Trigj nom Enhault

No de Enhaultslist gonen

 KAPITEL 78

Jesus prädicht de Norecht von daut Kjennichrikj

Jesus prädicht de Norecht von daut Kjennichrikj

Een Stootje no siene Doop funk Jesus aun to prädjen un säd: “Gott sien Kjennichrikj es dicht bie.” Hee reisd derch Galiläa un Judäa un siene Jinja kjeemen met. Aus Jesus no Nazaret kjeem, wua hee oppjewossen wia, jinkj hee no de Judenschool un muak de Buakroll von Jesaja op. Dan läsd hee: “Jehova jeef mie dän heiljen Jeist, daut ekj de goode Norecht prädjen kaun.” Wuarom haud Jesus dän heiljen Jeist jekjräajen? Besonda doawäajen, daut hee de goode Norecht prädjen sull, wan de Menschen uk wullen Wunda seenen. Jesus säd to siene Toohiera: “Vondoag haft dise Profezeiunk sikj erfelt.”

Dan jinkj Jesus no daut Galiläische Mäa un troff doa vea Fescha, waut lota siene Jinja worden. Daut wieren Petrus, Andreas, Jakobus un Johanes. Hee säd to dee: “Komt met mie met. Ekj woa junt to Menschenfescha moaken.” Dee hieeden fuaz opp, aus Fescha to schaufen, un jinjen met. Dee jinjen toop derch gaunz Galiläa un deeden von Jehova sien Kjennichrikj prädjen – en de Judenschoolen, oppem Moakjtplauz un oppe Gauss. Een schoof Menschen kjeemen dee aulawäajen hinjaraun. Äwaraul kjrieejen se von Jesus to hieren, mau rajcht wiet auf en Sierien.

Lota jeef Jesus eenje von siene Nofolja de Krauft, Menschen to heelen un beese Jeista uttodriewen. Aundre deeden met Jesus toop prädjen – von eene Staut no de aundre un von een Darp no daut aundre. Miere true Frues, soo aus Maria Magdalena, Johana, Susanna un aundre, kjemmaden sikj om Jesus un siene Nofolja.

Aus Jesus siene Jinja jelieet haud to prädjen, schekjt hee dee ut. Aus dee dan derch gaunz Galiläa reisden, fungen väle aun to jleewen un leeten sikj deepen. Wiels soo väl Menschen wullen Jesus siene Jinja woaren, vejlikjt hee dee met eene Stap, waut reed wia toom arnten. Hee säd: “Bät to Jehova, daut dee mea Oabeida schekjt toom de Arnt enbrinjen.” Lota wäld Jesus sikj 70 von siene Jinja un schekjt  dee twee un twee ut, daut dee aulawäajen en Judäa prädjen sullen. Dee lieeden aule Sorten Menschen von daut Kjennichrikj. Un dee kjeemen schaftich trigj un vetalden Jesus met Freiden, waut see beläft hauden. De beesa Fient kunn nuscht doonen toom dit Prädichtwoakj opphoolen.

Jesus sach doano, daut siene Jinja met dit Woakj, waut soo needich to doonen fäld, wudden wiedamoaken, wan hee uk wudd nom Himmel foaren. Hee säd to dee: “Prädicht de goode Norecht oppe gaunze Ieed. Lieet de Menschen Gott sien Wuat un deept dee.”

“Ekj mott uk noch no aundre Städa gonen, daut Evangelium von Gott sien Rikj doa uk to prädjen; wiels daut es wuatoo ekj jeschekjt sie” (Lukas 4:43)