Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 57

Jehova well, daut Jeremia prädicht

Jehova well, daut Jeremia prädicht

Jehova wäld sikj Jeremia, daut dee fa daut Volkj von Juda sull Profeet sennen. Hee sull prädjen un de Menschen sajen, see sullen opphieren, schlajchtet to doonen. Jeremia säd: “Oba Jehova, ekj sie noch mau bloos een Jung. Ekj weet nich, woo ekj räden saul.” Jehova säd to dän: “Hab nich Angst. Ekj woa die sajen, waut du räden saust. Ekj halp die.”

Jehova säd, Jeremia sull de Leidasch vom Volkj toopholen un ver dee eenen Leemtopp tweibräakjen un sajen: “Jerusalem woat krakjt soo to Bieta jebroaken woaren.” Aus Jeremia dit deed, worden de Leidasch sea doll. De Priesta Paschhur vekjield Jeremia un muak dän en eenen Holtklotz faust. De gaunze Nacht äwa kunn Jeremia sikj nich rieren. Zemorjes muak Paschhur dän loos. Jeremia säd: “Ekj kaun nich lenja. Ekj woa nich mea prädjen.” Hieed Jeremia opp iernst opp? Nä. Aus dee doa dolla äwa nodocht, säd hee: “Jehova siene Norecht es soo aus een Fia en mie. Ekj kaun nich opphieren met prädjen.” Jeremia deed de Menschen wieda woarnen.

Joaren lota wia doa een aundra Kjennich en Juda. De Priestasch un de faulsche Profeeten jleichten Jeremia siene Norecht nuscht. Dee säden to de Rejierungsmana: “Dis Maun haft dän Doot vedeent.” Jeremia säd: “Wan jie mie dootmoaken, dan moak jie wäm doot, waut nich schuldich es. Waut ekj räd, kjemt von Jehova, nich von mie.” Aus de Rejierungsmana daut hieeden, säden dee: “Dis Maun haft nich dän Doot vedeent.”

Jeremia hieed nich opp met prädjen, un de Rejierungsmana  worden sea doll. Dee wullen haben, de Kjennich sull Jeremia dootmoaken. De Kjennich säd, see kunnen met dän doonen, waut see wullen. Dan schmeeten see Jeremia en eenen deepen, blotjen Borm nenn, daut dee doa stoawen sull. Jeremia schord emma wieda em Blott en.

Dan säd eent von dän Kjennich siene Beaumte, waut Ebed-Melech heet, toom Kjennich: “De Rejierungsmana haben Jeremia em Borm nenjeschmäten! Wan wie dän doa loten, dan woat dee stoawen.” De Kjennich säd, Ebed-Melech sull sikj waut Mana metnämen un Jeremia utem Borm rutholen. Sull wie nich uk soo sennen aus Jeremia, waut nich opphieed to prädjen, endoont waut dee beläwd?

“Jie woaren om mient haulwen von aulemaun vestat woaren. Wäa oba bat aum Enj staunthauft blift, woat jerat woaren” (Matäus 10:22)