Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 89

Petrus velicht daut, daut hee Jesus kjant

Petrus velicht daut, daut hee Jesus kjant

Aus Jesus met siene Apostel en de Bowastow wia, säd hee: “Dise Nacht woa jie mie aula veloten.” Petrus säd: “Ekj nich! Wan de aundre die uk aula veloten, ekj woa kjeenmol.” Oba Jesus säd to Petrus: “Ea een Hon kjreit, woascht du dree Mol sajen, daut du mie nich kjanst.”

Aus de Soldoten Jesus no Kaifas sien Hus brochten, wieren de mieeschte Apostel aul wajchjerant. Oba twee Stekj wieren met de Häad Menschen metjegonen. Eent wia Petrus. Dee wia nu opp dän Hoff von Kaifas sien Hus un woamd sikj doa biem Fia. Doa em dachen sach eene Deenstmejal Petrus sien Jesecht un säd: “Ekj kjan die! Du wieescht met Jesus toop!”

Petrus säd: “Nä, ekj wia nich! Ekj weet nich, von waut du rätst!” Hee jinkj opptoo no de Puat. Oba meist fuaz sach eene aundre Deenstmejal dän un säd to de Menschen: “Dis Maun wia met Jesus toop!” Petrus säd: “Ekj kjan Jesus nich mol!” Een Maun säd: “Du best eena von dee! Du rätst krakjt soo aus dee von Galiläa, von wua Jesus es.” Oba Petrus schwieed: “Ekj kjan dän nich!”

Krakjt dan kjreid een Hon. Petrus sach, daut Jesus sikj omdreid un no am kjikjt. Dan docht hee aun Jesus siene Wieed un hee rand rut un road bettalich sea.

Äwadäm kjeem de judischa Huaga Rot en Kaifas sien Hus toop, om Jesus to rechten. Dee wieren sikj aul eenich jeworden, daut see Jesus wullen dootmoaken, un nu sochten see bloos noch no eene Uasoak. Oba dee kunnen Jesus met nuscht beschuljen. Tolatst fruach Kaifas Jesus gaunz jlikjtoo: “Best du Gott sien Sän?” Jesus säd: “Ekj sie.” Kaifas säd: “Wie brucken nich mea Bewies. Dee haft Gott jelastat!” De Huaga Rot säd uk: “Dis Mensch mott stoawen.” Dee heiwden Jesus em Jesecht, bejeiwaden dän, bungen dän de Uagen too un schluagen dän un säden: “Wan du een Profeet best, dan saj ons, wäa die schluach!”

 Aus daut dach wort, brochten dee Jesus no daut Hus vom Huagen Rot un fruagen dän wada: “Best du Gott sien Sän?” Jesus auntwuad: “Jie sajen, daut ekj dee sie.” Dan säden dee, hee wia schuldich, wiels hee Gott jelastat haud. Nu brochten see dän no daut Hus von dän reemischen Harscha Pontius Pilatus. Waut wort dan? Well wie mol seenen.

“De Tiet . . . es aul hia, daut jie woaren vestreit woaren, een jiedra fa sikj, un woaren mie auleen loten. Oba ekj sie nich auleen, de Voda es bie mie” (Johanes 16:32)