1 Mosi 8:1-22

8  Avvah Gott hott an da Noah gedenkt, un an awl di diahra unʼs fee es bei eem voahra in di oahrich. Un eah hott en vind gmacht ivvah di eaht blohsa unʼs vassah hott ohkfanga nunnah gay.  Nau di shpringa un brunna fumm deefa un di fenshtahra fumm himmel voahra zu gmacht, un da reyyah fumm himmel hott kshtobt.  ʼS vassah uf di eaht voah am vennichah vadda di gans zeit, un am end funn en hunnaht un fuftzich dawk voahʼs adlich nunnah ganga.  Un uf em sivvatzayda dawk fumm sivvada moonet is di oahrich runnah kumma uf di berga funn Ararat.  ʼS vassah is als may nunnah ganga biss an da zeyyet moonet. Im zeyyada moonet, uf em eahshta dawk fumm moonet, henn di haychshta shpitza funn di berga sich gvissa.  Nochamohl fatzich dawk shpaydah hott da Noahʼs fenshtah uf gmacht es eah gmacht katt hott,  un hott en raven naus fleeya glost. Deah raven is zrikk un faddi kflowwa biss es vassah ufgedrikkeld voah uf di eaht.  No hott da Noah en daub naus kshikt fa sayna ebʼs vassah ufgedrikkeld voah uf di eaht.  Avvah di daub hott kenn blatz kfunna fa iahra fees roowa veilʼs vassah noch ivvah di gans eaht voah. No is see zrikk kumma zumm Noah in di oahrich. Eah hott sei hand naus glangd un hott si nei zu sich in di oahrich gnumma. 10  No hott eah sivva dawk lengah gvoaht, un hott di daub viddah naus kshikt funn di oahrich. 11  Di daub is ohvets zrikk kumma zu eem, unʼs voah en ayl blatt in iahrem shnavvel es see abgebrocha katt hott. Bei demm hott da Noah gvist es es vassah ufgedrikkeld voah uf di eaht. 12  No hott eah viddah sivva dawk gvoaht un hott di daub viddah naus kshikt, avvah see is nimmi zrikk kumma zu eem. 13  Da eahsht moonet un da eahsht dawk fumm Noah sei sex hunnaht un eahsht yoah, voahʼs vassah ufgedrikkeld funn di eaht. No hott da Noahʼs dach funn di oahrich uf gmacht, hott gegukt un hott ksenna es da grund funn di eaht drukka voah. 14  Im zvedda moonet uf em sivvana zvansishta dawk voah di eaht gans drukka. 15  No hott Gott kshvetzt zumm Noah un hott ksawt, 16  “Gay aus di oahrich, du un dei fraw un dei boova un iahra veivah mitt diah. 17  Bring alli levendich diah mitt diah es bei diah is, di fekkel, es fee un alles es uf em bodda anna graddeld, so es si naus gayn ufʼs land, fruchtboah vadda un sich oahrich fameahra uf di eaht.” 18  No is da Noah naus ganga mitt sei boova, sei fraw un sei boova iahra veivah. 19  Alli diah, alles es graddeld, alli fokkel un alles es sich faraykt uf di eaht, is aus di oahrich ganga mitt anri es grawt voahra vi si. 20  No hott da Noah en awldah zumm HAH gebaut, un hott funn awl di reini diahra un awl di reini fekkel gnumma un hott brand-opfahra gopfaht uf em awldah. 21  Un da HAH hott en leeblichah kshmakk kshmakt, un hott ksawt zu sich selvaht, “Ich vill nee nimmi di eaht faflucha deich da mensh, even vann di gedanka fumm mensh sei hatz evil sinn funn yungem uf. Ich vill nee nimmi alles levendiches doht macha vi ich gedu habb. 22  So lang es di eaht shtayt sollʼs en zeit sei fablansa un eahnda, fa kald un hays sei,fa summah un vindah sei un fa dawk un nacht sei.Dee zeida zayla nee nett ufheahra.”

Footnotes