Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 61

Dee bekjen sikj nich

Dee bekjen sikj nich

Eene Tiet lota aus de Kjennich Nebukadnezar dän Droom met de Jestault haud, muak hee een grootet Bilt von Golt. Hee stald daut en de Dura-Stapen opp un kroagd de aunjeseene Mana von daut Launt doa toop. Schadrach, Meschach un Abed-Nego wieren uk von dee. De Kjennich velangd: “Wan jie daut Spell von de Trompeeten, Hoapen un Fleeten hieren, dan sell jie junt fuaz ver de Jestault bekjen! Wäa sikj nich bekjen woat, woat en dän jlieejenden Hettowen nenjeschmäten woaren.” Wudden de dree Hebräa sikj ver de Jestault bekjen ooda wudden dee bloos Jehova aunbäden?

Dan säd de Kjennich, daut daut Spell sull aunfangen. Aule bekjten sikj un bäden de Jestault aun, bloos Schadrach, Meschach un Abed-Nego nich. Waut Mana sagen daut un säden to dän Kjennich: “Dise dree Hebräa deeden diene Jestault nich aunbäden.” Nebukadnezar leet dee holen un säd to dee: “Ekj jäw junt noch eene Jeläajenheit, daut jie de Jestault aunbäden. Wan jie daut nich doonen, dan schmiet ekj junt em Owen nenn. Kjeen Gott kaun junt von mie raden.” Dee säden dan: “Ons fält goanich noch eene Jeläajenheit. Ons Gott kaun ons raden. Oba aus dee daut deit ooda nich, wie woaren de Jestault nich aunbäden, oo Kjennich.”

Nebukadnezar wort sea doll. Hee säd to siene Deena: “Moakt dän Owen säwenmol heeta aus jeweenlich!” Dan säd hee to siene Soldoten: “Binjt de  Mana un schmiet dee doa nenn!” De Owen wia soo heet, daut de Soldoten fuaz storwen, aus dee doa dicht bie kjeemen. De dree Hebräa kjeiwelden em Fia nenn. Oba aus Nebukadnezar em Owen nenkjikjt, sach hee doa vea Mana romgonen enne Städ dree. Hee gruld sikj sea un fruach siene Beaumte: “Schmeet wie nich dree Mana em Fia nenn? Ekj see doa vea, un dän eenen sitt no eenen Enjel!”

Nebukadnezar jinkj dichta biea un roopt lud: “Komt rut, jie Deena von dän hechsten Gott!” Aule kjikjten met jrale Uagen, aus Schadrach, Meschach un Abed-Nego utem Fia rutkjeemen un nuscht jeworden wia. Dee äare Hut un Hoa un Kjleeda wieren nuscht vebrent, un dee rikjten nich mol vesenjt.

Nebukadnezar säd: “Schadrach, Meschach un Abed-Nego äa Gott es groot. Dee schekjt sienen Enjel un haft dee jerat. Kjeen Gott es soo aus dee äara.”

West du Jehova uk soo tru bliewen aus de dree Hebräa, krakjt endoont waut doa kjemt?

“Du saust Gott, dienen Harn, aunbäden un eensich am deenen” (Matäus 4:10)