Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 74

Jesus woat de Messias

Jesus woat de Messias

Johanes haud jeprädicht: “Doa woat eena komen, waut jrata es aus ekj.” Aus Jesus bie 30 Joa wia, kjeem hee von Galiläa nom Jordan-Riefa, wua Johanes de Menschen deepen deed. Jesus wull sikj von Johanes deepen loten, oba Johanes säd: “Du wurscht mie sellen deepen, nich ekj die.” Jesus säd to dän: “Jehova well haben, du saust mie deepen.” Dan jinjen dee en dän Jordan-Riefa nenn, un Johanes dukt Jesus gaunz unja Wota.

Aus Jesus ieescht vom Wota väajekomen wia, bäd hee. Krakjt dan muak de Himmel sikj op un Gott sien Jeist kjeem rauf opp am soo aus eene Duw. Dan säd Jehova vom Himmel: “Du best mien leewa Sän; met die sie ekj sea tofräd.”

Aus Jehova sien Jeist opp Jesus kjeem, wort hee de Christus, ooda Messias. Nu wudd dee met daut Woakj aunfangen, wuatoo Jehova dän no de Ieed jeschekjt haud.

Nodäm daut Jesus sikj deepen leet, jinkj hee fuaz no de Wiltnis un bleef doa fa 40 Doag. Dan jinkj hee no Johanes. Aus Johanes Jesus komen sach, säd hee: “Daut es Gott sien Laum, waut de Welt äare Sinden wajchnämen woat.” Derch dit leet Johanes de Menschen weeten, daut Jesus de Messias wia. Weetst du, waut Jesus beläwd, aus dee enne Wiltnis wia? Well wie mol seenen.

“Eene Stemm vom Himmel säd: Du best mien leewa Sän, met die sie ekj sea tofräd” (Markus 1:11)