Jie doonen aul een Stoot spazieren, oba nu best du die nich mea secha: Wudd jie sellen wieda spazieren ooda leewa opphieren? Dis Artikjel saul die halpen, eene kluake Entscheidunk to moaken.

Waut wie en disen Artikjel seenen woaren

•  Waut, wan ekj mie nich secha sie?

•  Eene Entscheidunk moaken

•  Wan du die eenich woascht opptohieren

 Waut, wan ekj mie nich secha sie?

 Wan een Jung un eene Mejal eene jewesse Tiet spazieren, woaren dee woomäajlich en, daut dee doch nich soo väl äwareen haben, aus dee ieeschtlich dochten. Waut kunn doa biejlikj oppkomen?

•   Eena jleicht daut, aune Kaunt Mäa to sennen, un de aundra wudd leewa opp eenen Boajch noppklautren.

•   Eena es sea oppjebrocht un de aundra es bleed.

•   Eena jleicht daut, aundre auntoschmäaren, un de aundra es emma opprechtich.

 En jieda eent von dise Loagen jeit et om waut aundret. Bie daut ieeschte Biespel es daut veschieden, waut dän Jung ooda de Mejal intressieet. Bie daut tweede Biespel es daut veschieden, woo dee daut haben. Un bie daut dredde Biespel es daut veschieden, woo dee jesonnen sent.

 Denkj mol no: Woone von dise Loagen wudd fa die daut Schwanste sennen, wan jie beid junt befrieen wudden? En waut vonne Loag wudd jie junt doano aunpaussen kjennen, waut de aundra aundasch haft?

 Een Ehepoa kaun een scheenet befriedet Läwen haben, wan daut uk veschieden es, waut dee intressieet ooda woo dee daut haben. Twee Menschen, waut fein tooppaussen, motten je nich aules äwareen haben. Eenjemol es daut mau rajcht soo, daut dee met de Tiet uk aunfangen, soont to jleichen, waut dän aundren intressieet, un dee kjemt daut togood, woo de aundra daut haft. a

 Oba daut kjemt doaropp aun, daut du die met wäm befriest, waut soo jesonnen es aus du, wan daut biejlikj om dän Gloowen jeit ooda doarom, woo eena läwen saul, ooda om daut, waut eena fa rajcht un orrajcht talt. Wan du enwoascht, daut jie en soone Sachen nich stemmen, dan kaun daut een Tieekjen doafäa sennen, daut jie leewa wudden opphieren sellen to spazieren.

 Woo es daut biejlikj, wan een Ehepoa nich dänselwjen Gloowen haft? Een Buak sajcht: “Daut wiest sikj emma wada ut, daut Ehepoatna, waut nich dänselwjen Gloowen haben, sikj väl ea scheeden loten aus aundre” (Fighting for Your Marriage).

 Waut de Schreft sajcht: “Lot junt nich met dee toopspaunen, waut nich em Gloowen sent; daut paust nich toop” (2. Korinta 6:14).

 Eene Entscheidunk moaken

 De Schreft sajcht, daut deejanje, waut sikj befrieen, “Schwierichkjeiten en äa Läwen haben” woaren (1. Korinta 7:28). Doawäajen es daut uk nich toom wundren, wan jie en dee Tiet, wua jie spazieren, bieaun mol Trubbels haben.

 Kjlandre Trubbels sent nich emma een Bewies doafäa, daut jie wudden sellen uteneengonen. Opp waut kjemt daut aun? Doaropp, aus jie dise Trubbels fiksen un Fräd hoolen kjennen. Wiels wan jie ieescht befriet sent, dan woat daut needich sennen, daut jie daut jelieet haben.

 Waut de Schreft sajcht: “Woat leeftolich eena toom aundren; siet von Hoaten metfeelent; siet wellich reed, junt unjarenaunda to vejäwen” (Efeesa 4:32).

 Oba wan jie junt foaken oneenich woaren un wäajen jratre Sachen, dan kaun daut wiesen, daut jie beid nich tooppaussen. Dan wudd daut bäta sennen, daut jie daut nu enwoaren, ea jie junt befrieen!

 En aundre Wieed: Wan du die sea onsecha best, aus du die wurscht sellen met dienen Poatna befrieen ooda aus du reed best fa dän Ehestaunt, dan lot daut nich toch. Doo doa waut met!

 Waut de Schreft sajcht: “De kluake seenen daut Ojjlekj komen un brinjen sikj utem Stich, oba de jlikjeltje gonen doa nenn un motten doafäa lieden” (Spricha 22:3, PB).

 Wan du die eenich woascht opptohieren

 Opphieren to spazieren kaun eenem sea toosaten. Oba wan eent von junt ooda jie beid emma wada sea oppem Twiewel sent, aus jie wudden sellen toopbliewen, dan es daut woomäajlich daut Baste, uteneentogonen.

 Woo deit eena daut, wan eena opphieren well? Wan daut afens mäajlich es, dan saust du dän daut perseenlich sajen un nich bloos derch E-Mail ooda äwa Fon schriewen. Wäl die eene paussende Tiet un eene paussende Städ toom met dän aundren räden.

 Waut de Schreft sajcht: “Jie sellen unja eenaunda de Woarheit sajen” (Sacharja 8:16, PB).

 Wan jie uteneengonen, bediet daut dan, daut doa irjentwaut orrajcht es met die? Nä! Denkj doaraun, wuarom eena met wäm spazieet. Daut es toom sikj eenich woaren, aus eena sikj met dän befrieen well ooda nich. Mau rajcht wan jie opphieren, kaust du doa väl von lieren.

 Denkj mol äwa no: “Waut sie ekj von mie selfst enjeworden, aus ekj spazieren deed? Aun waut wudd ekj noch sellen schaufen, ea ekj mie befrieen doo? Waut wudd ekj nu aundasch doonen, wan ekj wada met wäm spazieren wudd?”