“Doawäajen, sieekjt wieda daut ieeschte no Gott sien Kjennichrikj un doot daut, waut hee fa rajcht talt, un dan woa jie aul dise aundre Sachen uk noch kjrieen” (Matäus 6:33, Niee-Welt-Äwasatunk).

 “Oba sieekjt daut ieeschte no Gott sien Rikj un no siene Jerajchtichkjeit. Dan woa jie daut aundre uk aula kjrieen” (Matäus 6:33, De Plautdietsche Bibel).

Waut bediet Matäus 6:33?

 Gott sien Kjennichrikj es eene himlische Rejierunk, waut oppe Ieed woat Gott sienen Wellen erfellen (Matäus 6:9-10). Een Mensch sieekjt doaderch daut ieeschte no daut Kjennichrikj, wan daut fa dän daut wichtichste em Läwen es. a Doa es nich bloos met en, doano hinjaraun to sennen, mea äwa Gott sien Kjennichrikj to lieren, oba uk daut eena aundre doavon vetalt, waut fa Goodet daut doonen woat (Matäus 24:14). Soona, waut no daut Kjennichrikj sieekjt, bät uk doarom, daut daut komen saul (Lukas 11:2).

 Daut, waut Gott fa rajcht talt (ooda Gott siene Jerajchtichkjeit, De Plautdietsche Bibel). Doa es met en, waut Gott fa een rajchtet un orrajchtet Vehoolen talt (Psalm 119:172). Een Mensch deit daut, waut Gott fa rajcht talt, wan dee sikj en sien Läwen no Gott siene Jebooten recht, waut emma toom Gooden sent (Jesaja 48:17).

 De Sauz, dan woa jie aul dise aundre Sachen uk noch kjrieen, es een Vespräakjen von Gott, daut hee fa aul deejanje sorjen woat, bie dee dit beides daut ieeschte kjemt: Gott sien Kjennichrikj un soo to läwen, aus Gott daut fa rajcht talt (Matäus 6:31-32).

Waut halpt ons noch, Matäus 6:33 to vestonen?

 Dise Wieed, waut Jesus säd, sent Poat von daut, waut de Boajchprädicht jenant woat, waut en Matäus Kapitel 5-7 to finjen es. Secha wieren een deel von Jesus siene Toohiera oame Menschen. Dee motten sikj veleicht soo jefeelt haben, daut see de mieeschte Tiet brucken musten toom äa Läwen moaken, un daut äant mau weinich Tiet äwableef, no daut Kjennichrikj to sieekjen. Oba Jesus spruak dee Moot too, doano to kjikjen, woo Gott fa de Plaunten un de Tieren sorcht. Gott vesprakjt, daut hee fa deejanje sorjen woat, waut daut ieeschte no sien Kjennichrikj sieekjen (Matäus 6:25-30).

Faulsche Iedeeen äwa Matäus 6:33

 Waut eenje jleewen: Christen brucken nich fa äa Läwen schaufen.

 Woo daut es: De Schreft sajcht, daut Christen schaufen motten, om fa sikj selfst un äare Famieljes to sorjen (1. Tessalonicha 4:11-12; 2. Tessalonicha 3:10; 1. Timotäus 5:8). Jesus säd nich, daut siene Nofolja bloos sullen no daut Kjennichrikj sieekjen, oba hee säd, daut dee daut ieeschte sullen no daut Kjennichrikj sieekjen.

 Soone, waut daut ieeschte no Gott sien Kjennichrikj sieekjen un reed sent, fa äa Läwen to schaufen, kjennen doamet räakjnen, daut Gott äant halpen woat, daut Needje em Läwen to kjrieen (1. Timotäus 6:17-19).