Waut de Schreft doatoo sajcht

 De Fient un de beese Jeista haben de Menschen soo unja äare Kontroll, daut de Schreft mau rajcht sajcht, daut “de gaunze Welt en dän Beesen siene Macht es” (1. Johanes 5:19). De Schreft wiest, woo de Beesa Fient prooft, de Menschen to kontrollen.

•   Derch veleiden. De Schreft rot de Christen too, dee sellen “fauststonen jäajen dän Beesen Fient siene hinjalestje Faulen” (Efeesa 6:11). Eent von de Faulen es: Hee prooft de Menschen to veleiden, daut dee sellen jleewen, daut siene Helpa minkj Gott deenen (2. Korinta 11:13-15).

•   Derch Zaubarie. De Beesa Fient veleit de Menschen uk derch Woasajarie, Stiern-Diedarie ooda wan wäa derch wäm met Jeista prooft to räden ooda derch Tieekjens sajen, waut noch mol woaren woat (5. Mose 18:10-12). Eenje brucken Droggs ooda doonen opp eene besondre Oat sea deep nodenkjen ooda noch aundret toom proowen, daut Vestaunt ladich to moaken. Oba daut es eene Jefoa, wiels soo kjennen de beese Jeista de Kontroll kjrieen äwa dän Mensch (Lukas 11:24-26).

•   Derch faulsche Jemeenten. Jemeenten, waut faulsche Lieren vebreeden, brinjen de Menschen bat doa, Gott ojjehuarsom to sennen (1. Korinta 10:20). De Schreft nant soone Iedeeen “Lieren von beese Jeista” (1. Timotäus 4:1).

•   Derch dee besäten moaken. De Schreft rät doavon, daut beese Jeista eenjemol de Kontroll äwa Menschen hauden. Eenjemol muaken de beese Jeista de Menschen blint un stomm, waut von äant besäten wieren, ooda brochten dee bat doa, daut dee sikj selfst velazten (Matäus 12:22; Markus 5:2-5).

Woo eena sikj fa dän Beesen Fient schitzen kaun

 Du brukst nich ut Angst läwen, daut de beese Jeista die kontrollen woaren, wiels de Schreft wiest ons, woo wie ons kjennen jäajen dän Beesen Fient stalen:

•   Lia entowoaren, “woo dee schauft”, soo daut du dän Beesen Fient siene Faulen fuaz erkjanen kaust (2. Korinta 2:11).

•   Lia de Bibel bäta kjanen un komm daut no, waut du lieescht. Biblische Lieren notokomen woat die fa dän Beesen Fient beschitzen (Efeesa 6:11-18).

•   Sto aules auf, waut met de beese Jeista to doonen haft (Aposteljeschicht 19:19). Doa wudd soon Spell un soone Bieekja, Bilda un Videos met en sennen, waut met Zaubarie to doonen haben.