Paulus trigj no Antiochia.

Aune 52 muak Paulus eene dredde Reis. Dee funk en Kjlien-Asien aun. Daut wietste, waut hee nom Nuaden reisd, wia Filippi un von doa reisd hee nom Sieden no Korint. Paulus bleef dan miere Joa en Efesus un deed aundre lieren un heelen un holp de Vesaumlunk. Hee deed uk jieda Dach en eene School Räden hoolen. Väle hieeden too un endaden dan äa Läwen. Aus Paulus de goode Norecht ieescht en een deel Lenda jeprädicht haud, jinkj hee no Jerusalem.

“Got nu no de Velkja von de Welt un moakt an to Lieelinja” (Matäus 28:19)