“Jesus säd to To̱mas: ‘Ekj sie de Wajch un de Woarheit un daut Läwen. Kjeena kaun no dän Voda komen, buta dee deit daut derch mie’” (Johanes 14:6, Niee-Welt-Äwasatunk).

 “Jesus säd to am: Ekj sie de Wajch, de Woarheit un daut Läwen, kjeena kjemt nom Voda buta derch mie” (Johanes 14:6, De Plautdietsche Bibel).

Waut bediet Johanes 14:6?

 Wan doa wäa dän Voda, Jehowa a Gott, aunbäden well, dan mott dee aunerkjanen, waut fa een wichtjet Poat Jesus doabie es.

 “Ekj sie de Wajch”. Jesus es “de Wajch”, om opp de rajchte Wajch no Gott to komen. Biejlikj motten dee, waut to Gott bäden, daut en Jesus sienen Nomen doonen (Johanes 16:23-24). Jesus sien Doot muak daut fa de Menschen mäajlich, met Gott wada toopjebrocht to woaren un daut Gott aun dee eenen Jefaulen haft (Reema 5:8-11). Jesus jeef ons uk een Väabilt doarenn, waut fa een Läwen eena fieren mott, om Gott to jefaulen (Johanes 13:15).

 “Ekj sie . . . de Woarheit”. Jesus säd emma de Woarheit un läwd uk doano (1. Petrus 2:22). Dee, waut no am horchten, kunnen de Woarheit äwa Gott lieren (Johanes 8:31-32). Jesus wia uk “de Woarheit” en dän Senn, daut hee biblische Profezeiungen erfeld. Doaderch muak hee Gott siene Vespräakjungen woa (Johanes 1:17; 2. Korinta 1:19-20; Kolossa 2:16-17).

 “Ekj sie . . . daut Läwen.” Jesus jeef sien Läwen, soo daut dee, waut Gloowen wiesen, eewjet Läwen haben kjennen (Johanes 3:16, 36). Hee es uk “daut Läwen” fa dee, waut jestorwen sent, wiels hee woat dee vom Doot oppwakjen (Johanes 5:28-29; 11:25).

 “Kjeena kaun no dän Voda komen, buta dee deit daut derch mie.” Dee, waut met Gott wellen Frind sennen, motten daut aunnämen, daut Jesus doabie een wichtjet Poat es. Dee kjennen daut, wan dee en Jesus sienen Nomen to Gott bäden. Soo wiesen dee uk, daut dee Jesus Christus aus Aunjestalden aunerkjanen (Johanes 15:16). Dee nämen daut uk aun, daut de Radunk bloos derch Jesus mäajlich es (Aposteljeschicht 4:12; Filippa 2:8-11).

Waut halpt ons noch, Johanes 14:6 to vestonen?

 En Johanes Kapitel 13 bat 17 es de Rot to finjen, waut Jesus siene 11 true Apostel de latste Nacht ver sienen Doot jeef. En Kapitel 14 rod Jesus siene Jinja too, Gloowen aun am un sienen Voda to wiesen, un am un sienen Voda to leewen un to jehorchen (Johanes 14:1, 12, 15-17, 21, 23-24). Hee rät äwa daut goode Veheltnis, waut hee met sienen Voda haud un noch haft (Johanes 14:10, 20, 28, 31). Wan Jesus uk meist bat doa wia, trigj nom Himmel to foaren, vesechad hee siene Jinja oba, daut hee dee nich auleen loten wudd (Johanes 14:18). Hee vespruak dee uk eenen “Helpa”; hee säd, daut wia “de heilja Jeist, dän de Voda en mienen Nomen schekjen woat” (Johanes 14:25-27). Opp dise Wajch un noch opp aundre Wäaj muak Jesus siene Nofolja fa daut Schwoare reed, waut noch komen wudd.