“Mien grootet Metleet es jenuach fa die, wiels miene Krauft woat en Schwakheit volstendich jewäsen” (2. Korinta 12:9, Niee-Welt-Äwasatunk).

 “Miene Jnod es jenuach fa die, wiels miene Krauft es en schwake Menschen stoakj” (2. Korinta 12:9, De Plautdietsche Bibel).

Waut bediet 2. Korinta 12:9?

 Gott vesprakjt dän Apostel Paulus, am dee Krauft to jäwen, waut am fält, om met siene Schwierichkjeiten un Schwakheiten foadich to woaren.

 “Mien grootet Metleet es jenuach fa die”. Dise Auntwuat von Gott opp Paulus siene Jebäda, waut hee emma wada bäd, kaun uk met “mien grootet Metleet es aules waut die fält”, äwasat woaren. Met aundre Wieed, Gott sien grootet Metleet wudd jenuach sennen, Paulus to halpen, met siene Schwierichkjeiten foadich to woaren. Woosoo? Daut Wuat, waut met “grootet Metleet” ooda “Jnod” äwasat woat, jeit om een Jeschenkj, waut Gott eenem friejäwrich un emsonst jeft un waut eena sikj nich vedeent haft. Aun daut, waut Paulus schreef, es to seenen, daut hee eenen grooten Nutzen von Gott sien grootet Metleet haud. Wan Paulus de Christen ea uk vefoljen deed, jeef Gott am oba de Krauft, waut am fäld, om sikj to endren un aundre to halpen, Christen to woaren (1. Korinta 15:9-10; 1. Timotäus 1:12-14). Paulus kunn sikj doa gaunz opp veloten, daut Gott am halpen wudd, irjent Trubbels un Schwierichkjeiten to äwakomen, waut hee derchmuak.

 “Wiels miene Krauft woat en Schwakheit volstendich jewäsen.” De Har Jehowa a holp Paulus denkjen, daut dise Krauft, aulsoo Gott siene, daut dolste to seenen es, wan dee derch schwake onvolkomne Menschen wirkjt (2. Korinta 4:7; 12:8). Wan Christen toostonen, daut see nich aules doonen kjennen, un bie Jehowa no Help sieekjen, dan loten dee too, daut Gott siene Krauft fa voll en äant wirkjt (Efeesa 3:16; Filippa 4:13). Un soo es Gott siene Krauft en de Menschen äare Schwakheit to seenen.

Waut halpt ons noch, 2. Korinta 12:9 to vestonen?

 Paulus schreef eenen Breef, waut von Gott enjejäft wia, aun de Christen en Korint, ojjefäa aune 55 n. Chr. En daut latste Poat von dän Breef, veteidicht hee de Macht, waut am wia aus Apostel jejäft worden. Hee deed dit, wäajen dee, waut sikj selfst fa Lierasch hilden, jäajen am räden. Daut dee Paulus rechten deeden, wia veleicht wäajen, woo am sach un woo hee räden kunn (2. Korinta 10:7-10; 11:5-6, 13; 12:11).

 Om sikj to veteidjen, säd Paulus, daut daut, waut hee em Deenst volbrocht haud, un de Schwierichkjeiten, waut hee derchjemoakt haud, nich derch siene ieejne Krauft kjeem (2. Korinta 6:4; 11:23-27; 12:12). En Kapitel 12, rät hee von waut, waut hee met “een Spekja em Fleesch” vejlikjt. Daut schient soo, daut wia een aunhoolenda Trubbel, waut am kjarpalich ooda ennalich wee deed (2. Korinta 12:7). Wan Paulus uk nich säd, waut sien Trubbel wia, wia hee sikj oba gaunz eenich, met Gott siene Help uttohoolen.

 Christen vondoag dän Dach kjennen uk Schwierichkjeiten un Vefoljunk haben. Dee kaun daut Troost jäwen to weeten, daut see derch Gott siene Krauft, irjent Trubbels uthoolen kjennen. Soo aus Paulus kjennen dee met vollet Vetruen sajen: “Wan ekj schwak sie, dan hab ekj Krauft” (2. Korinta 12:10).

 Kjikj dit korte Video toom seenen, von waut sikj daut Buak 2. Korinta haundelt.