WAUT JUNGE MENSCHEN WEETEN WELLEN
Waut, wan mien Frint mie beleidicht?
Waut du weeten motst
Daut jeft nich Frind, waut kjeenmol Trubbel haben. Wäajen wie aula onvolkomen sent, kaun een gooda Frint – mau rajcht dien basta Frint – waut sajen ooda doonen, waut die beleidicht. Oba wan du mol opprechtich sajen sust, hast du nich uk mol wäm beleidicht? (Jakobus 3:2).
Derch daut Internet kaun eena uk beleidicht woaren. David, een Jugentlicha, sajcht biejlikj: “Wan du em Internet best un Bilda sitst von dienen Frint, waut met aundre toop es, dan fangst du veleicht aun to wundren, wuarom se die nich enjelot haben. Dan feelst du die veleicht aunjeschmäat un truarich.”
Du kaust daut lieren, met disen Trubbel omtogonen.
Waut du doonen kaust
Unjasieekj die selfst. De Bibel sajcht: “Lot die nich leicht enoajren; wiels de Schosel drajcht dän Oaja em Hoat” (Liera 7:9, PB).
Alyssa sajcht: “Eenjemol woascht du lota en, daut et nich soo wichtich wia, wuaräwa du die oajren must.”
Toom nodenkjen: Best du too leicht beleidicht? Kaust du daut noch bäta lieren, aundre äare Fäla to äwaseenen? (Liera 7:21-22).
Hool em Denkj, woo goot daut utkjemt to vejäwen. De Bibel sajcht: “Daut äwaseenen wan eenem jestat woat, es eene Iea” (Spricha 19:11, PB).
Mallory sajcht: “Mau rajcht wan du eene Uasoak hast, ontofräd to sennen, wurscht du sellen reed sennen to vejäwen. Daut bediet, eenen aundren de Sach nich mea väatohoolen un uk nich to velangen, daut dee sikj emma wada entschuldjen saul. Wan du dän ieescht vejäft hast, dan räd doa nich mea von.”
Toom nodenkjen: Es de Sach werkjlich soo wichtich? Kaust du dän vejäwen, om Fräd to hoolen? (Kolossa 3:13).
Emma wada aule Trubbels oppbrinjen es soo, aus emma wada de Däa oppmoaken un dän kolden Wint en eene woame Stow nennloten
Denkj aun dän Aundren. De Bibel sajcht: “Siet nich bloos no daut ut, waut junt selfst intressieet, oba siet uk doano ut, waut aundre intressieet” (Filippa 2:4).
Nicole sajcht: “Wan twee Frind sikj leewen un respakjten, dan haben dee goode Uasoak, äare Trubbels fuaz oppem Kloaren to brinjen. Wäajen die daut soo väl Aunstrenjunk jekost haft, räakjenst du dit Veheltnis sea väl un west daut nich velieren.”
Toom nodenkjen: Haft daut irjentwaut Goodet, woo de Aundra aun de Sach naunkjikjt? (Filippa 2:3).
Waut wie doavon lieren kjennen: Wan du daut lieescht, doamet omtogonen, wan die wäa beleidicht haft, woat die daut uk halpen, wan du ieescht ella best. Wuarom wurscht du doa nich fuaz met aunfangen?
Veleicht jleichst du uk dit
WAUNTTOFEL-VIDEOS
Waut es een woara Frint?
Faulsche Frind sent leicht to finjen, oba woo kaust du eenen woaren Frint finjen?
WAUT SAJCHT DE SCHREFT ÄWA ...?
Waut meent daut, aundre to vejäwen?
De Schreft jeft gooden Rot, waut die halpen kaun, wäm to vejäwen.
