Waut de Schreft doatoo sajcht

 De Schreft rät nich krakjt von Pornografie, schwiensche Bilda kjikjen, Internet-Sex ooda sest soone Sachen aus dise. Oba dee wiest ons gaunz dietlich, daut Gott haben well, daut bloos een Ehemaun met siene Ehefru Sex haben saul. Un hee jleicht daut nuscht, wan doa orrajchte Iedeeen äwa Sex vebreet woaren. Hia sent eenje Varzhen doatoo:

•   “Doawäajen moakt jieda orrajchten Wunsch en junt doot, waut to soont fieren kunn aus sintelje Sorten Sex; Orreinet; onkontroldet Sex-Velangen” (Kolossa 3:5). Wan doa wäa schwiensche Bilda kjikjt, wudd dee de orrajchte Wenschen nich dootmoaken, oba mau rajcht noch stoakja moaken. Wäa Pornografie kjikjt, es fa Gott to beseenen orrein ooda schwiensch.

•   “Wäa dän Tiet äwa no eene Fru kjikjt, soo daut hee een Velangen no ar kjricht, dee haft aul en siene Jedanken met ar de Ehe jebroaken” (Matäus 5:28). Wan eena sikj Schwienschet aunkjikjt, kjricht eena orrajchte Jedanken. Dise Jedanken kjennen soo stoakj woaren, daut eena dan uk waut Orrajchtet deit.

•   “Von sintelje Sorten Sex un von aule Sorten Orreinet ooda Bejia saul mank junt nich mol de Räd sennen” (Efeesa 5:3). Wie wudden aulsoo nich sellen fa Scheengonen von sintelje Sorten Sex vetalen. Un noch väl weinja wudd wie dan sellen soone Films kjikjen ooda doaräwa waut läsen.

•   “Waut de Woakjen sent von de sintelje Natua, es kloa to seenen: Daut es sintelje Sorten Sex; Orreinet; ... un aundret, waut biejlikj soo es. Ekj jäw junt aul em Verut eene Woarnunk wäajen dise Sachen, soo aus ekj aul ea deed. Deejanje, waut soone Sachen doonen, woaren Gott sien Kjennichrikj nich oawen” (Galata 5:19-21). Woo denkjt Gott äwa soone, waut Pornografie kjikjen ooda soont doonen aus Internet-Sex ooda Fon-Sex ooda Sexting? Fa Gott to beseenen sent dee orrein. Wan eena sikj soont wudd aunwanen, kaun daut bat doa komen, daut eena Gott sienen Jefaulen opp eenst gaunz vespält.