“Wiels Gott leewd de Menschen oppe Welt soo sea, daut hee sienen eensich jemoakten Sän jeef, soo daut jieda eena, dee doa wiest, daut hee Gloowen aun dän haft, nich venicht woat, oba daut eewje Läwen haben kaun” (Johanes 3:16, Niee-Welt-Äwasatunk).

 “Gott siene Leew fa dise Welt es soo groot, daut hee sienen eensjen Sän jeef, daut aul dee, dee aun am jleewen, nich veloaren gonen, oba daut eewje Läwen haben” (Johanes 3:16, De Plautdietsche Bibel).

Waut bediet Johanes 3:16?

 Gott leeft ons un well, daut wie fa emma läwen. Doawäajen jroz schekjt hee sienen Sän Jesus Christus no de Ieed. Aus Jesus oppe Ieed wia, haft hee väl volbrocht. Biejlikj lieed hee siene Nofolja äwa sienen Gott un Voda (1. Petrus 1:3). Hee jeef uk sien Läwen han fa de Menschen. Daut wie daut eewje Läwen kjrieen kjennen, mott wie Gloowen aun Jesus haben.

 Aun de Wieed, “daut hee sienen eensich jemoakten Sän jeef”, a es to seenen, woo groot Gott siene Leew es. Jesus wia een besondra Sän von Gott. Wuarom? Wäajen bloos Jesus wort von Gott auleen jemoakt (Kolossa 1:17). Hee es “de Ieeschtjebuarna von de gaunze Schepfunk” (Kolossa 1:15). Aulet Aundre, wua uk de aundre Enjel met en sent, wort derch Jesus jemoakt. Oba Jehowa b Gott wia reed, sienen leefsten Sän to schekjen, “om to deenen un sien Läwen aus Leesjelt hantojäwen, om väle trigjtokjeepen” (Matäus 20:28). Jesus must lieden un stoawen toom ons von de Sind un Doot friemoaken, waut wie von dän ieeschten Mensch, Adam, metjeorwen haben (Reema 5:8, 12).

 Bie Gloowen wiesen aun Jesus, es mea met en, aus bloos aun am jleewen ooda daut aunerkjanen, waut hee fa ons jedonen haft. Wie motten onsen Gloowen aun Gott sienen Sän bewiesen, doaderch daut wie am jehorchen un en siene Footspoaren gonen (Matäus 7:24-27; 1. Petrus 2:21). De Schreft sajcht: “Wäa doa wiest, daut hee Gloowen aun dän Sän haft, dee haft daut eewje Läwen. Wäa dän Sän nich jehorcht, dee woat daut Läwen nich seenen” (Johanes 3:36).

Waut halpt ons noch, Johanes 3:16 to vestonen?

 Jesus säd dit, aus hee met eenen judischen Leida räd, waut Nikodemus heet (Johanes 3:1-2). En dise Unjahoolunk openboad Jesus eenjet äwa Gott c sien Kjennichrikj un äwa “wadajebuaren” woaren (Johanes 3:3). Hee säd uk verut, woo hee wudd stoawen. Hee säd: “De Menschensän mott oppjehowen woaren [aun eenen Pol jehongen], daut jieda eena, dee aun am jleeft, kaun daut eewje Läwen haben” (Johanes 3:14-15). Dan muak hee kloa, daut et mäajlich es, dit eewje Läwen to kjrieen wäajen Gott siene groote Leew fa de Menschheit. Tolatst muak Jesus noch dietlich, daut wie daut eewje Läwen bloos kjrieen kjennen, wan wie Gloowen wiesen un Sachen doonen, waut Gott jefaulen (Johanes 3:17-21).