“Soo, deejanja, waut derch siene Krauft, waut en ons wirkjt, grulich sea väl mea doonen kaun, aus wua wie no froagen ooda waut wie foten kjennen, dee saul . . . veharlicht woaren” (Efeesa 3:20-21, Niee-Welt-Äwasatunk).

 “Däm, dee derch siene Krauft väl mea en ons doonen kaun, aus wie ons denkjen ooda vestonen kjennen, däm traft aule Iea” (Efeesa 3:20-21, De Plautdietsche Bibel).

Waut bediet Efeesa 3:20?

 De Apostel Paulus rät doa von sien Vetruen, daut Gott de Jebäda von siene Deena beauntwuaten kaun, un daut hee daut opp soone Wajch doonen kaun, wua dee nich mol aun jedocht haben, daut et mäajlich es. Hee kaun mau rajcht noch mea doonen, aus wua dee no fruagen ooda opp jehopt haben.

 “Soo, deejanja, waut derch siene Krauft, waut en ons wirkjt, . . . mea doonen kaun”. De Varsch 21 wiest ons, daut “deejanja” Jehowa a Gott es. Doa schrift Paulus: “Dee saul derch de Vesaumlunk un derch Christus Jesus . . . veharlicht woaren.” Un buta daut kaun Gott ons de Macht, ooda de Krauft, jäwen, waut ons fält, om sienen Wellen to doonen (Filippa 4:13).

 En Varsch 20 rät de Apostel Paulus doavon, daut Jehowa dee halpen kaun, waut am deenen. Derch de Wieed, waut hee brukt, wiest hee ons waut Besondret doaräwa. Een Buak sajcht äwa de Wieed “deejanja, waut . . . kaun”: “En disen Varsch jeit daut nich bloos doarom, daut Gott waut doonen kaun, aulsoo de Mäajlichkjeit haft, waut to doonen. Doa jeit daut doarom, daut hee uk werkjlich de Krauft haft, daut to doonen.” Jehowa es nich soo aus de Menschen. Een Mensch well ons veleicht halpen, oba dee es nich emma emstaund, daut to doonen. Oba Jehowa kaun emma aules doonen, waut doa fält, om siene Deena to halpen un dee äare Jebäda to beauntwuaten. Hee es de Eensja, waut onen Enj Macht haft (Jesaja 40:26).

 “[Gott kaun] grulich sea väl mea doonen . . ., aus wua wie no froagen ooda waut wie foten kjennen.” Jehowa kaun fa siene Deena sea goot sorjen un mau rajcht “grulich sea väl” mea doonen, aus waut dee sikj denkjen kjennen. Hee kaun siene Deena väl bäta halpen, aus dee sikj väastalen kjennen.

 De Wieed “wua wie no froagen ooda waut wie foten kjennen” lieren ons noch waut. Doaderch, daut Paulus säd: “Wua wie no froagen ooda waut wie foten kjennen,” wull hee aule Christen daut dietlich moaken, daut Gott fa äant noch mea doonen kaun aus waut dee sikj väastalen kjennen. Eenjemol späat sikj Christen daut veleicht soo, daut et kjeene Leesunk jeft fa äare Trubbels, wiels dee soo groot sent ooda soo schwoa. Veleicht weeten dee selfst nich mol, om waut dee bäden sellen. Oba Jehowa kaun jieda Loag vestonen un hee kaun uk emma daut Baste halpen. Hee kaun jieda Trubbel to de rajchte Tiet leesen, un hee kaun daut opp soone Wajch doonen, waut dee sikj nich mol wudden haben väajestalt ooda jedocht haben, daut et mäajlich wia (Hiob 42:2; Jeremia 32:17). En de Tweschentiet jeft hee äant de Krauft, met Freid uttohoolen (Jakobus 1:2-3).

Waut halpt ons noch, Efeesa 3:20 to vestonen?

 Daut Buak Efeesa es een Breef von dän Apostel Paulus aun de Christen, waut en de Staut Efeesus en Kjlien-Asien läwden (vondoag dän Dach es daut en daut Launt Turkei). En sienen Breef schreef Paulus wesset von daut opp, waut hee fa äant jebät haud (Efeesa 3:14-21). Paulus haud doarom jebät, daut see sullen daut nodoonen, woo Jesus docht un waut hee deed. Doaderch wudden see kjennen Christus siene Leew bäta kjanen lieren. Daut es uk paussent fa aule Christen bat nu. Opp Enj von sien Jebäd deed Paulus Jehowa preisen un krakjt doa säd hee de Wieed, waut wie en Efeesa 3:20-21 läsen kjennen.

 Kjikj dit korte Video toom seenen, von waut sikj daut Buak Efeesa haundelt.