Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 83

Jesus jeft dusende to äten

Jesus jeft dusende to äten

Jroz ver daut Passafast en daut Joa 32 kjeemen de Apostel von eene Prädichtreis trigj. Wäajen dee meed wieren, fua Jesus met dee toop metem Boot no Betsaida, daut dee sikj vereiwen kunnen. Aus see dan meist bat de Kaunt Wota wieren, sach Jesus doa dusende Menschen, waut an hinjaraun jekomen wieren. Jesus haud sest jeräakjent, bloos met siene Apostel toop to sennen, oba hee neem de Menschen leeftolich opp. Hee heeld de Kranke un funk aun to lieren. Dän Dach äwa lieed Jesus dee von Gott sien Kjennichrikj. Aus daut Owent wort, kjeemen siene Apostel no am un säden: “De Menschen mott aul hungren. Schekj dee wajch, soo daut dee äten kjennen.”

Jesus säd: “Dee brucken nich veloten. Jäft jie dee waut to äten.” De Apostel fruagen: “West du, daut wie dee gonen Broot kjeepen?” De Apostel Filippus säd: “Wan wie uk noch een deel Jelt hauden, wudd wie nich kjennen fa aul dise Menschen jenuach Broot kjeepen.”

Jesus fruach: “Woo väl Äten hab wie hia?” Andreas säd: “Wie haben fief Stekja Broot un twee kjliene Fesch. Daut es lang nich jenuach.” Jesus säd: “Brinjt mie daut Broot un de Fesch.” Hee säd, de Menschen sullen sikj oppem Grauss dolsaten en Gruppen von 50 ooda 100. Dan neem Jesus daut Broot un de Fesch, kjikjt nom Himmel un bäd. No daut jeef hee de Apostel daut Äten, un dee brochten de Menschen daut. De 5 000 Mana un de Frues un de Kjinja eeten sikj aula saut. De Apostel holden dan aules toop, waut  äwajebläwen wia, daut et nich vekjeem. Daut wieren 12 Kjarw voll! Wia daut nich een grootet Wunda?

De Menschen kunnen daut schia nich jleewen un wullen Jesus to äaren Kjennich moaken. Oba Jesus wist, Jehova wudd am lota toom Kjennich moaken. Nu wia noch nich de Tiet. Dan schekjt Jesus de Menschen wajch un säd, siene Apostel sullen no de aundre Kaunt von daut Galiläische Mäa foaren. Dee stieejen em Boot nenn un Jesus jinkj auleen opp eenen Boajch nopp. Wuarom? Hee wull sikj Tiet nämen un to sienen Voda bäden. Krakjt endoont woo drock Jesus daut haud, hee neem sikj emma Tiet toom bäden.

“Schauft junt Äten aun, daut nich vekomen deit. Schauft junt Äten aun, daut fa daut eewje Läwen blift. De Menschensän woat junt soont jäwen” (Johanes 6:27)