Waut kaun eenem halpen, de Schreft to vestonen?

AUFSPÄLEN

Waut de Schreft doatoo sajcht

De Bibel sajcht opp väl Städen selfst, waut eena doonen mott toom dee vestonen. Endoont woo du oppjewossen best, de Norecht en de Bibel “es nich too schwoa fa junt, daut es nich ommäajlich fa junt to hoolen” (5. Mose 30:11, PB).

Waut eena doonen mott toom de Bibel vestonen

Hab de rajchte Enstalunk. See de Bibel aus Gott sien Wuat aun. Sie deemootich, wiels Gott es jäajen de Stolte (1. Tessalonicha 2:13; Jakobus 4:6). Jleew oba nich fuaz aules, onen daut du doa eenen Grunt fäa hast, wiels Gott well, daut du diene “Fäichkjeit to denkjen” brukst (Reema 12:1-2).
Bäd om Weisheit. En Spricha 3:5 sajcht de Bibel: “Velot die nich opp dien ieejnet Vestentnis”. Enne Städ daut, froag “Gott emma wada doano”, die Weisheit to jäwen, om de Bibel to vestonen (Jakobus 1:5).
Studia räajelmässich. Du woascht doa väl mea bie haben, wan du de Bibel räajelmässich studieescht enne Städ bloos eenjemol (Josua 1:8).
Studia Teemawies. Eene goode Wajch toom seenen, waut de Bibel äwa eene jewesse Sach sajcht, es, dee Teemawies to studieren. Fang soo aun, aus wudden daut “de ieeschte Lieren” sennen, un dan doo “wieda doano sträwen, riep to woaren”, aulsoo veraun to komen (Hebräa 6:1-2). Du woascht enwoaren, daut du eenje Varzhen met aundre Varzhen vejlikjen kaust, un du woascht seenen, daut jewesse Poats enne Bibel sikj omzajcht utlajen, mau rajcht soone Poats, waut “schwoa to vestonen” sent (2. Petrus 3:16).
Lot die von aundre halpen. De Bibel rot ons too, von deejanje Help auntonämen, waut de Bibel vestonen (Aposteljeschicht 8:30-31). Jehowa siene Zeijen beeden daut aun, emsonst met aundre de Bibel to studieren. Soo aus de ieeschtemmasche Christen daut deeden, soo brucken dee vondoag dän Dach uk Bibelvarzhen, om aundre halpen to vestonen, waut de Bibel werkjlich lieet (Aposteljeschicht 17:2-3).

Sachen, waut die nich fälen

Sea kluak un utjelieet sennen. Jesus siene 12 Apostel vestunden de Schreften un lieeden aundre dee, wan eenje dee uk aus “läach-jelieede un normale” Menschen talden (Aposteljeschicht 4:13).
Jelt. Du kaust emsonst lieren, waut de Bibel sajcht. Jesus säd to siene Nofolja: “Jie haben emsonst jekjräajen un dan jäft uk emsonst” (Matäus 10:8).