Waut de Schreft doatoo sajcht

 Daut kloaroode wille Tia, wua Openboarunk, Kapitel 17 von rät, stalt eene Organisazion väa, waut sikj daut väajenomen haft, de Lenda von de Welt to veeenjen un fa dee to strieden. Ea wia daut de Velkjabunt un nu es daut de UNO (de Veeende Nazionen).

Waut halpt ons to vestonen, waut daut kloaroode wille Tia väastalt?

1.   Daut es eene polietische Organisazion. Daut kloaroode wille Tia haft “säwen Kjap” un von dee woat jesajcht, daut dee “säwen Boaj” un “säwen Kjennichs” väastalen (Openboarunk 17:9-10). Boaj un wille Tieren woaren enne Bibel biltlich jebrukt fa Rejierungen, aulsoo polietische Machten (Jeremia 51:24-25, JHF; Daniel 2:44-45, JHF; 7:17, 23).

2.   Daut es een Bilt von aule Rejierungen oppe Welt. Daut kloaroode wille Tia likjent daut säwenkopje wille Tia von Openboarunk, Kapitel 13, waut aule Rejierungen oppe gaunze Welt väastalt. Beid wille Tieren haben säwen Kjap, tieen Hieena un lastaliche Nomes (Openboarunk 13:1; 17:3). Daut dee sikj soo sea likjnen, mott eene Bediedunk haben. Daut kloaroode wille Tia es aulsoo een Bilt von aule Rejierungen oppe Welt (Openboarunk 13:15).

3.   Daut kjricht Macht von de Rejierungen. Daut kloaroode wille Tia “staumt”, ooda kjemt, von aundre Rejierungen (Openboarunk 17:11, 17).

4.   Daut haft met de Jemeenten to doonen. Daut Groote Babel, aulsoo aule faulsche Gloowes oppe Welt, sett opp daut kloaroode wille Tia. Daut wiest, daut de Jemeenten daut wille Tia väasajen wellen (Openboarunk 17:3-5).

5.   Daut brinjt Schaund opp Gott. Daut wille Tia es “voll lastaliche Nomes” (Openboarunk 17:3).

6.   Daut deit fa eene Tietlank nuscht. Daut kloaroode wille Tia wudd en “dän Aufgrunt” a sennen. Daut meent, daut wudd fa eene Tietlank nuscht doonen, oba dan wudd daut wada verendach komen (Openboarunk 17:8).

Woo sikj daut erfelt haft, waut de Schreft verutsäd

 See, woo de UNO un de Velkjabunt, waut doaver wia, de Profezeiungen ut de Schreft erfelt haben von daut kloaroode wille Tia.

1.   Daut es eene polietische Organisazion. De UNO es eene Organisazion, waut de Politikj oppe gaunze Welt unjastett, doaderch daut dee aul de Lenda, “waut Poat von dee sent, jlikjen wichtich talt.” b

2.   Daut es een Bilt von aule Rejierungen oppe Welt. Bie de UNO sent vonne 2011 aun 193 Lenda bie. Un doawäajen sajcht de UNO, daut dee fa de mieeschte Lenda un Menschen von de Welt ensteit.

3.   Daut kjricht Macht von de Rejierungen. De UNO haft mau soo väl Macht un Krauft, aus de Lenda, waut to dee jehieren, tooloten. De UNO jeft daut bloos, wäajen dise Lenda dee unjahoolen.

4.   Daut haft met de Jemeenten to doonen. De Velkjabunt un de UNO haben beid emma de Unjastettunk von de Jemeenten jehaut. c

5.   Daut brinjt Schaund opp Gott. De UNO wort oppjestalt “toom en de veschiedne Lenda Fräd un Sechaheit hoolen.” d Wan eena nu jroz soo veleicht uk denkjt, daut daut to lowen es, haft de UNO enne Werkjlichkjeit oba Schaund opp Gott jebrocht. Wuarom? Wiels dee haben sikj waut väajenomen, waut Gott säd, waut bloos sien Kjennichrikj volbrinjen kaun (Psalm 46:10; Daniel 2:44).

6.   Daut deit fa eene Tietlank nuscht. Dän Velkjabunt wort korz no dän Ieeschten Weltkjrich oppjestalt toom Fräd hoolen. Oba dee kunn daut nich väabieejen, daut aulawäajen oppe Welt Orru wia. Aus de Tweeda Weltkjrich aune 1939 aunfunk, jinkj de Velkjabunt tonuscht. No dän Tweeden Weltkjrich aune 1945 wort de UNO oppjestalt. Waut de UNO sikj väajenomen haft, woo dee waut deit un woo dee oppjestalt es likjent sikj krakjt met dän Velkjabunt, waut ea wia.