“Mucht de HAR die säajnen un die Schutz jäwen; Mucht hee die met Freid halpen, un jenstich to die sennen; Mucht de HAR dicht bie die bliewen, un die Erfolch un Fräd jäwen” (4. Mose 6:24-26, De Plautdietsche Bibel).

 “De Har säajent junt un bewoat die! De Har lat sien Aunjesecht äwa die schienen un es die jnädich! De Har häft sien Aunjesecht äwa die un jeft die Fräd!” (4. Mose 6:24-26, Friesenbibel).

Waut bediet 4. Mose 6:24-26?

 Dise Wieed sent uk bekaunt aus “Priesta-Säajen” ooda “Säajen von Aaron”, wäajen Aaron de Israeliten äa ieeschta Huaga Priesta wia (2. Mose 28:1). Oba enne Werkjlichkjeit kjeem dis Säajen von Gott, wiels hee säd to Moses: “Saj Aaron un siene Säns, dit es woo jie de Israeliten dän Säajen jäwen sellen” (4. Mose 6:22-23). Un doahinja säd Gott de Wieed, waut wie nu en 4. Mose 6:24-26 läsen kjennen. De true Priestasch kjeemen dit Jeboot no. Un dee ieeden uk Gott sienen Nomen, Jehowa. a En Varsch 27 läs wie: “Wan see [de Priestasch] daut Volkj Israel en mienen Nomen säajnen woaren, dan woa ekj daut Volkj säajnen.”

 “Mucht de HAR die säajnen un die Schutz jäwen”. Jehowa säajent siene Deena doaderch, daut hee äant Schutz un Erfolch jeft un dee leit (Spricha 10:22, NW). Daut et en 4. Mose 6:24-26 emma “die” sajcht, wiest, daut Gott nich bloos daut Volkj em Gaunzen säajnen wull, oba uk jieda Eenselnen von de Israeliten oppoat.

 “Mucht hee die met Freid halpen, un jenstich to die sennen”. Dis Sauz kaun uk soo aus dit äwasat: “De Har lat sien Aunjesecht äwa die schienen” (4. Mose 6:25, Friesenbibel). Daut meent, daut wäa fa sestwäm bät, daut Gott dänjanjen wiesen mucht, daut hee met dän tofräd es un gootjesonnen äwa dän es. b Un woo wiest Jehowa daut? Doaderch daut hee leeftolich, metfeelent un metliedent met siene Deena es (Jesaja 30:18, NW).

 “Mucht de HAR c dicht bie die bliewen, un die . . . Fräd jäwen”. Jehowa blift doaderch siene Deena “dicht bie”, daut hee sikj leeftolich om dee kjemmat un dee Fräd jeft. Een Buak sajcht doatoo dit: “Daut hebräische Wuat fa Fräd (Schalom) meent nich bloos, daut eena nich em Striet es met aundre, oba daut eena sikj em Gaunzen tofräd feelt, kjarpalich un uk em Jeisteljen.”

 Daut de Israeliten dis Säajen kunn togood komen, musten dee Jehowa jehuarsom sennen (3. Mose 26:3-6, 9). Wan dee daut deeden, holp Jehowa äant, krakjt soo aus hee vesproaken haud. Soo wia daut biejlikj aus Salomo Kjennich wia un uk aus Hiskia Kjennich wia (1. Kjennichs 4:20; 5:5; 2. Chronik 31:9-10).

 Wan von Christen vondoag dän Dach uk nich velangt woat, dise Wieed notosajen, wensch wie ons oba doawäajen, daut Gott onse Breeda un Sestren säajnen mucht. Daut kjenn wie Gott uk em Jebäd sajen un uk onse Breeda, wan wie dee Moot toospräakjen (1. Tessalonicha 5:11, 25). Jehowa endat sikj nich. Hee well siene true Deena emma säajnen un beschitzen. True Christen kjennen aulsoo Fräd haben, wiels dee weeten, daut Jehowa sien “Aunjesecht” äwa äant schient.

Waut halpt ons noch, 4. Mose 6:24-26 to vestonen?

 En de ieeschte tieen Kapitels von 4. Mose jeit daut om Gott siene Aunwiesungen to de Israeliten aus dee dicht bie dän Sinai-Boajch wieren opp äaren Wajch no daut Vesproakne Launt. Opp dee Städ bleewen dee rom een Joa. En dee Tiet stald Jehowa fa sien Volkj Räajlen opp, jeef äant Jesazen un hee muak uk dän Bunt von daut Jesaz met äant.

 Jehowa säd uk to Moses, woo Aaron un dän siene Säns, waut de utjewälde Priestasch wieren, de Israeliten säajnen sullen (4. Mose 6:22-23). Nodäm deeden Aaron un siene Nokomen de Wieed von 4. Mose 6:24-26 brucken toom daut Volkj säajnen. Met de Tiet wort daut dan Mood, daut de Priestasch em Tempel disen Säajen nosäden. Dee deeden daut opp Enj von jieda Dach, wan dee ieescht verecht hauden met opfren.

 Kjikj dit korte Video toom seenen, von waut sikj daut Buak 4. Mose haundelt.