Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 58

Jerusalem woat venicht

Jerusalem woat venicht

De Menschen von Juda veleeten Jehova emma wada un bäden faulsche Jetta aun. Väl Joaren wull Jehova dee halpen. Hee schekjt een deel Profeeten toom dee woarnen, oba dee horchten nich. Enne Städ daut vespotten dee de Profeeten. Woo muak Jehova met dän Jettadeenst en Juda een Enj?

De babelonischa Kjennich Nebukadnezar neem een Volkj no daut aundre en. Aus dee Jerusalem toom ieeschte Mol enneem, neem hee dän Kjennich Jojachin, de Leidasch, de Soldoten un de utjelieede Oabeida faust un brocht dee aula no Babel. Hee neem sikj uk aule diere Sachen von Jehova sienen Tempel met. Dan muak Nebukadnezar Zedekia toom Kjennich äwa Juda.

Aum Aunfank wia Zedekia Nebukadnezar jehuarsom. Oba de Nobavelkja un de faulsche Profeeten deeden Zedekia tooroden, sikj jäajen Babel to stalen. Jeremia säd to Zedekia: “Wan du daut deist, dan woat et en Juda väl Doodes un Hungaschnoot un Krankheiten jäwen.”

Aus Zedekia acht Joa rejieet haud, wull dee sikj jäajen Babel stalen. Hee fruach de ägiptische Armee no Help. Dan schekjt Nebukadnezar siene Soldoten toom jäajen Jerusalem gonen un dee kjeemen runtom de Staut. Jeremia säd to Zedekia: “Jehova sajcht, wan du die Babel hanjefst, dan woascht du veschoont bliewen uk de Staut. Oba wan nich, dan woaren de Babelonia Jerusalem vebrennen un die woaren see faustnämen.” Zedekia säd: “Ekj woa mie nich hanjäwen!”

 Eentunhaulf Joa lota bruaken de babelonische Soldoten sikj derch de Mia von Jerusalem un stekjten de Staut aun. Dee vebrenden dän Tempel, muaken väl Menschen doot un neemen dusende faust.

Zedekia kleiwd ut von Jerusalem, oba de Babelonia wieren dän wajch hinjaraun. Dicht bie Jericho jreepen see sikj dän un brochten dän no Nebukadnezar. De Kjennich von Babel bemust Zedekia tootokjikjen, aus siene Säns omjebrocht worden. Dan muak Nebukadnezar Zedekia blint un stopt dän em Jefenkjnis. Doa bleef dee, bat dee storf. Oba Jehova vespruak de Menschen von Juda waut. Hee säd: “No 70 Joa woa ekj junt wada trigj no Jerusalem brinjen.”

Waut wudd met de junge Menschen woaren, waut se met no Babel jenomen hauden? Wudden dee Jehova tru bliewen?

“Har, aulmajchtja Gott, diene Jerechten sent woarhauftich un jerajcht” (Openboarunk 16:7)