Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Goode Lieren ut de Bibel

 KAPITEL 1

Gott moakt Himmel un Ieed

Gott moakt Himmel un Ieed

Jehova Gott haft ons jemoakt. Dee haft aules jemoakt – daut, waut wie seenen kjennen, un uk daut, waut wie nich seenen kjennen. Ea dee aul daut muak, waut wie seenen kjennen, muak dee een deel Enjel. Weetst du, waut Enjel sent? Daut sent Jehova siene Deena un dee sent soo aus hee. Wie kjennen dee nich seenen, krakjt soo aus wie Gott nich seenen kjennen. De ieeschta Enjel, waut Jehova muak, wort sien Helpa. Krakjt dis Enjel deed Jehova halpen, aus dee de Stierns, de Planeeten un aulet aundre muak. Eent von dise Planeeten es de wundascheena Ieedbaul, wua wie wonen.

Dan muak Jehova de Ieed soo reed, daut de Tieren un de Menschen doabowen läwen kunnen. Hee leet de Sonn oppe Ieed noppschienen. Un hee muak de Boaj, daut Mäa un de Riefasch.

Waut deed Jehova dan? Hee säd: “Ekj moak Grauss un Plaunten un Beem.” Doa fungen aun väl veschiedne Sorten Frucht, Jreens un Bloomen to waussen. Dan muak Jehova aul de Tieren, waut doa flieejen, schwamen ooda krupen. Hee muak kjliene Tieren, soo aus Hosen, un groote Tieren, soo aus Eelefaunten. Woon Tia jleichst du daut dolste?

Dan säd Jehova to dän Enjel, waut hee daut ieeschte muak: “Well wie Menschen moaken.” De Menschen wudden aundasch sennen aus de Tieren. Dee wudden sikj kjennen Sachen utjreblen, vetalen, lachen  un bäden. Dee wudden uk no de Ieed un no de Tieren oppaussen. Weetst du, wäa de ieeschta Mensch wia? Well wie mol seenen.

“Aum Aunfank muak Gott Himmel un Ieed” (1. Mose 1:1)