“Doawäajen saj ekj to junt: Aules, om waut jie bäden un no waut jie froagen, jleeft doaraun, daut jie daut aul haben, un jie woaren daut haben” (Markus 11:24, Niee-Welt-Äwasatunk).

 “Doawäajen saj ekj junt: Om wautemma jie bäden, jleeft daut jie daut kjrieen, un jie woaren daut haben” (Markus 11:24, De Plautdietsche Bibel).

Waut bediet Markus 11:24?

 Jesus wiest siene Nofolja met dise Wieed, woo wichtich daut es, eenen stoakjen Gloowen to haben, daut äare Jebäda sikj erfellen woaren. Hee vesechat äant, daut Gott nich bloos no dee äare Jebäda horcht, oba uk waut doonen woat. Wan wäa gaunz opprechtich om soont bät, waut met Gott sienen Wellen stemt, kaun hee sikj gaunz secha sennen, daut sikj daut erfellen woat. Daut wudd soo sennen, aus wan hee daut aul jekjräajen haud.

 Jesus wiest, woo wichtich de Gloowen es, wan eena bäden deit. Hee sajcht, wan eena bät, saul eena “doa nich aun twiewlen en sien Hoat” oba “werkjlich Gloowen haben, daut et soo romkomen woat” (Markus 11:23). Wuarom? Wiels deejanja, waut twiewelt, kaun “nich mol hopen, daut hee waut von Jehowa a kjrieen woat” (Jakobus 1:5-8).

 Een Mensch, waut Gloowen haft, bät emma wada (Lukas 11:9-10; Reema 12:12). Opp dee Wajch wiest hee, daut am daut werkjlich fält, no waut hee frajcht, un daut hee sikj gaunz secha es, daut Gott sien Jebäd beauntwuaten kaun. Secha, dee weet uk, daut Gott daut Jebäd veleicht opp eene aundre Wajch beauntwuat, aus waut dee sikj väajestalt haud ooda to eene aundre Tiet, aus waut hee jedocht haud (Efeesa 3:20; Hebräa 11:6).

 Meenen Jesus siene Wieed dan, daut Gott aule Jebäda erhieet un jiedren eenen daut jeft, no waut dee frajcht? Nä. Jesus rät hia to siene Nofolja, waut Gloowen hauden un sikj aunstrenjden, Jehowa Gott opp soone Wajch to deenen, waut hee fa rajcht talt. De Schreft sajcht, daut Gott bloos no soone Jebäda horcht, waut met sienen Wellen stemmen (1. Johanes 5:14). Gott horcht nich no de Jebäda von soone, waut am met Fliet nich jehorchen ooda Schlajchtet doonen, onen een Leetsennen to haben (Jesaja 1:15; Micha 3:4; Johanes 9:31). Du kaust mea doaräwa lieren, no woone Jebäda Gott horcht, wan du dit korte Video aunkjikjst.

Waut halpt ons noch, Markus 11:24 to vestonen?

 En de latste Doag von Jesus sienen Deenst oppe Ieed räd hee met siene Jinja doaräwa, woo wichtich daut wia, Gloowen aun Gott to haben. Toom daut dietelja moaken, brukt hee uk een Jlikjnis. Oppem Wajch no Jerusalem wia een Fiejen-Boom, waut aul tiedich utjeloten haud. Oba dee hauden sikj aunjeschmäat, wäajen de Boom nich Frucht druach, un doawäajen läd Jesus eenen Fluch opp dän (Markus 11:12-14). Waut wull Jesus doamet dietlich moaken? Na, dän Boom leet soo, aus wan dee aul wudd Frucht droagen, oba daut wia goanich soo. Krakjt soo wia daut uk met daut Volkj Israel. Daut leet soo, aus wan dee Gott aunbäden deeden, oba rajcht jesajcht fäld äant daut aun Gloowen (Matäus 21:43). Nich lang doano wia de Fiejen-Boom gaunz vedrieecht, un daut wees, waut boolt met daut ontrue Volkj Israel passieren wudd (Markus 11:19-21).

 Oba woo stunt daut dan met Jesus siene Nofolja? Jesus wia sikj gaunz secha, daut dee soonen stoakjen Gloowen kjrieen kunnen, daut dee wudden kjennen met Schwierichkjeiten foadich woaren un Besondret volbrinjen (Markus 11:22-23). Jesus sien Rot äwa daut Jebäd kjeem krakjt to de paussende Tiet, wiels siene Nofolja äa Gloowen boolt oppe Proow jestalt wort. Dee musten doamet foadich woaren, aus Jesus storf un uk, aus see em Prädichtdeenst emma mea Vefoljunk kjrieejen (Lukas 24:17-20; Aposteljeschicht 5:17-18, 40). Vondoag dän Dach kjennen Jesus siene Nofolja uk met Schwierichkjeiten foadich woaren, wan dee wiesen, daut dee Gloowen aun Gott haben un doaraun jleewen, daut äare Jebäda erhieet woaren (Jakobus 2:26).

 Kjikj dit korte Video toom seenen, von waut sikj daut Buak Markus haundelt.