Trigj nom Enhault

No de Enhaultslist gonen

 KAPITEL 77

De Fru biem Borm

De Fru biem Borm

Een Stoot no daut Passafast reisden Jesus un siene Jinja derch Samaria. Dee wieren oppem Trigjwajch no Galiläa. Dicht bie de Staut Siechar bleef Jesus bie dän Jakobsborm un vereiwd sikj doa. Siene Jinja jinjen no de Staut Äten kjeepen.

Eene Fru kjeem no dän Borm Wota schapen. Jesus säd to dee: “Jeff mie een bät Wota.” See säd: “Wuarom rätst du mie aun? Ekj sie eene samaritische Fru. De Juden räden nich to de Samarita.” Jesus säd to dee: “Wan du wist, wäa ekj wia, dan wurscht du mie no Wota froagen, un ekj wudd die soon Wota jäwen, waut Läwen jeft.” De Fru fruach: “Waut west du doamet sajen? Du hast je nich mol eenen Ama.” Jesus säd: “Wäaemma von daut Wota drinkjt, waut ekj jäw, dän woat niemols mea darschten.” De Fru säd: “Har, jeff mie soon Wota.”

Jesus säd to dee: “Go, saj dienen Ehemaun.” See säd: “Ekj hab kjeenen.” Hee säd dan: “Du hast rajcht. Du best fief Mol befriet jewast un met dän Maun, waut du nu toop best, best du nich befriet.” De Fru säd: “Ekj see, daut du een Profeet best. Ons Samarita woat jelieet, daut wie Gott opp disen Boajch aunbäden kjennen, oba de Juden sajen, eena kaun daut bloos en Jerusalem. Ekj jleew, wan de Messias ieescht komen woat, woat dee ons daut sajen, woo daut doamet steit.” Dan säd Jesus: “Ekj sie de Messias.” Dit haud Jesus noch to sest kjeenem jesajcht.

 De Fru jinkj bosich no de Staut un säd to de Samarita: “Ekj jleew, ekj hab dän Messias jefungen. Dee weet aules von mie. Komt kjikjen!” Dee jinjen dee hinjaraun nom Borm un horchten, waut Jesus säd.

De Samarita wullen haben, Jesus sull en äare Staut bliewen. Twee Doag lieed Jesus dee doa, un een deel Menschen jleewden aun dän. Dee säden to de samaritische Fru: “Nu, daut wie dän jehieet haben, weet wie fa neiw, daut dit de Welt äa Rada es.”

“Komm! Un wäm darscht, däm lot komen. Un wäa doa well, saul daut Läwenswota emsonst nämen” (Openboarunk 22:17)